Read Western Dani Yetaya 19 Bible Online

Yetaya 19 - Western Dani bible

Yetaya 19

¹ O Metit mendek eeppiyoorak Ala nen abinggaanggo paga yoreegerak nogo yi aret. Ndugwi mbe agan nage ti paga Aliku ALA kwi'na'nuk o Metit nage yi, kaanip o. It Metit mendek inagugi ogut aago nogo inaganak wake, It aakumi Metit mendek iniki ma'nage, Eeko agaarik o.

²“O Metit it-it aret ogooppunuk wim eeruwak nduk eerogo piyaminggirak paga It inoweewi nen inawuri inom aret wim nambukwi, It inoreewi inom wonogwe nen inom wonogwe aret inom wim nambukwi, O kota ambi nen o kota ambi inom wim nambukwi, At ambi abu'me piinok menggim nen at ambi abu'me piinok menggim inom wim nambukwi, Eerugun o.

³It aakumi Metit mendek iniki ma'naremenggerak me, Eeriyak koonogo pemenggaarak nogo an nen eeriyak meek aret eerogo piyaagin o. Ti eerogo piige neenok, It inagugi nen yeenggwaaraawak nduk nggino yogwi, Aap kugi unde nen yoraawak nduk yorogwe, Tili pagangga nen yoraawak nduk, yorogwe, Aap inogoma wiiraga nogo yorogwe, Eeremenggaarak kwe,

⁴It aakumi Metit mendek ti, aap nggwok ogogun ambik nen oone omaawi paga yorage logowak nduk eenggime piyaminggirak me, Aap endagembogut anini ambik nen wone lengganogo yorage logogin o,” yinuk, At Omaawi Lombok Menggerak nogoba Aliku ALA nen yegerak o.

⁵Niyo Nin wage nogo poro agan wangge, Nage menggim woloonogo pemenggerak me, kalek-ndinduk nage,

⁶Niyo Nin elaganggen obari arit nage, Mbinik-mbenak wangge nagaatik, poro agan lek age, Aa'nggi paga piinde mbereewak wonage nogo mbuk arit nage,

⁷Iri'ngga niyo Nin amburom paga lagangge nogo engga nggono-nggono wangge, Eerigin o. Ndi, aa'nggi paga yarak nogo mbuk age, O wiya nen wonok nage, eeke kenok, Ngga yarak wonagaarak negen lek aret arigin o.

⁸It aap ikan wagangga nen, “Ao,” mbakwi, It ikan waka keele niyo Nin inikime mbo mambega nen iniki wakkologwe, Yum ikan yonggo'naga niyoome mbo mambega nen kunduk iniki wakko'net unggwogwe,

⁹Nggem negen aan waka nen, “Nonggop eeruwi?” yinuk, iniki piirik wonogwe, Ligi yawenak paga yonggon-yonggon yaka nogo kunduk iniki maluk age,

¹⁰It aap yum penggaaka nen iniki puru ari, It onggo kolaawok nduk, yabu eeka nen iniki andi age, Eeko logogun o.

¹¹It o Towan mendek inoweewi nagawan nogo abe aap lek wi lombok wonogwe, It aap iniki warak Pirawun owa'na nigaka nen iniki lek negen agan nugwi, Eeka nogo nen, “Nit aap niniki warak mendek aret o. O aa'nduk lombok ninombomini inendagembogut inawone unde nit aret ogoorik o,” Yinuk, aap Pirawun nonggop togon yoriyak?

¹²Togop me, kat aap Metit inowe nggwok yi wae. Kawuri iniki warak kowa'na nigaka nogo nggeeme wonogwe? At Omaawi Lombok Menggerak Aliku ALA nen o Metit eeppuurak koonogo pereegerak nogo, It ineenu kero yokkiruwak o!

¹³It o Towan mendek inoweewi nagawan nogo aap wi negen ogwe, It aap Membit mendek inoweewi inambokan laganogo piigaarak wonogwe, O Metit inanebunu lombok it paga panggonak nogo nen inawuri nomoniren nogwe, Eekaarak me,

¹⁴At Aliku ALA nen iniki wi eerogo piiga inikime mambiyareegerak kenok, Naalop-kaalop koonit nogwe paga Aap ambi kumili aganaka amburu nenok, peyak wuke nagaatik, peyak wurik paga lagak-mbagak ari menggi kwak, It aap ti nogo nen it o Metit mendek togop eeko logowak nduk, eerogo pigaarak me,

¹⁵It aap Metit mendek inirimbaga menggaarak ilik, inabu'me menggaarak a? Inendage warak ilik, inendage lek a? It ambi nen o Metit obeelom eerogo puurak meek aret kaagun o.

¹⁶Ne ti eyom paga it aakumi Metit mendek nen at Omaawi Lombok Menggerak Aliku ALA aaninggin inoba piyaakit nduk, “Ndime eeri nanip o,” yinuk, eenggi titik irage inigen kogo logomenggaarik, kumi inogut nggigik yinuk, iniki ma'nage menggi kwak, it togop aret eeginabigin o.

¹⁷O Yekura mendek eeppiige paga it aap Metit mendek inamineeri ne agan nage logogin o. At Omaawi Lombok Menggerak Aliku ALA nen it eeppiyoorak koongge paga yi aakumi ndi aakumi abok aret o Yekura endage kunggwi iinok, inagabiti lombok mbako logogun o.

¹⁸Ne ti eyom paga o Metit kota 5 nogome it Kanan inoone paga yogwe, “At Omaawi Lombok Menggerak Aliku ALA ti, nit ninogoba aret o,” yinuk, kumbuk mbanggwi, eerugun o. Ndi, o kota 5 nogo ambit-ambi endage, “Oonegen Agota o,” yinuk, yogo logogun o.

¹⁹Ne ti eyom paga mban Aliku ALA ake warogo wogogak o Metit oolo muundak ogobakkigirik wonage, ndi, o Metit nggween kuli mbanak paga, “Aliku ALA ninom wonage,” ineenu agak yugum ogobakkigirogo mippugu wonage, eerak logogin o.

²⁰Yugum o Metit ogobakkigirogo mippugu nogo ti, at Omaawi Lombok Menggerak Aliku ALA inom wonage abeko logowak nduk pugu wonage me, it aakumi nen tebenogo piigwi iinok, yeenggwaaraawak nduk, inoone nggwok paga Aliku ALA yogo mbaremengga, Aliku ALA nen inagap ndaka omaawi ambik ambi nappi wage kenok, at nen aret inagap ndarogo piyaagin o.

²¹Aliku ALA nen aakumi Metit mendek at eeke menggerak ineenu aruwak nduk, nigiya wage kenok, ne ti eyom paga it nen, “Aliku ALA ti, nit ninogoba aret o,” yinuk, alut eeko logonet, ake warogo wogogwi, yi mendek ndi mendek wogogwi, “Yogop eeko logowok o,” yinuk, Aliku ALA endage paga kumbuk mbanggwi, ndi, kumbuk mbanemenggaarak nogo ndak-ndak aret eekwi, eeko logogun o.

²²Aliku ALA nen iniki koonnaruwak nduk andi inoba piige, ndi, andi eerogo piyamenggerak nogo, ti'nuk, obeelom eerogo piige, eeke mbaremenggi, inomaluk mbo punuk, Aliku ALA owagam wa'nuk, tamban eekwi iinok, at nen aruk konengge, obeelom eerogo piige, eerigin o.

²³Ne ti eyom paga o Metit nen o Atiyut nogo logorak tu nggwok arigin me, it Atiyut mendek nen o Metit nogwe, ndi, it o Metit mendek nen o Atiyut wogwe, eeko logonet, it Metit mendek inom, Atiyut mendek inom, inom a'nuk, Ala alut eeko logogun o.

²⁴Ne ti eyom paga it Metit mendek inom, Atiyut mendek inom, eekwi paga aakumi o nggween paga wonogwe nogo inale'nggen kogo logogun me, it Iterali inom eekwi paga kunduk, inale'nggen kogo logogun o.

²⁵At Omaawi Lombok Menggerak Aliku ALA nen ale'nggen inoba piige logonet, “Kit an napuri o Metit mendek inom, kit an neenggi pugu Atiyut mendek inom, kit neyate kwak niniki kundugu napuri Iterali inom, nale'nggen kinoba pinagagi o,” yinuk, yorage logogin o.