Read Western Dani Wone Alom Kibingga 5 Bible Online

Wone Alom Kibingga 5 - Western Dani bible

Wone Alom Kibingga 5

¹Kat nen Ala awi wurik me unggwi nage keenok, liippunuk eerit nage logot o. It aap, “Yi maluk, yi obeelom,” liippega'lek wi negen logonet Ala ake warogo wogori unggwogo mengga kwak eeriyak lek o. Ata, “Wone konengge logokit o,” yinuk, unggwi nage logorak perak op o.

²Iniki koonit mban nogo nagaatik, inabi aret kogo mengga kwak, wone ambik agan nage paga, “Aap yi, wi nen aret ari,” mbake, Ala mbogut paga wonage, ndi, kat nggween paga wonage, eekwi me, kat koone perak togon ari, Ala enggaanom paga kiniki liippega'lek mbet-mbet yoge, Eeriyak mage o. Ata, koone, “Yene,” mbakak yungguppegak yoge logot o.

⁴ Aap wi negen eekwi nogo ti, Ala inikilom mbakeelik me, “Ndogop wokkirigin o,” yinuk, kumbuk mbanogo Ala yoge logomenggendik kenok, elaambirik logorak ti mage o. Ata, yemenggendak ndak-ndak mbet-mbet aret wogorumunggun o.

⁵“Yogop wokkirigin o,” yinuk, kumbuk mbaniyak lek puk logorak ti op aret kwe, “Ndogop wokkirigin o,” yinuk, kumbuk mbanemenggendak ndak-ndak eeka'lek kenok ti perak, maluk aret o.

⁶Yemenggendak paga Ala anini nen keenggi paga eerit namenggendak nogo maluk eerogo puurak ti op mbaken? Lek me, kat koone yemenggendak paga nen maluk eeriyak eekkake kero, koone liirogon arum wake, ndi, kumbuk mbanogo punuk, ti'nuk, aap Ala unde nogo yoge logonet, “Niniki koongga'lek kagak yagarak o,” yinuk, yorukwak, kambe tum wake, eeke logot o.

⁷Inabi kanet mban nugwi, inoone ambik mban agan nugwi, eekwi ti, aanom warogo aret eeriyak me, Ala mban ayuk wuppunuk puk logot o.

⁸Aap ambi yabu unde wonage nogo owe nen enegen wagangge, ndi, it imbirak inoweewi tiyarogon nen inigen wogonakwi, eeko menggaarak me, kat nen o ambime it aakumi meek mendek tebenogo piinok wonogwe, wone yugu ndak-ndak eeppiiga'lek inawone yiluk-yiluk mbanggwi, eekwi kenegen iige kenok, “Aap yi eekwi iya!” mbariyak mage o.

⁹Aakumi nen yi mendek ndi mendek yaremenggaarak anggen mbanak ti, it aap o unde wonogwe nogo kologwe, ndi, aap endagembogut kunduk kolage, eeko menggaarak.

¹⁰Aap ambi wu iniki kundugu nogo nen, “Nawu abu aret wonage,” mbaka'lek ambinom kwaarit mban nege, Aap ambi yi mendek ndi mendek iniki kunik nogo nen, “Yabu eeke onggo abu aret wo'nege,” mbaka'lek ambinom koloorak mban mbake, Eeko menggaarak me, Ti eekwi ti kunduk, we aanom warogo aret eekwi kage minggirak.

¹¹Yi mendek ndi mendek ambik age kenok, aap ambik yagabit ari wogo menggaarak me, Aap unde nogo ambi kolage menggerak mbakop? Lek o! We enegen mban wonage kagak ko'nok ndi yogo menggaarak!

¹²Aap yabu eeka nen ambi mbuuluk nenok a, nggwok nenok a, iniki teberogon nogo yege menggerak kwe, Aap eenggi warak nogo perak, amendek ambik wonage ti paga iniki koonit nage menggerak me, nogo teberogon yegeelik iniki woonik mban menggerak.

¹³Oonegen abu'me yime aaninggin lombok mendek ambi aakumi inoba age menggerak kagagirak nogo yi aret. Aakumi inamendek ambik kuwak eerogo pakaatak nogo paga nen aaninggin inoba kwippakwi,

¹⁴Ambi eeriyak nduk, inamendek alom warogo patemenggaarak nogo lek age, Eeremenggaarak me, Inapuri ndaganabemenggaarak nogo yate ambiriluk ambi wogoroorak lek age menggerak.

¹⁵ Inagalomini inikime nen we inagap mbelanak aret nda'nogo menggaarak me, nogo logonet kunduk, we togop aret nogo menggaarak. Ndi, nogo logonet, ligak wuundamo eeremenggaarak nogo ambiriluk ambi ineenggime wonok nagun abu lek aret o.

¹⁶Aaninggin lombok ambi inoba age kagagirak nogo yi o. It aap we aret unggwi wogo menggaarak ndak-ndak we aret wundi nogo menggaarak me, Ligak wuundamo eeremenggaarak nogo paga nano eekkologo menggaarak mbakop? We o wiya pigaganggulik kwak aret eerit nugu menggaarak.

¹⁷Inale'nggen lek yumaak aago logonet, iniki piirik wonogwe, andi-pandi kogwe, inanini mban mbakwi, Eerit wogwe iigak, It nda'nogogwaarak ne nogo lek aret ari nage menggerak.

¹⁸Ti kage nagagirik, aap inake koonak nogo ti, inambi nunggwi, niyo nunggwi, oonegen abu'me yime logonet, nda'nogogwaarak ne kuwagaluk logorak eeppiyareegerak nogo paga iniki ale'nggen nen ligak wuundamo kuwak eerogo pakwi, eekwi ti, abu obeelom aret me, aakumi nen eeriyak ndak-ndak aret kagagirak o.

¹⁹At Ala nen aap ambi eenggi warak eeppege, amendek ambik eerogo pege, iniki ale'nggen paga logorak eeppege, “An nake koonak nogo op aret eeppanege,” yinuk, ale'nggen logonet ligak wuundamo eeke, eeke ti kunduk, Ala nen mban aret eeppege menggerak.

²⁰ Ala nen at aap ti, ale'nggen paga eerit nage logowak nduk, eeppege menggerak me, “An ndarak neegak, Yogop age, ao,” mbakeelik at ugun aret wonage menggerak.