Read Western Dani Yetaya 32 Bible Online

Yetaya 32 - Western Dani bible

Yetaya 32

¹Aap endagembogut ambi nen obeelom eeppiinet nage logonet, wone lengganogo yorage, It aap aakumi inarum menggaarak nogo nen eekaatak a'me nggelok eeppiigo logonet, inarum wonogwe, Eekwi iyaamunggup o.

²O wiya warit wage kagak yugum nen mulumbiinok menggi kwak, O wiya nabuninuk wage kagak, ineebe op logowam nobappiinok menggi kwak, O karume niyo eneeri ambik wundit wage menggi kwak, Karu kole nonggolak me mo andi nen yugum kole abu'me ari unggwogo mengga kwak, It aap ti, inalitak lombok togop aret eeppiinok logogun o.

³Togop eeppiinok wonage kenok, it aap inigen iigo menggaarak nogo inigen ambinom iiga'lek logogun lek inigen iigwi, Ndi, it aap inaruk konenggo menggaarak nogo lik togon konenggwi,

⁴It aap iniki koongga'lek mbet-mbet eerit nogo menggaarak nogo, yi wone ndi wone liippunuk eekwi, It aap inoone nekep yogo menggaarak nogo inoone abe kin paga yogwe, Eeko logogun o.

⁵It aap iniki yuundurak nogo ti, aap wi inoone yogo mengga kwak agan nugwi, Maluk eeriyak mban inikime koonggwi, Ala mugurok noorak ineebi mba'nuk alik eerit nugwi, “Aliku ALA ndogop yegerak o,” yinuk, pilit-pilit agan nugwi, Mbi abu iigak tumburiraga'lek mbo piigwi, Yi abu iigak kwe, wogoraga'lek teppiigwi, Eekwi ti eyom paga It aap iniki yuundurak nogo, “Aap yi, iniki warak me ayuk warak aret o,” yogwe, It aap wiwi aganaka nogo inendage tiyappugwi, Eekwi nogo ambinom eeko logogun lek o.

⁷It wi-wi aganaka nen eeppiinet nugwi ti, maluk aret o. It aap tebenak mendek nogo nen, “Nit ndogop eekoorak o,” yinuk, abet aret yogwi iigak, It aap ti nen, “Pilit-pilit inoba piigwi niinok, inoone lek aruwak o,” yinuk, inikime koonit nugwi, Eeko menggaarak kwe,

⁸It aap iniki abe nen perak, Abe koonak eeppiinet nogo logorak mban koonggo menggaarak me, Yi mendek ndi mendek abe mban eerit nugwi ti paga it mban woguk yogo menggaarak.

⁹Kit kumi kiniki ugun ale'nggen mban wonogo monggotak yi wae. Wone an yokkirage yi, kiniki aganggen kerek togon waganggo logonip o. It kumi ti, inaagalogwe komologwe nen, “Ambi eeppinanigin lek o,” yinuk, kiniki ugun monggotak kit yi wae. An wone yokkirage yi, liippogo logonip o.

¹⁰“Eeppinanigin lek,” mba'nuk, kiniki ugun wonogwe yi, Tahun yi lek eeppunuk, ambi eeke paga kineyabu anggur yarak anggen mbanumonggotak nogo lek age, Anggen ando alik mendek mbanumonggotak nogo, ti kunduk lek age, Eerigin me, Kinaganak wako logomunggup o.

¹¹Kit kumi kiniki ugun ale'nggen mban wonogwe yi wae. Kinaganak wakwi, It kumi ti, inaagalogwe komologwe nen, “Ambi eeppinanigin lek o,” yinuk, kiniki ugun wonogwe kit yi wae. Kinomanggen tayok ari, Eeko logonip o. Kinayum abe yirik nggoorogo punuk, kinayum maluk nibinik mendek nogo yikkologwe,

¹²Kinanggween mili lubunik wonage nogo maluk age, Anggur ero anggen mondok luurik-maarak yege menggerak nogo kanenep eerogo pege, Kit an napuri kinanggween paga alok-palok mban lagangge, Nggonggoondu mban penggaarogo pege, eerigin me, kinamiguwak wakkologo logonet, le yogwe, Kiname kiniki ale'nggen paga eeko monggo'nom inom, Kinawi o kota yi paga kuwak a'nuk kinale'nggen paga nugu monggo'nom inom, lek eerigin me, leenggu maakwi, Eeko logonip o.

¹⁴At kinowe endagembogut awi abe nggwok wurik nogo mbo pege, Kinawi kota noone-koone agan nugu menggam nogome yi oone ndi oone lek age, Puut paga inawi abe wurik inarum logorak nggayo wurik nogo inom ndengga-ndengga wambemenggerak me, Aakumi logogun lek teppugwi, O time keledai nggwiya inale'nggen nen inawi miikkologwe, Kambin-ndomba inagari'ngga mbanogo nenet nugwi, Eerugun o.

¹⁵Eekwi iigak, Aberiniki agi nen ninoba wuppinani woraagin o. Wuppinani wage kenok, o karume nogo nggween mondok mili lubuk eerogo pemenggerak paga anggen ambik aret yege, Anggen yege menggerak yabume yarak nogo eyoongga kunik negen eerogo pege, Eerigin o.

¹⁶Ti eeke kenok, karume nggween obeelom aruwam time nen a'me nggelok mban eekwi, Ndi, yabume yarak eyoongga kunik negen aruwam time obeelom mban eerit nugwi, Eeko logogun o.

¹⁷Obeelom mban eerit namenggaarak anggen kwak ti, iniki ugun tayenak aret wonogwe, Aakumi obeelom mban eerit namenggaarak paga wone ambi inoba aga'lek iniki ugun kwi'ndak mondok-mondok aret wonogwe, Eeko logogun o.

¹⁸Aakumi an napuri nogo yi wone ndi wone lek ugun lambunik wonogwe, Mugogo wumbiiga'lek iname menggam mondok time aret wonogwe, Alok-palok lek ugun ale'nggen paga wonogwe, Eeko logogun kwe,

¹⁹O mayu kumulinggen nen eyoongga kunik taganogo pit nage, Inawi kota nogo langgunogo punuk kobappaga eerogo pege, Eeremenggerak kwe,

²⁰Kit perak, niyo eneeri wundit wage menggim abok aret yi mendek ndi mendek awi yumbunit nogwe, Kinaanggumi tapi inom, keledai inom, inagari'ngga mbanogo nenet nugu logowak nduk, wondet eerogo teppiigwi, Eeko logonet, Kinale'nggen mban mbako logomunggup o.