Read Western Dani Yetaya 13 Bible Online

Yetaya 13 - Western Dani bible

Yetaya 13

¹ It o Mbaben mendek eeppiyoorak Ala nen Amot aput Yetaya abinggaanggo paga yoreegerak nogo yi aret.

²“It an nawuri leenogo piigirak nogo wone lengganogo yorage, An nawuri aap wakaa'ngget nen an nanini paga aakumi eeppiyoorak mbake nogo eeppiinok, Ala eegin tiyak yigi o, yinuk, inale'nggen mbariyak nogo wiirage, Eekirak me, Wim eeruwok nduk, puut eerilek paga ndiimbu walok eekwi, Nawim o, yinuk, keekok yogwe, It aap nagawan-nagawan inaru unggwogo menggam unggwit nawok nduk, Kuwak ari woraanip o, yinuk, yorogwe, Eeko logowak o.

⁴Aakumi ambik kuwak eeppunuk, noone-koone yogo mengga kwak o puut-puut paga noone-koone yogwe ti, inaruk o! Yi aakumi ndi aakumi kuwak eeppunuk, An yagibok kat yagibok, yogo mengga kwak aap aakumi inabu'me piinet nogo menggam nen ambime kuwak eeppunuk, An yagibok kat yagibok, yogwe ti, konenuwak o! An Nomaawi Lombok Minggirak Naliku ALA nen it aap wim eeka aago yamboninake agarik o.

⁵An nawuri wim eeka inawi o ndaanda nen wogwe, Nggween irip-irip me nen wogwe, Eekwi iinok, Naliku ALA nanini aakumi eeppiyoorak mbake nogo it nen eeppiyaawok nduk, kuwak eeri wogwe me, It nen aakumi o nggween paga wonogwe abok aret lek eerogo piyaagun o.

⁶ Naliku an ALA nen eeppiyoorak eyom muk panggo yi wagaarak me, inale yikkologwe, Ti eeppiyoorak eyom ti, Nomaawi Lombok Minggirak an nen it lek eerogo piyaagin me, inaleenggu maakkologwe, Eeko logowak o.

⁷An togop eeke mbariminggi, It aakumi abok aret ineenggi-iniyok tanep age, Iniki a'nggan wo'nage,

⁸Inaganak mondok ngginuk ari, Eeko logonet, Kwe ambi aagaluk ndarikit nduk, andi yagan wake menggi kwak andi nen yobak-nggolak yogwe, Inenggali nen inete ogum aago logonet, at ambi pekkagak at ambi pekkagak yogwe, Eeko logogun o.

⁹Naliku an ALA nen o nggween paga yime yi oone ndi oone lek eerogo pege, It aap maluk eeko menggaarak nogo inenggaawak lek eerogo piige, Eeriyak eyom panggoni wage me, Naliku ALA nanini nen alik negen eeppiinet nage, Niniki aagi inombake logonet, maluk eerogo piinet nage, Eeri woroorak ne ti, mondok iya aret mbako logowak o.

¹⁰ Ti eeppiige neegak, Laaluguragan mbogut paga wonogwe inom, Laaluguragan ambit me ninggirik wonogwe inom, Inabinak pinda yogo menggaarak nogo lek age, Oonegen lagi wage nogo apit age, Tut kunduk abinak lek age, Eerigin o.

¹¹It aakumi o nggween paga maluk eeko menggaarak nogo onggo eeppiige, It aap maluk eeka mendek inomaluk onggo inoba kwippiige, Nit iya o, yinuk, wogoppatit nugwi nogo tebenogo piige, Iniki worokot logonet, agan nugwi nogo inomaawi lek eerogo piige, Eerigin o.

¹²Mbuti emas at mendek mban eerak ti, mbuuluk aret wonage kwe, Aakumi ineebe ti, abu lek ambitak negen teppiige, Ndi, mbuti emas o Opit mendek ti, mbuura'luk wonage kwe, Aakumi ineebe perak, abunuk mbuura'luk mban inili eerogo piige, Eerigin o.

¹³Togop me, an Nomaawi Lombok Minggirak Naliku ALA nanini kani kunik negen eeppiyoorak eyom paga Nanini paga eeppiinet nage logonet, mbogut na'ndo-wa'ndo pege, Nggween obaane'me lombok wonage nogo akom ya langgok eerogo pege, Eerigin o.

¹⁴Ti eeke neenok, nggwiya muguren-magaren nugwi kwak, Ndomba ndegeninaka'lek inalik wonogwe kwak, It aakumi togop aret inalitak lombok inowe-inawot wonogwe me iniyokan iya wogwe, Inalitik-inalitak inawi alom paga mbaganit wogwe, Eerugun o.

¹⁵Togop arit wogwe iigak, ineebe niik eerogo wumbiya woraanuk, ndanu eerogo inookwi, Pippiinok, paloowi paga ndegenak-pegenak eerogo inookwi, Eeko logonet,

¹⁶Inapuri awo ngget ndarak nogo inigen iigak taati aret ineebe nibik-nobak eerogo piigwi, Inamendek iname wonage abok aret pup eerogo waganggwi, Inakuwilogwe ugun-ugun aret wuginabit nogwe, Eerugun o.

¹⁷It mbuti perak koloorak mbakwi, Mbuti emas inikilom mbakwi, Eekulik Aakumi Marayi mendek nen it inoori woraawak nduk, inikime nggaganogo piyaagin mbako logonip o.

¹⁸Inomaale paga wologwe tawe polok ati inookwi, Elege ngget ndarak inabuwa mbaka'lek inookwi, Wologwe mbuulogwe kunduk inabuwa mbaka'lek togop aret inookwi, Eerugun o.

¹⁹ Yi aap ndi aap inabu'me piinok menggam meek iigak, O Mbaben ti, abu kigirikwe lombok wonage me, It aakumi Mbaben mendek inale'nggen nen wogoppakwi kwe, O Torom Nggomora lek eerogo pereegi kwak an Ala nen o Mbaben ti, togop aret lek eerogo pigin o.

²⁰Lek eerogo piminggirak me, aakumi o time wonogwe, Ambiriluk ambi ye mbambatinuk mondok wonogwe, It aakumi Arap mendek ya yembanggak nugu logonet inawooliya time wuppatinuk wonogwe, It aap kambin-ndomba ndegeninaka nen inaanggumi inagari'ngga nawak nduk time piinet nugwi, Eeka'lek togop aret kagak Inapuri ndaganabit wundi wogo logogun o.

²¹ It karume nugu menggaarak ndiimbu-nggwiya perak, o time nogo yi unggwi wogwe, It ku agan nugu menggaarak mendek o wuum pugume yebet ari unggwi wogwe, Towe tiyu inawi time eeppatinuk wonogwe, It kambin nggwiya time ku'mbo wanggak nugwi,

²²Mbaben owa'nagat wurik inikime mba'ngge yagu-ndagu agan nugwi, Ndi, aap inowe endagembogut awi abe nggwok wurik inikime time yi nggeewo ndi nggeewo ya'lo-ngga'lo agan nugwi, Eeko logogun o. O Mbaben eeppuurak eyom abu panggo yi wagaarak wonage me, O ti logorak eyom ya langgok eerogo pigin lek aret o,” yinuk, ari kagarak o.