Read Western Dani Yetaya 25 Bible Online

Yetaya 25 - Western Dani bible

Yetaya 25

¹Kaliku ALA wae. Kat nogoba Ala aret o. Yoraga'ndak mondok a'me liirogon eeke logonet, Eerubok mendek iya eeriyak maan aa'nduk nen koonogo pereegindak nogo muk aret eekendak me, Kalut eeke, kendage tiyappege, eeke agarik o.

²O kota nogo yigirogo pegendak yugum kalo logonak wonage. O kota yugum pak wurik wonage nogo yigirik-noonom eerogo pegendak o. Ndi, it aap inendagembogut inawi abe nggwok it aap inambik nen wurogo pit nogogwaarak nogo, muk lek eerogo pegendak me, Wuka'lek mondok togop aret logogin o.

³Ti eerogo pegendak paga yi aakumi ndi aakumi inomaawi ambik mendek nen kat kalut eekwi, It aakumi inogogun ambik mendek inawi kota-kota wonogwe nen kunduk, kat kayuk wukwi, Eeko logogun o.

⁴Aakumi it nen eekkoloorak meek mendek nogo ineebe op logowak nduk, inarum wonage, It aap ineenggi lek mendek nen, “Nonggop eeruwi?” yinuk, lin wakwi nogo kat nen ndegeninake, Eekendak o. It aap iniki worokot linik inanini ti, O mayu woroorak eeke logonet, wiya omaawi wake menggi kwak, O karume mo tele-tele ari menggi kwak, Togop aret menggaarak me, O mayu nen inooke kero, ooliya wurik kwak eerogo piige, Mo andi inooke kero, ngguna'me eerogo piige, Eekendak o. It aap inambik inoone ya-kwa agan nugwi nogo inoone lek eerogo piige, Mo andi keket ari me, ndugwi lamunogo pege menggi kwak, It iniki worokot linik logonet, inale'nggen nen ndawi warit nugwi nogo inoone mbanogo piige, Eeke menggendak o.

⁶“Puut yi paga Nomaawi Lombok Minggirak Naliku ALA nen yi aakumi ndi aakumi abok aret Inake yi mendek ndi mendek ombat abe lombok anggur kole agaarak amburu toolak inom, Amok enggaanggum ta'mbanak inom, Anggur amburu at mendek mban toolak inom, Pipuk eerogo pege,

⁷Puut yi paga yi aakumi ndi aakumi iniki wakkologo logonet purok eerak wonogwe nogo koorogo piige, It aakumi inanebunu lombok iniki puru yogo logonet, yum lenggenak wonogwe nogo nggoorogo piige,

⁸ Ndi, kanggwi alom nogo mondok lek eerogo pege, Eerigin o. Naliku Itok Minggirak an ALA nen aakumi abok inale amburu mbanogo piige, It at apuri o nggween paga yi awi ndi awi wonogwe inendage maluk eerogo piigwi nogo lek eerogo piige, Eerigin o,” yinuk, Aliku ALA nen aret yegerak o.

⁹Ne ti eyom paga it aakumi nen yogo logonet, “Eeppinanege yi ti, ninogoba Ala nen aret o. Ninagap ndaruwak nduk, tokkogo nogoorak nogo at aret. At tokkogo nogoorak nogo Aliku ALA yi aret me, ninale'nggen mbakwi, Ninagap ndakerak me, ninale'nggen nen ndawi lubuk yogwe, Eeko logowok o,” yinuk, yugun o.

¹⁰ At Aliku ALA nen puut Tiyon yi, eenggi omaawi paga pipporogo logogin kwe, It aakumi Mowap mendek perak, Wam inambi larak nunggo logonet, it inaan wurik iniyok aambiranogo pako mengga kwak togop aret eerogo piyaagin o.

¹¹Aap niyo ngguu'mo wundogo logonet, ineenggi mbigappegak warit wunda nogo mengga kwak, It aakumi Mowap mendek nen it inaan wurik amok mbanak paga ineenggi labuk-mbabuk nogo logogun o. Inomaawi logowok nduk, eerit nugwi paga iniki wogoppakwi nogo Ala nen inomaawi lek eerogo piige,

¹²Yugum pak tiyarogon wurogo pereegwaarak nogo langgunogo wuppege, Yanggunik-panggunik eerogo o nggween paga wuppunuk, liirubu aa'ngga eerogo pege, Eerigin o.