Read Western Dani Wone Alom Kibingga 9 Bible Online

Wone Alom Kibingga 9 - Western Dani bible

Wone Alom Kibingga 9

¹Iyareegirak nogo abok aret ninikime koonit nage logonet, “It aap iniki abe koonak iniki warak ineebe inom, eeko menggaarak inom, abok aret Ala eenggime wonage me, ninabuwa nen wo'ninabigin ilik, eebi nen mbo pinanigin a? nit aakumi nen nineenggo'lek aret wonogo monggoorak.

²Aap iniki abe koonak aap iniki maluk inom, aap obeelom aap maluk inom, aap oba mbeenak aap oba mbeena'lek inom, aap ake warogo wogoga aap ake warogo wogogeelik inom, it abok eeppiyoorak koonak nogo ambit ndak-ndak aret wonage,” kagagirak. Aap obeelom mendek nogo ti, aap maluk mendek ndak-ndak wonogwe, It aap kumbuk mbangga nogo ti, it inagabiti nen kumbuk mbanggulik ndak-ndak wonogwe, Eeko menggaarak o.

³Oonegen abu'me yime yi mendek ndi mendek arit nage logonet, irip paga maluk arit nage kagagirak nogo ti, yi aap ndi aap abok aret inoba ariyak ti, ambit aret. Togop tit kwe, it aap ti, inikime maluk yagabit eerak wonage, ndi, ineenik logonet iniki mbanak eeko mengga kwak eeriyak inikilom mbarit nugwi, eeko nagaatik, kambunuk nogogwam inom ari nogo menggaarak.

⁴Togop aret kwe, singa kanggetak ti, op negen kwe, nggeewo eenik wonage ti perak, op lombok me, aap ambi nen awo eenik wonage logonet, peebi eeppuurak nogo iniki koongge logorak op aret o.

⁵It aap ineenik wonogwe nogo nen kambuurak aret ineenu kwe, It aap kambeegwaarak nogo nen perak, Yi mendek ndi mendek ineenggo'lek wonogwe, It eekwi onggo ambinom koloorak lek aret wonogwe, It inoba kunduk aakumi nen abeka'lek wonogwe, Eeko menggaarak o.

⁶It nen aakumi inabuwa mbakwi, ineebi lombok inombakwi, “It eekwi ti, nit togon eeruwok lak it mban eekwi ao,” yinuk, iniki laakot inombakwi, Eekwi nogo Muk lek eeremenggerak me, Oonegen abu'me yime arit nage nogo abok aret it ambiriluk eeko logogun mondok lek aret o.

⁷Togop aret me, kit eekwi nogo Ala nen, “Op aret o,” yinuk, o yogondak aret kinombake me, kinale'nggen nen kinambi nunggwi, Kinale'nggen paga kinanggur amburu nunggwi, Eeko logonip o.

⁸Kinayum laambu yanggwi negen yikkologwe, Ndi, amburu kinetenggen paga mbenanogo pakwi, Eeko logonip o.

⁹Oonegen abu'me yime we aanom warogo keenik logorak ne Ala nen eeppagareegerak nogo, lek ari nage kagak, at kiniki kunik eeke kakwe nogo kimbirak kinale'nggen mbako logonet, eerit nogo logonip o. Ne aanom warogo kineenik logorak wokkiragagerak nogo lek ari nage kagak eeko logorak punik wonage, ndi, oonegen abu'me yime ligak wuundamo eerit nogwe, eeko logorak nogo ti aret.

¹⁰Kambunuk namenggenom time nen yabu eekwi, eeriyak koonogo pugwi, yi wone ndi wone ineenu arit nogwe, iniki warak eekkologwe, eekulik me, yi mendek ndi mendek abok aret eeriyak kage kenok, keenggi mondok omaawi paga eerit nage logot o.

¹¹Oonegen abu'me yime ambi eeke kagagirak nogo yi o. Inogowa ambik kenok inaa'nduk unggwi nogwe, Aap wakaa'ngget kenok, ineegin tiyak ari, Iniki warak kenok, inambi nunggwi, Iniki ngget kenok, ineenggi warak eekkologwe, Ndi, ineenu kenok, obeelom eeppiigwi, Eekulik o. Ata, ti eeriyak abok aret, “Ti eyom paga ariyak,” agaatak me, age menggerak.

¹²Ndi, aakumi kunduk, ne ti eyom paga, “Ndogop aret ee'ninabigin o,” yinuk, ineenggo'lek aret menggaarak. Yikwe nen, “Nooriyak,” mbaka'lek yum yugume yonggo'nari unggwogwe, Towe keele pugu paga ineebe nggerok yi nogwe, Eeko mengga kwak, Aakumi yini-panip maluk inoba ariyak eyom paga inoba kwi'nage kenok, togop aret ogo menggaarak.

¹³Ndi, oonegen abu'me yime iniki warak nen eekerak ambi maloppege nagagirik, iya mbareegirak nogo mbinini o.

¹⁴O kota mbuuluk paga aap ineebe mbuuluk wonogwe me, aap endagembogut omaawi ambik nen o tebenikit nduk, wanggeppunuk, obaga mbo unggwikit nduk, nggween kinugu eerogo pit laganeegerak.

¹⁵Pit laganeegerak kagak o time aap ambi eenggi lek kwe, iniki warak wonage me, iniki warak nogo paga o kota ti, ili eerogo pereegerak kwe, aap eenggi lek eereegerak ti, aakumi nen, “Aap yi nen aret ninagap ndaki,” yinuk, abeka'lek aret wonogwe iyareegirak o.

¹⁶Iige nagagirik, an nen, “Aap inomaawi ambik ti, iya negen kwe, iniki warak ti perak, mondok iya lombok kagi,” mbareegirak kwe, aap eenggi lek iniki warak nen eereegerak ti, meek eerogo pugwi, ndi, at oone ari nogo aakumi nen konengga'lek mbo pugwi, eekwi iyareegirak o.

¹⁷Aap iniki lek wi negen inarum wonage nen oone omaawi paga ari nogo ti, koneniyak op negen kwe, Aap iniki warak nen oone yanggorogon ari nogo koneniyak perak, op lombok aret o.

¹⁸Wim nambuka yi mendek ndi mendek ti, iya negen kwe, iniki warak nen wone koongga ti perak iya lombok me, O obeelom wonage nogo aap maluk mendek ambit nen a'nggan waganogo pege menggerak.