Read Western Dani Yetaya 21 Bible Online

Yetaya 21 - Western Dani bible

Yetaya 21

¹Niyo Laut Aa'nggi Paga O Karume ariyak abinggaanggo paga Ala nen yoreegerak nogo yi aret. O ame pa'nggwe nen wiya nombok-kombok warit wage menggi kwak, O inamineeri nage menggim karume nogome nen aap ambi awuri inom aago wogo agaarik o.

²Nagabiti mbariyak mendek nabinggaanggo paga yo'negerak yi aret o. Nggaganagalo nen kurumbi wonok nage, Kugun wagangga nen kugun wonok nage, Eeke kagarak o. Aliku ALA nen, “Kit wim nambuka Elam mendek yi wae! Wim eeri unggwogwe, Kit kineegin warak Marayi mendek yi wae! Inawi paga kwi'nari unggwogwe, Ee'nip o! It Mbaben mendek nen aakumi tebenogo piigwi iinok, inoone, Ai-ao, yogwe nogo, An lek eerogo pigin o,” yinuk, yorage kagarak o.

³Ti yorage kage nagarik, kumi elege ndaruwok nduk andi yagan wako mengga kwak, Neebe andi lombok ee'nake, Eeppiyoorak konenggirak nogo paga niniki ndenggak ari, Nenegen kagarak nogo paga niniki ma'nage, Eekerak o.

⁴“Iya!” yinuk, niniki lek-lek ee'nake, nagabiti nen naganak wake, Eeke kenok, Nogo yikit nduk, o mbet-mbet kiip aruwak lak, ao, mbake minggirak nogo, Yogondak o kiip ari wage paga nagabiti nen namineeri ne agan nage agaarik o.

⁵It aakumi ti nogo nen mbi noorak ndoonogo pit nogwe, Kwi'nariyak kere'ngga ndoonogo pit nogwe, Eeppunuk, Mbi nunggwi, niyo nunggwi, eekwi me, “Kit aap wim eeka inoweewi yi, Pilak yinuk, kinawooluwak nggiginogo abin wakwi, Kinarin mbiganogo pugwi, Eeko logonip o,” Yinuk, yini-panip yorage kagarak.

⁶Ti kage mbaki, nogoba Ala nen an yo'nege logonet, “Aap ambi nggayo logowak nduk, leenogo pi nak o. Leenogo pi namenggendak tum wake enegen kere ari wonage me, Kuda mbere'mbo nggweendo wim eeka nikkenok wogwe, Keledai inamborowak paga kwi'na'nuk wogwe, Unta inamborowak paga kwi'ndak wogwe, Eekwi enegen liippiinok, Mbet-mbet yokkiri woraawak o.”

⁸Yo'nege mbaki, nappigirak nggayo paga enegen wonage nogo nen oone nggwok paga ari logonet, “Nogoba o. Wim wogwe iyo, o liingge kulinik-kalinik nggayo ndoonak paga nenegen a lagangge, Oonikiya ko'lu-kii'me wu nogo yega'lek nenegen mban wonage, Eeke logonet, Ambi wogwe nenegen iigeelik kwe,

⁹ Yogondak perak, it aap inaguda mbere'mbo nen inanggweendo wim eeka nikkenok wogwe nenegen iigi o. Nenegen iige nagarik, Kit taani o? yorage mbaki, it nen an yo'nogo logonet, Lek o. O Mbaben nogo muk lek aga o. Lek aga o! Inalut eeko menggaarak inagugi ogut aago nogo nggween paga yigirik-noonom ma'naga, yo'negaarak me, yokkigi o,” yinuk, yo'nege kagarak o.

¹⁰Togop me, gandum anggen mbanak nggorak wako mengga kwak eerogo pinagareegwaarak kit an napuri yi wae. At Omaawi Lombok Menggerak Iterali inogoba Aliku Ala nen yo'negerak konenggirak nogo ti aret yokkiragi o.

¹¹O Oone Lek Menggim ariyak abinggaanggo paga Aliku ALA nen yoreegerak yi aret. Aap ambi o Teyit nen oone nggwok paga an yo'nege logonet, “Kat aap tum waka yi, wae. O weega'lek kagak oonegen mande ari nagin? Kat aap tum waka yi, wae. O awo weega'lek kagak oonegen mande ari nagin?”

¹²Yo'nege mbaki, an tum waka nen onggo yoge logonet, “Lek o. O weerigin aret kwe, o kiip ari woraagin o. Ndi, kat kin wo'neyoorak mbake kenok, ambinom kin wo'neya wa'nu o,” yinuk, yoge kagarak o.

¹³O Arap mendek eeppiyoorak abinggaanggo paga Aliku ALA nen yoreegerak nogo yi aret. Aap luurik-maarak aago nega kit aap Nderan mendek yi wae. O Arap wonogo menggam eyoongga ku'mbanak me ooliya wuppatinuk kumaarak logonip o.

¹⁴Ndi, kit o Tema monggotak yi wae. It aap wim nambuko logonet, inawooluwak ayuk paga, Inomaale nggiginik ayuk paga, Ineegin agale yomo aago wurik ayuk paga, Wim nambukwi iigak-iigak naga inayuk paga, Kole mbagani wagaarak ti, Niyo abu wonogwe me, niyo toologo ira wunggwi, It aap wim o wunik wagaarak wonogwe ti, woppiinok kinambi wogora nogwe, Eeko logonip o.

¹⁶Nogoba Ala nen an yo'nege logonet, “Tahun ndogop eeppunuk wondet eerogo pagagin o, yinuk, aap ambi nen ayeloman yoge kenok, ayeloman nen eenggi liirogon linggingge menggi kwak, tahun yi awo eeka'lek kagak, o Kerat endage tiyanak, Wi! ugwi nogo lek aret arigin o.

¹⁷Ndi, it aap ineegin warak wakaa'ngget Kerat mendek yumbunogo ambitak mban teppiyaagin o,” yinuk, at Iterali inogoba Aliku Ala nen aret yegerak me yagi o.