Read Western Dani Yetaya 31 Bible Online

Yetaya 31 - Western Dani bible

Yetaya 31

¹It aakumi iniki at Kikak Nakeelik Alik Leenak Iterali inogoba nogo oba panggombugwi, “Aliku ALA yeenggwa niraawak o,” yinuk, nggino yogwi, Eeka'lek, “It Metit mendek nen yeenggwa niraawak o,” yinuk, o Metit nogwe, “It inaguda paga iniki panggombugwi, Inanggweendo ambik wonage paga panggombugwi, Kuda paga kwi'na'nuk wim eeka inomaawi ambik o,” yinuk, inoba panggombiigwi, Eekwi nogo, inabuwa o.

²At Aliku ALA ti, iniki warak aret me, At eeriyak yegetak nogo mbeenogo pigin lek a'me nggelok togon aaninggin inoba kwippiyaagin o. At pilak ari logonet, aap maluk eeka inom, it aap maluk eeka yeenggwaaraga inom, Aaninggin inoba piyaagin aret o.

³It aakumi Metit mendek ti, Ala kwak lek we aakumi aret o. Ndi, inaguda kunduk, kugi kwak lek ineebe lebenak wonage me, At Aliku ALA eenggi nippege kenok, “Yeenggwa niraanip o,” yoragaarak inom, yeenggwaaragaarak inom, Imbirak ambugwi aret iniyogobit lik togon wanggo logomenggaarik, inenggaawak lek arugun o.

⁴At Aliku ALA nen an yo'negerak nogo yi aret. “Singa koleewak a, singa awooluk ambi a, nen at nengge menggerak nogo iyok tebembunuk nengge me, It ndomba ndegeninaka eerak ndinuwok nduk, wogo logomenggaarik, Inoone ya-mba yogwi, teerogo nappuwok nduk eekwi, Eeremenggaarak kwe, Agabiti mbake, kole mbagangge, eekeelik ogogumbuk menggi kwak, At Omaawi Lombok Menggerak Aliku ALA wambi wage logomenggerik, Puut Tiyon inom, enaagan-ambokan puut-puut lunik inom, ili eerogo pege logogin o.

⁵Towe aagalogwe inawina iigak inagalo irimbaga lenggak-penggak nege menggi kwak At Omaawi Lombok Menggerak Aliku ALA nen O Yerutalem arum wonage, nobappunuk wonage, aakumi ineenggime age kero, unde wake, At yendok-wandok nege logonet, ili eerogo pege, Eeke logogin o,” yinuk, yo'negerak me yagi o.

⁶Kit aakumi Iterali mendek yi wae. Maluk lombok eeko logonet, kineenggi paga nen mbuti perak paga, mbuti emas paga, kinagugiwak ogobakkigirogo pereegutak nogo, Ne ti eyom paga kinalitak lombok nen mbo pumunggup me, at Ala mbo punuk kiniki o nda ari nagaarak nogo yogondak aret yungguninuk kiniyokan at owagam wa'nip o.

⁸“It aakumi Atiyut mendek wim eeko logonet, aakumi inawooluwak paga ineebe inoorugun lek o. Ata, wooluwak aakumi nen nggabunulik alik mendek paga ineebe aret nagin o. Wooluwak ayuk nen kole mbaganggwi, Inapuri tawe nogo aakumi inayeloman logowak nduk eerogo piigwi, Eerugun o.

⁹It inarum menggaarak nogo inagabiti nen mbo piinok ma'nogwe, Inawim inawooluwak anggup inigen kenok, inoweewi wim eeka nogo iniki lek a'nuk mbaganggwi, Eerugun o,” yinuk, At kani kumbunuk menggim o Tiyon wonage, At mbi worake menggim kota Yerutalem wonage, Eeke menggerak Aliku ALA nen yegerak nogo ti aret o.