Read Western Dani Ndawi Iya 2 Bible Online

Ndawi Iya 2 - Western Dani bible

Ndawi Iya 2

¹An ti nggalooli anggen o Taron mendek kwak, Waambi anggen o kobappaga mendek kwak, aret agarik o.

²Waambi anggen yugu alok-palok enggela'me wonage menggi kwak, Kat nore aberogon yi, it komologwe inenggela'me togop aret wonage agandik o.

³Yi eyo ndi eyo eyonggaame wonage enggela'me eyo anggen abe wonage menggi kwak At niniki kunik eebe ti, wologwe tawe inenggela'me togop aret menggerak o. At angguna'me kwi'nariyak ninikilom mbake, At anggen ti, ombat abe lombok kage, Eeke minggirak o.

⁴Laago lakwi me, an wo'neren pani nagaarak wonage, “Niniki kunik yi aret o,” yinuk, wam mbanogo nowagam pani wage, Eekerak o.

⁵Togop aret me, “Nore o,” yinuk, niniki nggilu nirit unggwage logonet, nomaawi lek ee'nake me, Anggur anggen wolonak nenok nomaawi eeruwak nduk eeppanugwi, Eyo anggen abe paga noba tayenogo panugwi, Eeko logonip o.

⁶At eenggi kwaare'nggan paga nanep mbambaninuk wonage, Eenggi abe'nggan paga lamoppaninuk wonage, Eerak kwak agarik o.

⁷O Yerutalem aagalogwe komologwe kit yi wae. Kijang inom, rusa kooli penaame mendek inom, aap inoone yogonok lalok yogo mengga kwak eerukwak, “At iniki kunik imbirak inoba tayok yaga'lek iigak, ninoone yoraagun lek o,” yinuk, kumbuk mbaninip o.

⁸Komologwe kinabulok o! Niniki kunik oone agan wage ti, koneninip o. Puut-puut paga ku'mbo wanggak wage, Puut teberogon paga mbo laganggak wage, Eerit wage yi, kaanip o.

⁹Niniki kunik eeke ti, Kijang kwak, rusa aagaluk kwak, wonage menggerak o. Nawi kobat nabenak unggu'me at eebe mi'ndak wonage, Ena pugagi mbanak me ya managak nage, Eyo karo-karo mbaro-karo aago eno mbanak me enggaanok wonok ari, Eeke ti, kaanip o.

¹⁰Niniki kunik eeke nogo nen wone an yo'nege logonet, “Nore aberogon yi, mi'naru o. Nore abu kigirikwe yi, nawok nen omok o.

¹¹O togwi ambik eeke nogo muk lek age, Mayu wage nogo abu aret mbangge, Eekerak me, kenegen pekket o.

¹²O nggween paga yime anggen laambu yugu kogwe, Ndawi wariyak agaarak me, ndawi wakwi, Ninanggween paga yime towe puume inambe man-man yogo logonet, inoone yogwe konenggwi,

¹³Eyo wuliinggen yikit nduk eeke kogwe, Anggur ambit-mbit warit wage logonet, obari abe wigangge kogwe, eekwi me, Nore aberogon yi, mi'na'nuk omok o. Nore abu kigirikwe yi, nawok nen omok o,” Yinuk, yo'negerak o.

¹⁴Yugum ambe nggaganak puut eegwa'me narowe puume kumaarak wonage me, Kat kenete abu kigirikwe me, keyaakit nen kin age, Koone abu abe me, konenikit nduk, koone ari, Eeke logot o.

¹⁵Nit ninageyo anggur awi yarak ambit-mbit wake me, Mba'ngge nen eyo anggur yarak maluk eerogo pit nogwe ti, piginake, Mba'ngge mbuulogwe ti, piginake, Eeke logot o!

¹⁶An niniki kunik eeke ti, eebe an mendek wonage, Ndi, an neebe ti, at mendek wonage, Eeko ogoorik o. Waambi anggen yugu enggela'me andomba ndegeninake agaarik o.

¹⁷O wiya kubondendok wage logonet, inagalu'mak awo lek eerogo pega'lek kagak, At an niniki kunik yi, iyokan neya wage, Kijang inom, rusa aagalogwe inom, puut tiyak-tebek kagak nggare agan nugu mengga kwak, Mbe agan nowagam wage, Eeruwak lak, “Ao,” mbake agarik o.