Read Western Dani Yetaya 14 Bible Online

Yetaya 14 - Western Dani bible

Yetaya 14

¹Aliku ALA ari nogo, kage logonet, “An nen at Yakup paga wiganak inabuwa mbake, Napuri Iterali ambinom leenogo piinok, iname wonogogwam logowak nduk, iniyokan piya wage, Eerigin o. Piya woraminggirak wonogwe me, it aap nggiru iya wogwe, At Yakup ombowologwe wiganak inom lambunna'nuk wonogwe, Eeko logogun o.

²Aakumi alik mendek nen it Iterali inanggween wonogogwam iniyokan wogoren piya woraagun o. Piya wogwe iinok, It Iterali Naliku ALA nanggween paga time logonet, Kumi inom, aap inom, inayeloman eeppiinok mengga kwak, It aakumi alik mendek nen togop aret eerogo piigwi, It keele maageren nogogwaarak nogo aret maarogo piigwi, It tebenogo piyareegwaarak nogo aret tebenogo piigwi, Eerugun o,” yinuk, ari kagarak o.

³It aakumi Iterali andi-pandi eeginake, Nonggop eeruwi? yinuk, iniki piirik wonogwe, inoone omaawi yorogwe iinok eerit nugwi, eekwi iinok, Aliku ALA nen iniki tayenogo piyoorak eyom ti paga

⁴aap o Mbaben inowe endagembogut miyuk-meya eerogo pogo logonet, “Aakumi tebenogo piiga yi, koone lek eerogo pagage, Aap iniki worokot yi, komanggen tayenogo pagage, Eekerak me, kenggali o.

⁵It aakumi maluk eeka inawooluwak paga, It aap wone lengganogo yoraga inambim mbanak paga, Iniki aagi paga yi aakumi ndi aakumi nggwiirit-nggwaarit inoorit unggwogwe, Puk aga'lek inanini paga aakumi inanebunu lombok inabu'me piya unggwogwe, Eeko nogogwaarak nogo At Aliku ALA nen inawooluwak ti, kalenogo piige, Ndi, inambim mbanak nogo mbanogo pege, Eekerak o.

⁷Togop eekerak me, it aakumi nggween paga wonogwe abok aret iniki kwi'nogwe, Iniki ugun tayenak logonet inale'nggen mbakwi, Ale'nggen inikime nggelok ari kenok ndawi wakwi, Eeko agaarik o.

⁸Kat tebenogo pagage keenok, eyo kilu-kilu inom, Eyo nggabina o Libanon mendek inom, nen yogo logonet, Kat tebenogo pagagerak kagak, at eyo muuka nen nit nineebe muurogo pinani waga'lek aret agaarik o, yinuk, at yogo logogun o.

⁹Kambunuk nogo menggam nogo nen kat wokkabi wage logonet, iniki ale'nggen mbake, At nen it aakumi nggween paga wone lengganogo yorogo nogogwaarak maan kambeegwaarak nogo Wokkabuwak nduk inogoma ineenik eeppiinet nage, Yi aakumi ndi aakumi inoweewi inendagembogut kambeegwaarak wone lengganogo yorogo nogogwam kwi'ndak wonogwe nogo, Mi'nanip o, yinuk, yorage, Eeke kenok,

¹⁰It abok aret nen inoone nggwok paga kat yokkogo logonet, Nit kokwak age, Ninomaawi lek agaarak kwak, kat togop aret age, Eekendak yimera? yinuk, yokkirugun o.

¹¹Aa'nduk nen kayuk warak abu obeelom mban wonage keenok, kale'nggen kaanok nduk, nggitat eeko nogogwaarak kwe, Yogondak perak, aakumi kambunuk nogo menggam wuppagagerak me, Kabu'na kageyo ndoonak kwak anggolenggen ninggikkakwi, Keebe paga kanogoyum kwak yi puron ndi puron lengganak wonogwe, Eeko agaarik o.

¹² O weege kagak ndowan lan eerogo pega yi, wae. Oonegen komeninuk lagi wage aagaluk wulaga yi, wae. Mbogut paga nen ye agan wambi wagandak me, iya! Aa'nduk yi aakumi ndi aakumi tebenogo piinet nage nagagindak kwe, Yogondak perak, kat aret tebenogo nggween paga wuppagagerak wonage agandik o!

¹³ Kat kiniki nen ari logonet, An mbogut paga lagi nage, An wone lengganogo yorage menggim Ala elaaluguragan inirimbaga lombok tiya yi lagangge, Puut tiyarogon mage menggim kugi kuwak aago menggam time nen an wone lengganogo yorage,

¹⁴An ndugwi irimbaga lombok lagi nage, At Mondok Tiyanak Menggerak nogo an ndak-ndak eekkola lagangge, Eerikit, mbakendak me,

¹⁵Melak togon aakumi kambunuk nogo menggam mbo wuppagage, Mbuun ambe kiiniki paga lombok wuppagage, Eeke kagarak o.

¹⁶Ndi, time wuppagamenggerak wonage me, aakumi nen keego logomenggaarik, inigen loogirit unggwogo logonet, Aap yi, yi o ndi o aakumi inaganak warogo mban agan nage, Aakumi inabu'me piinok menggam iniki mak eerogo piinet nage,

¹⁷O nggween paga yime abok aret karu mban eerogo pit nage, O kota-kota abok aret yigirik-noonom eerogo pit nage, Aakumi keele maarak wonogwe nogo, Kiniyokan nanip o, yoraga'lek piirogo mban wonage, Eeke nagagerak nogo Yi aret agaarak iya! Yinuk, yogo logogun o.

¹⁸Aap inoweewi inendagembogut kanggwi iinok, inayuk wurogo ineebe nggween taambiigo nagaatik, Iniyanggelo wam ambik wako nogogwaarak kwe,

¹⁹Kat perak, eyo eno'mbak maluk kenok pendenogo mbo nappogo mengga kwak, Kat taambagarak kanggween kabunogo pateeginom time kayuk wurogo taambagulik mbuun ambena wuppagagaarak kinom wonage me, It aap karugum inoorak koba lunogo wuppiigaarak kinom wonage agandik o. Aap kanggaatak ineebe paga iniyok pit nogo mengga kwak kat togop aret eerogo pagago agaarik o.

²⁰O kat wonage menggenom maluk eerogo pit nage, Aakumi kat kowe-kawot aret inoorogo piinet nage, Eekendak me, It aap inendagembogut kambeegwaarak nggween taanak wonogwe me kinom taambagagun lek aret o,” yinuk, miyuk-meya eerogo pogo logogun o. “At aap maluk eeka ti, ombowologwe inendage ambi yogo logogun mondok lek o.

²¹Togop me it wologwe ti, mi'na'nuk o nggween ti unde eeppatinuk, inawi kota-kota wurit nogo logonet nggween enete lek eerogo pukwak, Inombomini maluk eeko nogogwaarak paga ugun inoorogo piyoorak o pipuk eerogo pogo logowak o,” yinuk, yoge kagarak.

²²At Omaawi Lombok Menggerak Aliku ALA nen ari logonet, “An mi'nage logominggirik, o Mbaben endage lek eerogo pege logonet, It aakumi eegu yumbunik inom, Inombowologwe inom, it inapuri inom, Mondok inenggaawak lek eerogo piige,

²³Ndi, at Omaawi Lombok Menggerak Aliku ALA nen ambi ari logonet, O Mbaben ti, towe tiyu iname aret aruwak nduk eerogo piige, Purok nuk-ngguk eerogo pege, Eeke logonet, O kota ti, kaliirubu pup eerogo pege, eerigin o,” yinuk, Aliku ALA nen aret ari kagarak o.

²⁴ At Omaawi Lombok Menggerak Aliku ALA nen kumbuk mbangge logonet, “An nen, Yogop eerigin o, yagatak mbeyok arilik a'me aret age, Ndi, eeriyak koonogo pigitak nogo arit nage, Eeke minggirak me, eerigin aret o.

²⁵It Atiyut mendek an nanggween paga wonogwe nogo lek eerogo piige, It an nabuut paga wonogwe nogo niyok aan lebenogo piinet nage, Eyo aaninggin tapi uut paga kwippugu kwak it an napuri aaninggin inoba wonage nogo mbo pege, Aaninggin inuum paga wonok nogo mengga kwak inoba wonage nogo an waganogo mbo pege, Eerigin abet aret yagi o,” yinuk, kumbuk mbangge kagarak o.

²⁶At Omaawi Lombok Menggerak Aliku ALA nen, “Yogop eerikit o,” yinuk, koonogo pereegerak nogo aap ta nen, “Lek o,” yoge, Ndi, eenggi awo nappunuk aret wonage nogo, aap ta nen eenggi yabonogo wuppi wage, Eeriyak mbakop? Mondok lek aret me, At o nggween paga abok aret, “Ndogop eerigin o,” yinuk koonogo pege, Ndi, yi aakumi ndi aakumi eeppiyoorak eenggi awo nappunuk wonage, Eeke nogo ti aret me, eeke agaarik o.

²⁸ Aap endagembogut Akat kambeegerak tahun ti paga Ala nen Yetaya abinggaanggo paga yoreegerak yi aret.

²⁹ “Yawi muun mbanak paga inooko nagaarak kalok yegerak nogo ti, waalo kwak me, Waalo ti paga waalo muuru ndake, Waalo muuru nogo nen aagalogwe ameyo tenak togon eerogo inooka ndaganake, Eerigin me, It aakumi Pilitin mendek abok aret ti, Yawi muun mbanak paga ninooke nagaarak nogo muk kalok yegerak o, Yinuk, inale'nggen mbarugwaarik o.

³⁰It aap an napuri inamendek lek aret kwe, inambi nunggwi, It eekkoloorak meek nogo nen iniki ugun tayenak nogo yugwi, Eerugun me, It inapuri wiganak perak, abok kambit nawak nduk, an nen mbi noogelo inoba kwippiige, It eegu teppiyamenggerak nogo inoorogo piige, Eerigin o.

³¹O omarip paga pa'nggwe nen o kani pegaarak ka'luk lagit wage, Aap inakom niruk yogolik pekkagak lombok aago wogwe, Eekwi me, At Pilitin tungga ambe mbanak ti, ale yikkolage, At o kota ti, oone kwa ari, It Pilitin mendek abok aret ti, inaganak wakwi, Eeko logowak o.

³²It eeppiyamenggaarak nogo aakumi ambi nen, Pegiya nanip o, yinuk, Yoramenggaarak it yora wogwe iinok, It nen onggo ngge yoraagun? Lek o. Aliku ALA nen o Tiyon alom kwippereegerak me, nit at apuri yagan wako nogogurak nogo O time nineebe op logowok nduk, eeppinanggerak, yorogo logogun o, yinuk, ari kagarak me, yokkiragi o,” yoragagerak.