Read Western Dani Ndawi Iya 5 Bible Online

Ndawi Iya 5 - Western Dani bible

Ndawi Iya 5

¹Niriluk o. Noreeluk o. An neyabu me unggwi nage, Namendek obari abe kaga kuwak eeke logonet, nggami inom kuwak eerogo pege, Nanggiin ta'mbanak inom, nanggiin amburu inom, nengge, Nanggur amburu inom, nayilak amburu inom, nengge, Eekirak o. Togop me, niniri-ninore yi wae. Mbi nunggwi, anggur amburu nunggwi, ee'nip o. Amburu ndonggorogon nenok, inale'nggen aganake menggi kwak, niniki-kiniki kunik logonet, kinoba ndonggo yuwak nduk eerit nogo logonip o.

²An nogo yege logonet kwe, niniki woonik mban wonage me, Oone ari negen naruk konembunuk, “A puk! Ti an niniki kunik nogo nen tu puk-puk eeke kwa?” mbake neegak, At nen ari logonet, “Niniki kunik eekkake niriluk wae. Kat an narowe puume kwak, koba ambi aga'lek kigirikwe wonage o. An nanobak paga konaananggen luurogo pege, Oonikiya neeruwak paga miin anggen luuke, Eekerak me, tu paa'neyet o.”

³Yo'nege mbaki, an nen, “Nayum abu nggoorogo punuk nonggoti eerogo yikkolage, Niyok abu koorogo punuk, nonggoti eerogo mili eekkolage, Eeriyak mbaken?”

⁴Yoge mbaki, at an niniki kunik eeke nen tungga enoona eenggi mambunuk, tu paarikit nduk lin wake kagak, Niniki ponok-ponok eeke logonet,

⁵At niniki kunik nogo ake tu paarogo pikit nduk, neenik a'nuk, Nggami amburu neenggime nen puk wanggak negen eeke, Nggami ogogwe neenggime nen nggalo agan tungga'nggi agale paga negen labuni nage, Eeke kagak,

⁶At niniki kunik eeke ake tu paarogo pigirak kwe, At eebe eenggi-iyok lek, lek aret agaarak kagarak o. Oone yo'negerak nogo, “Konenikit lak ao,” mbakirak kwe, Mbaganggerak mbaki, an nen kwaakirak kwe, at eebe kaga'lek aret wonage, Wiigirak kwe, oone yo'nega'lek aret wonage, Eekirak o.

⁷Awo eerit nage me, it aap o kota yengget-wangget tum waka nen kwaa'neego nagaarik, An nookwi, namiya timbo eerogo panugwi, It o kota yugum pak wurik arum waka ti nen yum nanobak paga nobakkolaga nogo ndinggologwe, Eekaarak o.

⁸O Yerutalem aagalogwe komologwe yi wae. Kit nen at an niniki kunik eeke nogo kogwe kenok, nonggop yorumunggup o? “Lek o! At kiniki kunik nogo nen kimbirak lambuniyak iniki nggilu ari mban kogoorak, yorugun o, Yinuk, kumbuk mbanogo an yo'ninip o.”

⁹Yi kumi ndi kumi kigirikwe iigak, kat abu kigirikwe lombok yi wae. Yi aap ndi aap iigak, at kat kiniki kunik eeke ti, at nonggop kenok, koone togop ari, Yi aap ndi aap iigak, at nonggop kenok, kumbuk mbaniyak yo'nirage, Eeke agandik o?

¹⁰At niniki kunik ti, Enete teretak wonage, etenggen mbeyo aago tawe wonage, Aap sepuluh ribu wonogwe inenggela'me at tiyanak lombok wonage,

¹¹Anobak mbuti emas at mendek mban kwak wonage, Eeruwak towe ya'ngge-ya'ngge eeruwak mili nogu eerak kwak yoguk-yagak ari,

¹²At enegen ti, towe puume niyo eneeri wungge me, yilak amburu paga ngguu'mo wappunuk, ako tebembunuk enegen aago menggi kwak wonage,

¹³Agandin ti, obari abe eeka yabume yarak kwak wonage, At ambe ti, waambi anggen laambu kwak logonet, oone nggami amburu puk wanggak eeke kwak ari,

¹⁴At obaak ti, mbuti emas paga yugum kere'li-kere'lo eerak kwak abu kigirikwe wonage, At agabolo ti, yugum yebibit meeli anggup paga nabenak kwak wonage,

¹⁵At owak mbelan ti, yugum muuni paga ogobakkigippunuk, iyok mbuti emas paga kwi'ndak menggi kwak wonage, At eebe ti, eyo nggabina yerek-nggorek abu obeelom o Libanon menggi kwak wonage,

¹⁶Oone ari ti, abu abe yanggik-yanggok ari, At eebe paga inom, eerit nage paga inom, abok aret abu aberogon wonage, Eerak menggerak o. O Yerutalem aagalogwe komologwe yi wae. At noreeluk niniki kunik eeke nogo ti aret me yagi o.