Read Western Dani Wone Alom Kibingga 8 Bible Online

Wone Alom Kibingga 8 - Western Dani bible

Wone Alom Kibingga 8

¹Aap iniki warak menggi kwak ta o? Yi wone ndi wone agaatak alom eenu menggerak ta o? Iniki warak nen aakumi inete paga eya eerogo piige, Ndi, inetenggen aagi nogo teretak eerogo piige, Eeke menggerak o.

²Ala enggaanom paga kumbuk mbaneegindak me, aap endagembogut nen wone lengganogo yokkege kenok, oone konembunuk eeke logot o.

³Aap endagembogut owagam nen mbet-mbet wundi nage, at nen iniki mba'nuk mban eeke menggerak me, wone maluk yogwe iigak, inaana'le mbangge, eeriyak mage o.

⁴Aap endagembogut wone lengganogo yorage kenok, “E o,” yinuk, eeko menggaarak me, “Kat nonggop nduk, yagandak o?” yinuk, aap ta nen at yoriyak mbakop?

⁵At wone lengganogo yorage nogo, “E o,” yinuk, eekwi iinok, maluk eeppiyaagin lek o. Aap ambi aaninggin mondok iya oba kwi'ndak wonage kagak, “Wone ti eyom paga yori unggwage,” ndi, “Nonggop eerogo yori unggwage,” eeriyak eyom abok koonak me, ugun-ugun yori unggwageelik o. Aap iniki warak nen perak, ndi eyom paga yori unggwage, ndi, nonggop eerogo punuk, yori unggwage, eeriyak nogo eenu me, at yori unggwage menggerak.

⁷Ko'lu arigin nogo nit yi aap ndi aap nineenggo'lek me, “Ko'lu ndogop arigin o,” yinuk, aap ta nen yori ungguurak mbakop?

⁸Aap ambi iniki nggigik togon wundukwak pippatogo wonage, Ndi, kambukwak, kambuurak eyom ya langgok eerogo pake, Eeriyak meek aret o. Wim nambukwi iigak, “Yonggonggola nanip o,” yorogolik ti kwak, Maluk eerit nogwe iigak, maluk nogo nen, “Kit maluk eekwi nogo abu aret eekotak o,” yinuk, teppiigeelik o.

⁹An nen oonegen abu'me yime, yi wone ndi wone abok aret ti, liippit nage logonet, eekwi iyareegirak ti aret. It aap ando inayuk warak paga panggombunuk, inoreewi maluk eerogo piigwi,

¹⁰it aap maluk mendek kanggwi iinok, nggween taambiigwi, taambiinok wogo logonet, it taambiyareegwaarak nogo nen o alik leenak menggim unggwi nogwe, wundi wogwe, eeko logonet maluk eeko nogogwaarak kagak nogome nen inendage tiyappiinet wogwe, eekwi iyareegirak o. Eekwi iyareegirak ti kunduk, we aanom warogo aret eekwi mbareegirak.

¹¹Maluk eekwi onggo mbet-mbet inoba kwippiiga'lek kenok, aakumi nen maluk eerit noorak mban inikime koonit nugu menggaarak.

¹²Aap maluk mendek ambi nen maluk 100 kuli eerit nage kagak, nda'nagagerak nggorek ari namenggerak kwe, it Ala inagabiti ombako logonet ayuk wuko menggaarak nogo Ala nen obeelom eeppiyaagin lek ti lek, obeelom lombok eeppiyaagin neenu kwe,

¹³it aap maluk mendek nogo ti, Ala eebe paga inagabiti mbakulik me, it obeelom eerogo piige, ndi, inagalu'mak kwak it ndarak abu nggorek eerogo piige, eerigin lek aret o.

¹⁴Ambi o nggween paga yime we aanom warogo age kagagirak nogo yi o. It aap maluk mendek nen eekwi paga eeppiyoorak nogo, aap iniki abe koonak nogo inoba age, ndi, it iniki abe koonak nen eekwi paga eeppiyoorak nogo, it aap maluk mendek inoba age, eeke kagagirak o. Ti kunduk, we aanom warogo liippit ungguurak kagagirak.

¹⁵Togop aret me, aakumi oonegen abu'me wonogo logonet, alik ambi eekwi paga inale'nggen logorak lek o. Ata, inambi nunggwi, inagi nunggwi, inale'nggen wonogwe, ti mban eeko logowak nduk, tiyappege agarik o. Ti eeremenggaarak paga oonegen abu'me ineenik logorak ne Ala nen koonogo piyareegerak nogo paga ligak wuundamo eerit nogo logonet, inale'nggen mban wonage kogo logogun o.

¹⁶Iniki warak alom neenu age, ndi, aakumi o nggween paga yime o liingge oonikiya wu nogo yega'lek eerit mban nogo menggaarak nogo maloppiige, eerikit nduk, liippit unggwage nagagirik,

¹⁷oonegen abu'me yime Ala eeke menggerak nogo abok aret aakumi nen liippuurak meek kagagirak. Aakumi nen inomaawi lek eeginake kagak nonggoti eerogo kwaarit namenggaarak kwe, liippega'lek aret wonogwe, ndi, aap iniki warak nen kunduk, “Liippogoorak o,” yogwe kwe, it kunduk, kaga'lek aret logonet yogwe, eekwi iyareegirak o.