Read Western Dani Ndawi Iya 6 Bible Online

Ndawi Iya 6 - Western Dani bible

Ndawi Iya 6

¹Kumi ando iigak inenggela'me abu kigirikwe kat yi wae. At kiniki kunik eeke nogo nggeeme naga o? Ninom kwaarit nawok nen at kiniki kunik eeke nogo tu ngge paga nagaarak o?

²At niniki kunik nogo muk eyabu yarak me nagaarak o. Nage nagaarik, obari abe eeka yarak enggela'me andomba ndegeninabit nege, Waambi anggen mbanit nege, eerikit nduk, nagaarak o.

³An niniki kunik eeke ti, eebe an mendek wonage, ndi, An neebe ti, at mendek aret wonage, eeko ogoorik o. Waambi anggen yugu enggela'me ndomba ndegeninake agaarik o.

⁴Kat ti, kota Tirita kwak abu kigirikwe nore abu aberogon wonage, Kota Yerutalem kwak keebe abu amini mbanak tawe wonage, Eerak me, Aap ineegin warak nen ndiimbu ogop mendaarak ineenggime wonok nogwe iinok, “Wi,” irogo mengga kwak, Keebe togop aret keenok, “Iya,” yinuk, pi wakkake agarik o.

⁵Pe'neege keenok, niniki lek-lek ee'nabit unggwage me, kena logu yu o. Keeruwak ti, kambin puut Nggileyat paga nen ineeruwak yaganak-taganak eerit wambi wogo mengga kwak wonage,

⁶Keyak ti, ndomba ngguu'mo wappiigwi iinok, lagi wogo mengga kwak wonage, Ndomba aagaluk kulu'mbere ndarak me, ambit kobak aga'lek imbirak inaani ndegenak kwak wonage,

⁷Kayum kagandin nobarak ti, eyo delima anggen poorak kwak koolo-koolo aago wonage,

⁸Nendagembogut nakuwi 60 wonogwe, nakuwi luulu wogo 80 wonogwe, Komologwe aap kigin wogonaka'lek ineebe ambik ineenggi lingginiyak meek lombok wonogwe, Eerak menggaarak kwe,

⁹Kat narowe puume kwak koba ambi aga'lek keebe abu kigirikwe alik mbeenak aret menggendak o. Kat kagalo aagaluk ambolom ndakkabeegerak me, kabuwa lombok mbake menggerak o. Komologwe korewologwe nen inigen keenok, “Kale'nggen o,” yinuk, yokkugwi, Nendagembogut an nakuwi abe wogo inom, luulu wogo inom, nogo nen kat tiyappagagwi, Eeko agaarik o.

¹⁰O kilim nagake menggi kwak, tut penengge menggi kwak, oonegen komeninuk lagi wage menggi kwak, Laaluguragan tek kunggun arit nage kenok, pi wako mengga kwak, wage ti ta mbaken o?

¹¹An woromoolome nage nagarik, o kobappaga woromo nogo logonak kero nenegen pekkenet nege, Eyo anggur ambit-mbit wake kero, malenit nage, Eyo delima ayo wake kero, nenegen liippit nage, Eeke logonet,

¹²Aap nggweendo wim eeka nen wim eeri wundi noorak iniki ale'nggen mbake menggi kwak, Nimbirak lambuniyak mbaka'lek neegak yini-panip niniki ale'nggen alik negen ee'nake kagarak o.

¹³Kolaga Tulam mendek yi wae. Mok o! Kiyokan mok o. Ninigen keyaawok nen kiyokan mok o. Kiyokan mok o. Wim aru-ogwe iigak, pin warit oolo unggwogwe kenok inigen mengga kwak, Kit nanonduk kolaga Tulam mendek kinigen wo'naburak mbako ogotik o?