Read Western Dani Wone Alom Kibingga 7 Bible Online

Wone Alom Kibingga 7 - Western Dani bible

Wone Alom Kibingga 7

¹ Amburu obari abe eeka ti, iya negen kwe, ninendage abe logorak ti perak, mondok iya o! Nda'nogogurak eyom ti, iya negen kwe, kambuurak eyom perak, iya lombok aret o.

²Nit abok aret nineenik logonuk kambuurak koonak me, Laago lako menggam oome noorak ti iya negen kwe, tabun ndoombunuk wonogwe me noorak ti perak, abu iya me, Nit nineenik wonogwe nogo wone yi, liippogo logowok o.

³Iniki wakkologo nagaatik, iniki obeelom ogo menggaarak me, i'ndok kanggwi ti op negen kwe, Iniki puru ari ti perak, iya o.

⁴It aap iniki warak nen tabun ndoombunuk wonogwe me, inom logorak inikilom mbako menggaarak kwe, Aap iniki lek wi kenok perak, it inale'nggen mbako menggam inom logorak inikilom mbako menggaarak.

⁵Aap iniki lek wi negen nen ndawi ninanep pugu wakwi nit koneniyak ti op negen kwe, Aap iniki warak nen ninaruk wakwi nit liippuurak kenok perak, op lombok o.

⁶It aap iniki lek wi nen i'ndok kanggwi ti, kuwali paga laruwok nduk, Alok kani kunggaatak tubu-tubu ari menggi kwak yogwe me, Ti kunduk we aanom warogo yogwe kage minggirak.

⁷Aap iniki warak nen oone yimbu-lambu eerogo aakumi inawu nenet nugwi paga wi negen aret kunggologwe, Ndi, mage yugu kagak wu kologwe paga inobaabut yuundurak aret eekkologwe, Eeko menggaarak.

⁸Wone alom pilangge ti, aaninggin lombok kwe, irip paga ari kenok ti perak, teeluk aret o. Iniki yungguppegak yuurak ti, op aret kwe, neenu mbakak ari kenok perak, meek aret o.

⁹ Anini wundiyak nogo ti, aap iniki lek wi negen inikime menggerak me, kinanini mbet-mbet wunggak yuurak ti mage o.

¹⁰“Aa'nduk wonogogukwak logowok lak, nonggop nduk ogoorik o,” yinuk, yogwe ti, aap iniki lek nen yogo menggaarak me, kit togop yuurak mage o.

¹¹Iniki warak ti, yate kwak it aap awo oonegen inigen kogwe nogo nen mban kologo logogun o.

¹²Wu nen aakumi obeelom aganake menggi kwak, iniki warak ti nen obeelom ee'ninake menggerak me, Yi wone ndi wone ineenu ariyak paga obeelom eekkoloorak nogo ti, niniki warak unde wonogwe kenok, niniki warak ti nen nineebe liirogon ndegenninake menggerak.

¹³At Ala nen eeke menggerak yi liippinip o. At nen nggolawe eerogo pegetak nogo aap ta nen koonogo puurak mbakop?

¹⁴Ne obeelom logorak ari wage kenok, kinale'nggen mbakwi, Ndi, ne maluk logorak ari wage kenok perak, “Peebi ee'ninaburak nit aakumi nineenu arukwak, Ala nen ne obeelom logorak inom, ne maluk logorak inom, imbirak eerogo pinanegerak kogo o,” yinuk, liippugwi, Eeko logonip o.

¹⁵An aanom warogo neenik wonage logonet, eekwi alom mbere kagagirak nogo yi o. Ambi, aap iniki abu koonak nogo nen obeelom eerit nage logonet kwe, aret kangge, Ndi, ambi, aap maluk mendek nogo nen maluk eerit nage logonet kwe, eenik nggorek wonage, Eekwi iyareegirak ti aret.

¹⁶Togop me, kat kenggaawak lek eekkoloorak mbaken? Lek me, “An abu obeelom lombok logokit,” mbake, Ndi, “Niniki warak ambik lombok eekkolaakit,” mbake, Eeriyak mage o.

¹⁷Kat kambuurak eyom awo kagak, kambuurak mbakendak ya? Lek me, “Maluk lombok eerit nage logokit,” mbake, Ndi, iniki lek wi nen eerit nugwi kwak eerit nage, Eeriyak mage o.

¹⁸Ambit mban porogo logorak mage o. Ata, Keenggi abeenok paga, “Op eeriyak,” porogo logonet, Keenggi abeenok paga, “Op eeriyak lek,” inom porogo logot o. Aap ambi Ala agabiti mbake kenok, wone ambi paga ari nage, wone ambi paga ari nage, eeka'lek oolo kuuri'me aret nage logogin o.

¹⁹O kota ambi it aap ineebe 10 unde wonogwe paga o omaawi negen menggerak kwe, Aap iniki warak ambit nen iniki warak logonet, eerit nage paga ti, at omaawi mondok alik iya negen menggerak o.

²⁰O nggween paga yime aakumi maluk eeka'lek iniki koonak abu obeelom mban eeka wonogolik o.

²¹Kat lombok nen aap alik kugi pulunogo piige nagagindak nogo kat abu keenu me, “Lek o! Kayeloman nen kugi pulunogo pagagerak o,” yogwe nogo karuk konenukwak, Yi wone ndi wone agan nugwi nogo liippuurak mage o.

²³Niniki warak paga nen wone yagarak ti abok aret, “Abet ilik, lek a?” yinuk, liippikit nduk, “Niniki warak lombok eekkola,” mbareegirak mendek meek aret kagagirak o.

²⁴Iniki warak nogo ti nda negen wonage, ndi, abu kiraarak lombok wonage, eerak me, Ta nen kwaakkoorak mbakop? Meek aret me,

²⁵An nen melak togon iniki warak alom inom, “Wone alom yi aret kagi,” mbariyak alom inom, liippege, Alom kwaarit unggwage, mugurok nage, eeke logonet, Maluk eerit nugwi ti, wi eeko mengga kwak eekwi nogo alom inom, iniki lek nen eerit nugwi ti, kumili kwak eekwi nogo alom inom, liippikit nduk, eereegirak.

²⁶Kumi ti, towe nggelok yaga yum tugunik kwak, Iniki nengge ti, keele pugu kwak, Ineenggi ti, mbutigeele paga maarogo piiga kwak, Wonogo menggaarak me, Kanggwi ti aaninggin me, neebi mbake kwe, It kumi ti mendek ti, aaninggin iya lombok me, abu neebi lombok mbake minggirak o. It aap Ala iniki kunik eeko menggaarak kenok, pugume time nggerok yaga'lek mbaganggo menggaarak kwe, It aap maluk mendek perak, kumi inageele pugu ti paga nggelok yi nogo menggaarak.

²⁷Aap wone alom kibingga an nen ari logonet, “An kwaakkagagirak nogo yokkirage yi, liippinip o. Wone alom yi aret kagi, mbarikit nduk, wone ambi liippegak eeke,

²⁸Kwaarit nage kwe, kwaakkaga'lek wonage, eerit nage logonet, Aap seribu wonogwe inenggela'me aap ambiret ambi abu obeelom wonage kagagirak kwe, inenggela'me kwe ambi iniki abu obeelom wonage an koolik o.”

²⁹Wone ambiriluk ambi an kagagirak nogo yi o. At Ala nen nit yi aap ndi aap niniki abe koonak logowok nduk, ogobakkigi'ninabeegerak kwe, nit ninalik nen aret yelawe-nggolawe eekko'net nogo monggoorak o.