Read Western Dani Yetaya 23 Bible Online

Yetaya 23 - Western Dani bible

Yetaya 23

¹ Aakumi Tirut mendek eeppiyoorak abinggaanggo paga Ala nen yoreegerak nogo yi aret. “It yiiro o Taritit nen wonok waga ti, Yiiro paga iname o Tirut wogwe me, aakumi nen, Wologwe! O kota Tirut nogo lek eerogo pogo logonet, kinawi wurik inom, kinayiiro paga yinggak-unggwagak eeko monggo'nom inom, lek aga o, yinuk, O Kitim nen konenggaarak nogo ti, abet aret me, inale yikkologo logowak o.

²It inawi niyo aa'nggi paga menggaarak inom, It yiiro wonok nega nen ineenggi warak eeppiyoorak yi mendek ndi mendek kungga o Tiron mendek inom, nogo ti, Iniki aaninggin nen inoone lek puk logowak o.

³O Tikot nen gandum yiiro paga wonok niyo nggwok obate nggaruppegak ira wogwe, Niyo Nin aa'nggi paga nen gandum anggen mbanak it aakumi time mendek kunggo logowak nduk ira wogwe, Eeko nogogwaarak paga It aakumi inanebunu lombok kunggologo menggam agagerak kwe,

⁴It o Tiron mendek ti, It mulunogo piiga laut nen wone ambi yegerak me, inenggali aruwak o. Niyo nggwok yenggenak laut nogo nen ari logonet, An nen yagan wake logonet, elege ndaganake, an nen wologwe inom, komologwe inom, tawe eeginake, Eekeelik kagi, yegerak o.

⁵It aap Metit mendek kunduk, O Tirut muk lek eerogo pegaarak o, yogwe nogo Inaruk konenggo logomenggaarik, inagabiti nen inaganak wako logogun o.

⁶It inawi niyo aa'nggi paga menggaarak ti, Inale yikko'net mbet-mbet o Taritit nawak o.

⁷It o maan aa'nduk lombok nen inawi kota time logonet, Inale'nggen paga ugun-ugun eerit nugwi, Inapuri o nda time ye mbambatinuk logowak nduk, nappiigwi, Eeko nogogwaarak kwe, Yogop aret agaarak ya?

⁸It iya wogwe nogo iniki ale'nggen mbaruwak nduk eeppiiga, It aap toko unde, Aap nggwok o, yinuk, inayuk wuruwak nduk eeppiiga, It aap yi mendek ndi mendek kungga o nggween paga inendage tiyak yuwak nduk, eeppiiga, O kota Tirut menggaarak aret kwe, Aap ta nen inawi kota Tirut tebenogo puwak nduk, wone amburu mbanggerak mbakop?

⁹Lek o! It aakumi eerit nugwi paga inendage tiyak ari kenok, wogoppakwi nogo abok aret tebenogo piige, It aap o nggween paga inendage warak wonogwe nogo lek eerogo piige, Eerikit nduk, Nomaawi Lombok Minggirak Naliku an ALA nen aret koonogo pege nagarik, lek eerogo pigirak o.

¹⁰O Taritit Aagalukwe kota Tirut ti, Yiiro yinggak-unggwagak eeko menggam lek agaarak me, Inanggween paga yabu eeko logowak o.

¹¹Naliku an ALA nen niyo nggwok yenggenak laut nogo paga neenggi nappege neenok, Yi aakumi ndi aakumi inabu'me piigo menggaarak inaganak warit nage, Wone lengganogo wumbege neenok, o Kanan yugum pak wurik nogo langgu-langgu wangge, Eekerak o.

¹²O kota Tiron Aagalukwe Aap Kigin Waka'lek tebenak wonage ti, O time ale'nggen paga ugun-ugun eerit nage nagaarak nogo lek agaarak o. Lek agaarak me, aret pipuk eekko'nok, o Kitim time nawak o. Time namenggerak kwe, time kunduk ale'nggen kage logogin lek aret o.

¹³It aakumi inendage lek agaarak wonogo menggam o Mbaben ti, ket o. Aakumi Atiyut mendek nen ndiimbu-nggwiya karume nugu menggam time it iname aruwak nduk, eerogo pege logonet, Oonda mbani ungguwok nduk, nda'nggi pit laganuk unggwi nogwe, Yi o ndi o abe wurik nogo yinik-minik eerogo waganggwi, Eeko logonet, Irip ando yumbunik-telenak eerogo pereegwaarak nogo o!

¹⁴Togop me, it o Taritit nen yiiro wonok waga ti, Ineebe op wonogo menggam nogo lek eerogo pegaarak me, inale yikkologo logowak o.

¹⁵O Tirut eeppuurak yagarak nogo eeppunuk, aap endagembogut ndarak kagak tahun ambik ari nage menggi kwak, o Tirut kobak aremenggerak kagak, tahun 70 aret ari nagin o. Ndi, tahun 70 eeppunuk, kwe ya wukak endawi pugu ndak-ndak o Tirut ariyak nogo yi aret.

¹⁶Kwe ya wukak kobak eerogo mbo pagagaarak yi wae. Nggitat woppunuk, o kota yengget-wangget nege, Koba abekkabuwak nduk, nggitat obeelom mban eeke logonet, ndawi wakak mban eerit nage, Eeke logot o, yinuk, yogo mengga kwak, o Tirut ariyak nogo ti aret.

¹⁷Ndi, tahun 70 abu aret eeke kenok, Naliku ALA nen o Tirut liippege neenok, aa'nduk yi mendek ndi mendek kunit nage nagagi kwak eerit nage, aa'nduk yi aakumi ndi aakumi inabu'me piigo menggam o nggween paga yime yi mendek ndi mendek kunggolaawak nduk, wogoranet nage nagagi kwak eeke, eerit nage logogin o.

¹⁸Ti eerit nage logonet kwe, at yi mendek ndi mendek kunit nage paga nabenggolage inom, onggo kolage ando inom, ti elaambirik porogo wonage, ili ari wonage, eeka'lek Naliku ALA nake leenogo pege, Naliku ALA nenggaanom paga nake eeka nen inambi ndak aret nunggwi, inayum abe kunggologwe, eeruwak nduk, inake piige, eeke logogin o,” yinuk, ari kagarak me, yokkiragi o.