Read Western Dani Yetaya 12 Bible Online

Yetaya 12 - Western Dani bible

Yetaya 12

¹Ne ti eyom paga kit nen yogo logonet, “Kaliku ALA wae. Aa'nduk kanini abet aret ninoba pinanege nagagindak kwe, yogondak nen kanini lek age, Niniki eyak wappinanege, Eeke me, Wa, lombok yokkogo ogoorik o.

² Kat Ala ti, ninagap ndaka aret me, Kat paga panggonak logonet, ninagabiti lek aret ogoorik o. Ninomaawi eeppinanega, ninendawi paga kanep pega, ti, Kat ninogoba Kaliku ALA aret o. Kat ninagap ndareegindak me, ninagap ndaka aret wonage agandik o,” yinuk, at yogo logomunggup o.

³Aap niyo abu nen niyo miin toologo nengge kenok iniki yawe ari menggi kwak, At Ala kinagap ndaremenggerak paga kit togop aret kiniki ale'nggen alik negen eekkinake kaamunggup o.

⁴Ne ti eyom paga kit nen it yorogo logonet, “Aliku ALA, Wa, yogwi, At endage kunogo kinoone nggwok paga yogwi, At eerit wagagerak nogo yi aakumi ndi aakumi inenggela'me yoranet nugwi, At endage tiyanak lombok menggerak nogo wiganogo pit nugwi, Eeko logonip o.

⁵Aliku ALA abu iya lombok eerit wagagerak me, at anep tenok-mbenok yogo logonet, ndawi wakwi, At eerit wagagerak nogo aakumi o nggween paga wonogwe abok aret ineenu eeppiinet nugwi, Eeko logonip o.

⁶Kit o Tiyon monggotak yi wae. At Kikak Nakeelik Alik Leenak kit Iterali kinogoba kinenggela'me wonage ti, mondok iya me, Kiniki ale'nggen nen keekok yogwe, ndawi wakwi, Eeko logonip o,” yinuk, yorogo logomunggup o.