Read Western Dani Yetaya 18 Bible Online

Yetaya 18 - Western Dani bible

Yetaya 18

¹ O Kuti niyo aa'nggi yibagan-enebagan wurin ina'naabit oone mbi-mbi yogwe,

²Kun yiiro mbanak paga aap wone unde niyo kole yenggenak nggaruppegak nawak nduk nappiigwi, Eeko menggam wonogwe nogo, inabuwa o! Kit aap wone mbet-mbet wonok nega yi, It aakumi ineebe yerek-nggorek inagabolo teretak lombok tawe wonogwe, It aakumi nda wonogwe inom, koorok wonogwe inom, nen inayuk wukwi, Aakumi inoone alik inogogumbuk wonogwe, Aakumi inanggween paga niyo ambik nage, Eeko menggam nogome Wone wonok kiniyokan nanip o.

³Kit aakumi o nggween paga wonogwe yi, wae. Kit aakumi yi awi ndi awi monggotak yi, wae. Ndiimbu walok eeka puut-puut paga tiyappugwi iinok, kinigen kogwe, It aap oone nggwok eeka trompet oone pu eekwi iinok, kinaruk konenggwi, Eerumunggup o.

⁴Aliku ALA nen an yo'negerak nogo yi o. “Ti eekwi iigak, mo andi nen ligik-ligak eeko mengga kwak, O kibi kagak anggen mbanggwi eyom paga konaananggen luurogo pit wundi wage menggi kwak, An wonage minggim nabolok lek logonet nenegen wogonake nena wutik logogin,” yo'negerak o.

⁵Ti yo'negerak nogo ti, eyo anggen mbaniyak eyom awo kagak ambit-mbit warak mono-mono wangge nagaatik, ayo wappunuk, Eebe kole age kagak Aliku ALA unggwi wage logonet, Waruk paga engga mononogo pege, Eno'mbak wiganinuk nage nogo mbanogo nappit nage, Eerigin me, Yinuk, yo'negerak o.

⁶Aakumi ti, togop aret inoorogo piinet nagin me, ineebe inoorak logonak nogo ti, Towe enggaanggum nengga puut-puut nugu menggaarak inom, Nggeewo-wam endekem mendek inom, nunggo logowak nduk mbo pugun o. Mbo pemenggaarak me, O omarip paga kibi ari wage kagak towe nogo nunggwi, O ame unggwi nage logonet, togwi nggut-nggut eeke kagak nggeewo-wam endekem mendek nen nunggwi, Eeko logogun o.

⁷Ne ti eyom paga at Omaawi Lombok Menggerak Aliku ALA ake wogori wogo logogun o. Aakumi ineebe yerek-nggorek inagabolo teretak lombok tawe wonogwe, It aakumi nda wonogwe inom, koorok wonogwe inom, nen inayuk wukwi, Aakumi inoone alik inogogumbuk wonogwe, Aakumi inanggween paga niyo ambik nage, Eeko menggam nogome nen Ala ake wonok at Omaawi Lombok Menggerak Aliku ALA endage kunogo yogo menggam Puut Tiyon paga wogori wogo logogun o.