Read Western Dani Yetaya 24 Bible Online

Yetaya 24 - Western Dani bible

Yetaya 24

¹“At Aliku ALA nen nggween yi maluk eerogo pege logonet, mbuk eerogo pege, Aakumi logorak meek eerogo pege, Eerigin abet mbako logonip o. Nggween ena abut laganogo pege logonet, it aakumi o yime menggaarak nogo mappiyaagin.

²Ti eeke logonet, It Ala unde eeppiige nogo, aakumi we ugun mendek ndak-ndak eeppiige, Inogobamini eeppiige nogo, inayeloman mini wologwe ndak-ndak eeppiige, Inagalomini eeppiige nogo, inayeloman mini komologwe ndak-ndak eeppiige, It kunggwi eeppiigwi nogo, it kunggologwe ndak-ndak eeppiige, It luulu nggino yorogwe eeppiige nogo, it porogo wonogwe nogo ndak-ndak eeppiige, It nomat waganggwi eeppiige nogo, anomat mbanak ndak-ndak eeppiige, Eeke logogin o.

³O nggween yi, abu maluk eerogo pege, Iri'ngga-kale'ngga mondok lek eerogo pege, Eerigin o,” yinuk, at Aliku ALA nen wone ti yegerak me yagi o.

⁴O nggween yi mbuk age logonet iri'ngga teebat niyo eerogo pege, Aakumi andi nen yagan wako mengga kwak, o yi yagan wake logonet, nenoorit unggwage, It aap nggween paga inendage abu tiyanak wonogwe nogo ineebe ndeyak aganabit unggwage, Eeke kagarak o.

⁵It aakumi o nggween paga wonogwe nogo nen, Wone, “Yogop ee'nu ndogop ee'nu,” yugu nogo eeka'lek mbo pugwi, Wone lengganogo yoragagerak nogo taganogo pugwi, Mondok-mondok eeko logowak nduk, wone abuk nggaruk togon koonogo pereegerak nogo piinogo pugwi, Eekaarak paga O nggween yi, maluk agaarak wonage agaarik o.

⁶At Aliku ALA nen nggween yi pulunogo pegerak paga lubu yaga'lek mbuk arit unggwage, It aakumi maluk eekaarak paga aaninggin inoba age, Eerak aret wonogwe me, It aakumi o nggween paga wonogwe yi, kani nen nenet nagaarak me, ineebe mbuuluk aret wonogwe iigirak o.

⁷Eyo anggur aro nogo, mbuk arit unggwage, Anggur amburu ngget toolak porok agan unggwage, Inale'nggen nen amburu noorak mbakwi nogo lek kenok, Ai-ao, yogwe,

⁸Iniki ale'nggen nen lobale eekwi nogo lek age, Aakumi inale'nggen nen kuwak eerit nugwi nogo inoone nggobo agan wangge, Ndi, iniki ale'nggen logonet, nggitat eekwi nogo oone lek age, Eeke kagarak o.

⁹Ndawi wako logonet, niyo anggur amburu nunggwi nogo ambinom nengga'lek wonogwe, Niyo omaawi mendek nunggwi nogo ale ambik kogwe, Eekwi iigirak o.

¹⁰O kota ti, maluk eerogo pit nagaarak wonage, Inawi lombok tu omaawi narogo pit nagaarak wonage, Eerak kagarak o.

¹¹Anggur amburu lek agaarak me, “Wo'niraanip o,” agan tu nggwok paga nugwi, Inale'nggen mbarit nugwi nogo lek age logonet, iniki aaninggin ndugu agan wangge, O nggween paga ale'nggen inikime nggelok ari logonet agan nugwi nogo mondok lek age, Eeke kagarak o.

¹²O kota nogo mondok maluk eerogo pugwi, Tu unggwogo menggam pak mbanak inom abok aret yigirik-noonom eerogo pugwi, Eekwi iigirak.

¹³Eyo tayitun anggen yawi lombak mbanggwi iinok, ambitak kagak nggaru-nggaru wambit wage menggi kwak, Anggur anggen yegetak mbanit nogo logonet, ambitak teppogo mengga kwak, O nggween paga yime yi aakumi ndi aakumi inenggela'me togop aret eerogo piyaagin o.

¹⁴It aap teppiyaagin nogo nen inoone nggwok yogwe, Iniki ale'nggen nen ndawi piyanggwi, It aap oonegen kilu yi nage menggim pa'nggwe nen, “Aliku ALA iya o,” yinuk, pi warit nugwi, Eekwi iinok,

¹⁵It oonegen lagi wage menggim pa'nggwe wonogwe nogo nen Aliku ALA endage tiyappugwi, It niyo laut aa'nggi paga wonogwe nogo nen Iterali inogoba Aliku Ala alut eekwi, Eeko logowak o.

¹⁶“At mondok abe koonak mban eeke menggerak me, ayuk wuko logowok o,” yinuk, O nggween irip yobok paga nen ndawi wako logonet, inoone nggu-nggu yogwe konenggo ogoorik o. Togop aret konenggwi kwe, an nen ari logonet, “Neebe wono eerogo panege, neebe mbuuluk eerogo panege, Eeke me, nabuwa o! It aakumi inambokan lagangga nen aakumi inambokan laganggwi, Aakumi inambokan laganggwi iinok, it aakumi inambokan lagangga nen aakumi alik inambokan laganggwi, Eeko agaarik,” yagarak o.

¹⁷Kit aakumi o nggween paga wonogwe yi wae. Kinamineeri ne agan noorak mendek ari wage, Labu pugu ambe pan ari wonage, Yilungginaburak keele pugu wonage, Eerak aret agaarik o.

¹⁸Kinamineeri ne agan noorak oone ne ari kenok kole mbaganggo logonet, labu pugume wambit nogwe, Labu pugume nen lagit nanuk mbaganggo logonet, keele pugume nggelo-nggelo nogwe, Eerumunggup o. O mayu mbogut paga tu narak wonage nogo kuurogo wuppi wage, O nggween alom yarak nogo ndipuk eeke,

¹⁹Nggween yi abok aret yigirik-noonom eerogo pege, Nggween oolo nggoguk ari, nippegak-wuppegak eeke,

²⁰Aap amburu kumili aganaka nengge nagaatik, neyak-kweyak agan nege menggi kwak nggween yi togop aret eeke, Ooliya yiluk-yiluk wurik me, o wiya wage logonet, na'ndo-wa'ndo eeke menggi kwak nggween yi, togop eeke, Eeke kagarak o. It aakumi Ala wone yugu, “Nineebi o,” yinuk, maluk eerit nugwi inomaluk aaninggin nen O nggween yi aambirak togon wambigin me, obaane'me ari lagi woraagin mondok lek aret o.

²¹Ne ti eyom paga at Aliku ALA nen it inomaawi ambik mbogut irimbaga menggaarak nogo aaninggin inoba piige, Ndi, it o nggween paga yime it aakumi nggween paga mendek inoweewi inendagembogut nogo aaninggin inoba kwippiige, Eerigin o.

²²Aap keele maarogo mbuun ambena wuppiigo mengga kwak It togop aret keele maarogo piigo menggam mambiyamenggerak wonogwe iigak, Maluk eeppiyoorak eyom ari wage kenok, maluk onggo inoba piyaagin o.

²³At Omaawi Lombok Menggerak Aliku ALA o kota Yerutalem puut Tiyon logonet, Endagembogut a'nuk wone lengganogo yorage, Aakumi at apuri inoweewi nen at abinak kwindagala aago logonet eerit nage inigen kaawak nduk eeke, Eeke kenok, Tut nogo nen, “Nabinak mbuuluk me nagabiti o,” ari, Ndi, mo nen, “An nenggali aga o,” yinuk, ari, Eerugun o.