Read Western Dani Ndawi Iya 7 Bible Online

Ndawi Iya 7 - Western Dani bible

Ndawi Iya 7

¹Aap nagawan aput kolaga yi wae. Kiyok ogut yirik irip paga pit nage ti iya o. Aap ineenggi amburu paga mbilak yakaatak inomarip paga yirik mengga kwak, komarip abe tobak aret wonage,

²Kamun ti, niyoowak kuwagaluk kurim paga anggur amburu toolak lek aga'lek menggi kwak pat-pat eerak wonage, Kaanogum ti, mbi kuwak aago kagak, mbato warak yengget-wangget aago kwak wonage,

³Kelak ti, rusa aagalogwe mbere kwak, kijang aagaluk kulu'mbere ndarak kwak, wonage,

⁴Kenggaanok ti, tapi eyak nggorek abinak lan ari kwak wonage, Kenegen ti, tu ngga'nggi Mbatarabim koorok niyo yenggenak Ketiyabon kwak wonage, Kogobak ti, nggayo puut Libanon paga wurik me ena o kota Ndamatik paga wandu aago kwak wonage,

⁵Kanobak ti, puut Karemen tiyanak kwak wonage, Keeruwak ti, aap inendagembogut inayum yawenak kwak wonage, Eerak wonage me, Nendagembogut an nen keeruwak abe kenok, neenggi paga mbenak-mbenak eekkeyoorak mban ee'nake menggerak o.

⁶Kat niniki kunik yi wae. Kat abu kigirikwe mondok aberogon wonage o. At kiniki kunik eeke nogo ale'nggen mbaruwak nduk eeppege nogo ti, mondok iya aret o.

⁷Kat keebe-kobate eyo nggabu kwak tawe wonage o. Anggur anggen luurik yugu kwak, kelak panggo-panggo aago wonage me,

⁸An nen ari logonet, “Eyo nggabu ti paga lagi nage, Anggen luurik yugu ti, mbanogo nengge, eerikit lak, ao,” yinuk, yagarak o. Kelak ti, anggur anggen luurik-maarak yugu menggi kwak wonage, Kambe aagi wungge ti, eyo anggen obari abe kwak wonage,

⁹Ndi, kambe paga keyak mbannake nogo ti, anggur amburu abe kwak wonage, Eerak logowak o. Anggur amburu nogo ti, lek aga'lek at niniki kunik eeke yi, nogo yege kagak kwe, Ambe paga neyak toguk-toguk mban eeke logogin o.

¹⁰An neebe ti, at niniki kunik eeke ake wonage, Ndi, at nen neebe uugwe lombok nombake, Eeko monggoorak o.

¹¹Kat niniki kunik eeke yi, mok o. Kat nimbirak yabume nogwe, Nimbirak tuunggen yarak enggela'me nogo yugwi, Eeruwok nduk nawok o.

¹²Nimbirak kubondendok anggur awi yarak me eyo anggur agarip lagangge, ambit-mbit wake, Eyo delima ambit-mbit wappunuk, anggen yuurak eeke, Eeke kero, liippi nawok o. Nogo logomonggoorik, time nimbirak ninondogowak nik-nik yogo logowok o.

¹³Eeko logonet, iri'ngga elege ndaganaka obari eeka nogo kogwe, Yi anggen ndi anggen ombat abe maan mendek inom, ngget mendek inom, Kat niniki kunik nimbirak nawok nduk teppigirak nit logowam koorok wonage nogo mbanogo nunggwi, Eeko logowok o.