Read Western Dani Yetaya 33 Bible Online

Yetaya 33 - Western Dani bible

Yetaya 33

¹Kat aakumi maluk eerogo piiga yi wae. Kat maluk eerogo pagaga'lek iigak, kat nen mban maluk eerogo piinet nage me, kabuwa o. Kat aakumi inambokan lagangga yi wae. Aakumi nen kat kambokan lagangga'lek iigak, kalik nen mban it inambokan lagangge me, kabuwa o. Kat maluk abu aret eerogo piige keenok, it nen kat aret maluk eerogo pagagwi, Ndi, abu aret aakumi inambokan lagangge keenok, it nen kat aret kambokan laganggwi, Eerugun o.

²Kaliku ALA wae. Nit kat lombok paga niniki lunik wonogwe me, ninabuwa mbake, Ko'lu-kii'me kubondendok paga komaawi eeppinanege, Aaninggin ninoba age ti eyom paga keenggi omaawi paga ninagap ndake, Eeke logot o.

³Koone ngguurubu kwak ari keenok, yi aakumi ndi aakumi kole mbaganggwi, Kat pilak ari keenok, it aakumi inanebunu lombok ma'nogwe, Eekwi iigak,

⁴Wurin iri'ngga lelenogo nonggo mengga kwak, Wurin ambit me ninggippunuk, iri'ngga ne ambit pup eerogo nunggo mengga kwak, It aap nen aakumi ti inawi paga kwi'nari unggunuk, inamendek abok aret wonok ma'narugun o.

⁵At Aliku ALA abu tiyanak menggim time menggerak me, at endage tiyanak aret logogin o. At o Tiyon alik eekeelik eekaatak a'me nggelok mban eeppiige, abe koonak mban eerit nage, eeke logogin o.

⁶Ne ti eyom paga kit aakumi obeelom nu'lek logobagip nduk, eeppinagarak alom at aret me, Oona ngginik kagak, kinagap ndake, kiniki warak eeppinagage, yi wone ndi wone kineenu eeppinagage, Eeke logogin me, Ti eeppinagarak nduk, woorak nogo ti, Aliku ALA kinagabiti mbako logorak ti aret.

⁷It Ariyen mendek inawuri wakaa'ngget nen, “Yeenggwa niret o,” yinuk, tu paga nen inoone nggwok paga yogwe, “Ninom lambunuwok o,” yinuk, yonggo nappiigaatak nogo nen kunduk iniki puru yogo logonet le yogwe, Eekwi ti, kinigen iyaanip o.

⁸Tu nggwok paga aakumi ambiriluk ambi naga'lek mondok nebek lek aret wonage, Eeriyak wone koonogo pereegwaarak nogo piyok ari, It aap inenggaanom paga wone koonogo pereegwaarak nogo ti, inoone taganogo piigwi, Eeko logonet, “Ta oone konenubok?” aterak eerogo mbo pogo agaarik o.

⁹Aap iniki wakkolage logonet eebe mbuuluk eerogo pege menggi kwak, o ti togop aret age, Aap enggali nen uut yuwo agan wangge menggi kwak, o Libanon eyoongga wonage nogo yogu-yogu wangge, O Taron nogo karu nggwok o ame pa'nggwe nogo kwak age, O Mbatan inom, puut Karemen inom, eyoongga wonage nogo mono-mono wangge, Eeke agaarik o.

¹⁰At Aliku ALA nen ari logonet, “Yogondak aret an pilak ari, Yogondak aret an abu tiyanak neyaawak nduk mi'nage, Yogondak aret nomaawi ambik neyaawak nduk nu'lek mi'nage, Eerigin o.

¹¹Eeriyak kiniki koonggwi nogo mbeyok ari, Koombunuk eekwi nogo abe lek aanom warogo aret eekwi, Ndi, kinanini aagi ti, kani kunik kwak aret me, kinalik nen kani kinogombaga pakwi, Eerumunggup o.

¹²Kwi worakaatak wun age menggi kwak, yi aakumi ndi aakumi togop aret ogwe, Eyo alok kenok muurogo kani kunggo mengga kwak, kani nen kit kineebe togop aret nengge, Eerigin,” yegerak o.

¹³Togop me, kit aap o ndaanda monggotak yi wae. At eekerak nogo kinaruk konenggwi, Kit aap koorok wonogwe yi wae. “At omaawi ambik aret kogo o,” yinuk, yogwe, Ee'nip o.

¹⁴It aakumi maluk eeka o Tiyon wonogwe nogo iniki ma'nage, It aap Ala mugurok noorak ineebi mbaka nogo nen inaganak ngginuk ari, Eeko logonet, “Wologwe wae. Kani nen ineebe lek eerogo nengge me aap ta nen unggwage mbakop? Ndi, aap ta nen kani mondok wunuk mban ari menggim op logorak mbakop? Lek aret o,” yinuk, yugun o.

¹⁵It aap obeelom mban eerit nugwi, Wone abe koonak mban yogwe, Aakumi wi-wi eeginako logonet inamendek waganggwi nogo, “Woorak nineebi o,” yinuk, mbo pugwi, Mage yugu kagak wu wogorogwe waganggwi nogo mbo pugwi, Aakumi inooruwok yogwe iinok, inaruk nakkologwe, It aap maluk eeka nen eerit nugwi nogo inigen iigwi iyo, inigen nobakkologwe, Eekwi iinok ti,

¹⁶It aap puut tiyarogon yugum pak wurogo pereegim iniki ugun tayenak wonogo mengga kwak wonogwe iigak, Inambi pipuk eerak wonage, inaniyo lek arigin lek wonage mban wonage, Eeke kagak nonggo logogun o.

¹⁷Aap endagembogut obaanggi-obaangge li'luk eerak mi'ndak wonage, O nggwok lombok nenaarogo pit nagagim ambi kinigen nakkogwe, Eerumunggup o.

¹⁸Kinamineeri ne agan nage nagagerak nogo abe'nage logonet, “It aap wim eeka inoweewi nen eeppinanggo nogogwaarak nogo nonggop aga?” “Kinarum wonogwe onggo wo'niraanip o, yinuk, inoone omaawi paga yo'nirogo nogogwaarak nogo nonggop aga?” “Tum wonogwe iyaamun ilik? yinuk, inigen yombonninabi wogo nogogwaarak nogo nonggop aga?” Yinuk, yogo logomunggup o.

¹⁹It aap tiyappatit kiya wogo logonet, inoone abu alik me kinaruk konenggwi, kit nen liippugwi, Eeka'lek abu kobak kiigak yogo nogogwaarak nogo ti, kinigen ambinom iyaamunggup lek aret o.

²⁰Ninale'nggen nen laago lako logorak yugu lako monggom o Tiyon nogo kinigen nakkogo logonip o. Ooliya wurik minogo ambime wonok nawak nduk, eyak yinik kinggwi, Keele eyak paga pugunik nogo piinggwi, Eeka'lek mondok wurik menggi kwak, O Yerutalem ti, yi wone ndi wone lek obeelom mban wonage kaamunggup o.

²¹O time Aliku ALA ninom logonet, omaawi lombok paga ninili ari logogin o. Niyo mondok nggwok lombok wage, niyo eneeri abe wundi wage, Eeke menggi kwak, O ti togop aret logogin me, Ninawim mendek nogo eyo mbanak ndoonak paga alelo mbanit wunda wogwe, Yiiro kole paga wunda wogwe, Eeko logogun mondok lek o.

²²At Aliku ALA ti, ninowak loongga, Aliku ALA ti, eeko logorak wone lengganogo yo'niraga, Aliku ALA ti, ninowe endagembogut aga, Aret me, ninagap ndarigin nogo ti, at aret o.

²³It ninawim nen inayiiro wonok wogwe keele pugunik nogo nggaru-nggaru nage, Ogobak me eyo mippugu nogo langgonak-panggonak nage, Yum eyo mippugu pugunik nogo nabe-nabe nage, Eeremenggerak me, Yi mendek ndi mendek kugun wogo ambik wonok wogwe nogo nit tumbukkologwe, Aap inendop maluk nen kunduk ando nogo kologwe, Eeko logogun o.

²⁴It o Tiyon wonogwe nogo ambi nen, “An andi ee'nake o,” yinuk, ari logogin mondok lek o. Ndi, it aakumi time wonogwe nogo inomaluk lek eerogo piige logogin aret o.