Read Western Dani Yetaya 34 Bible Online

Yetaya 34 - Western Dani bible

Yetaya 34

¹Kit yi aakumi ndi aakumi yi wae. An nowagam kuwak ari wa'nuk, an ari kinaruk konenggwi, Kit kinanebunu lombok yi wae. An yokkirage yi, liippugwi, Ee'nip o. O nggween paga inom, yi mendek ndi mendek nggween paga wonage abok aret inom, inaruk konenggwi, O irip-irip inom, yi mendek ndi mendek wiganit wundi wage menggerak inom, an wone yigin yi, liippugwi, Eeko logowak o.

²At Aliku ALA nen it aakumi inanebunu lombok anini inombake, It ineegin warak nogo anini inoba piige, Eeke logonet, Ineebe lek eerogo piige, Inoorogo piyaawak nduk, wogorage, Eerigin o.

³It ineebe inooremenggaarak mbo nappiyamenggaarak me, inobari ndi wurit nage, Inamiya puut-puut paga niyo wurik negen taga-taga wambit wage, Eerigin o.

⁴ Laaluguragan ninggirik wonage nogo amburu tigi-tigi wungge logonet, lek age, Mbuku perek-parek aago kwak mbogut togop aret perek-parek eerogo pege, Eyo win engga mono-mono wangge, wuliinggen nggaru-nggaru wangge, Eeke menggi kwak, Laaluguragan abok togop aret yumbu-yumbu wambit wage, Eerigin o.

⁵ Aliku ALA awooluwak paga mbogut paga abu ambelom eerogo pege nagaarik, It aakumi Erom mendek mban inalik lenorogon ineebe lek eerogo piyaakit nduk, wambi wage yi, kaanip o.

⁶At Aliku ALA ake warogo wogogo mengga kwak at nen o Mbotara inoorogo piige, Aakumi Erom mendek ti mondok alik negen inoorogo piige, Eekerak me, Awooluwak paga amiya inom, amok inom, mondok lengge aago wonage, Ndomba aagalogwe inamiya inom, kambin ngguunok inamiya inom, ndomba ngguunok apenggen amok inom, awooluwak paga abu lengge eerak wonage, Eerak aret agaarik o.

⁷Kambin-ndomba inoorit nage logonet, Lembu nggwiya kunduk, tapi ngguunok kunduk, tapi ngguunok eyak pilanak kunduk, inom inoorigin me, Inoorak inamiya inanggween paga miin ngguluk ari, Inamok tubunik liirubu paga lengge aago wonage, Eerigin o.

⁸Ti eerigin nogo ti, at Aliku ALA nen it aakumi maluk eeppiigo nogogwaarak onggo eeppiyoorak eyom punik wonage, O Tiyon eeppiigo nogogwaarak inawone mbanogo piyoorak tahun ambi koonak wonage, Eerak aret agaarik o.

⁹O Erom paga niyo nage nogo ti, mut amburu negen aspal aret age, Anggween ameneno ti, kani kunik kwindagala eerogo pege, Anggween ti, mut amburu negen aspal a'nuk wunuk mban ari, Eerigin me,

¹⁰ Liingge inom, oonikiya inom, kani noguk yaga'lek mondok wunuk mban ari, Ka'luk mondok kwit agan lagangge, Eeke logogin o. O time mbo punuk mbaganemenggaarak me, aakumi tu ti paga ambi naga'lek aret iigak, nda'narit wundi wogo logogun o.

¹¹Towe tiyu karume mendek inom, towe ndindim engga inom, inawi time miippatinuk wonogwe, Towe mumayo inom, ya'ngge-ya'ngge inom, inawi mbanggola unggwogwe, Eerugun o. At Aliku ALA nen aru-ogwe wakkagak paga wakkaanuk naalop-kaalop eerogo pege, Agi-ogu keele paga wakkaanuk, o wogo logowak nduk, mbo pege, Eerigin o.

¹²It aap inengga warak nogo ti, aakumi inarum wonogwe lek aret age, Inoweewi nagawan-nagawan abok aret inenggaawak lek age, Eerak logogin me,

¹³Aap inendagembogut inawi nggwok abe wurik nogome alok mban kunogo pege, Yugum pak wurogo pereegim nogome towo inom, nggonggoondu inom, penggaarogo pege, Eerigin me, Mba'ngge inawi ari unggwogwe, Ndiimbu iname aret miikkola unggwogwe,

¹⁴It karume ku agan nugu menggaarak mendek nen mba'ngge inom ya'lo-ngga'lo agan nugwi, Kambin nggwiya ngguunok-kooli kokot agan nugwi, It oonikiya nugu menggaarak mendek time yonggonggola unggwogwe, “Niname nggeeme logowi o,” yinuk, o time ye mbanggola unggwogwe,

¹⁵O time towe mumayo inawi eyo paga wuppunuk, inako pugwi, Inako tubumbunuk inagalomini nen ina'naabit tebembiirogo wonogwe, Pen ware eegokot agan nugwi, Eeko logogun o.

¹⁶“At Aliku ALA nen wone lengganogo yorage kenok, At Aberiniki nogo nen kuwak eerogo piyaagin me, Yi mendek ndi mendek endage yagarak nogo ambi lek ti lek abok aret ogonggelo-akweegelo imbirak lunik aret logogun o. At Aliku ALA nen yugum wakkogo mengga kwak, wakkaanuk it inowagam ari nage kenok, it time aret unde eeppiige, Wakkagak paga wakkaanuk tumburirage, Eeke mbaremenggi, Unde eeppatinuk mondok-mondok wonogwe iigak, nda'narit wundi wogo logogun o,” yinuk, Aliku ALA oone mbuku perek-parek aago togop aret mbanak me, maleninip o.