Read Western Dani Yetaya 39 Bible Online

Yetaya 39 - Western Dani bible

Yetaya 39

¹Ne ti eyom paga aap Mbaben inowe endagembogut Mbalaran aput Merorak-Mbalaran nogo, Kitikiya andi eeke nagagerik, obeelom eereegerak konembunuk, liiru mbanak inom, ale'nggen mbaruwak nduk amendek inom, nappiya wagagerak wonok iri wogo mbareegwa,

²at Kitikiya nogo nen keyage warogo wogonake nagagerik, amindik-amendek pogo menggam wonage mbuti perak inom, emas inom, ombat abe eeka inom, tayitun amburu onggo nggwok mendek inom, wim nambukak yigin-maale awi wurik me wonage nogo inom, yi mendek ndi mendek onggo nggwok kenok kuwak eerogo pege menggim wonage nogo abok aret titik irage logonet, at awi o nggwok abe wurik me wonage inom, at abu'me piinok wonage menggim inom, ambi titik irage, ambi mbo pege, eerulik abok aret titik iragagerak.

³Titik irage nagagerik, wonage me, aap Ala nen yoge kagak yoraga Yetaya nogo aap endagembogut Kitikiya owagam wage nagagerik, yoge logonet, “It aap ti, ngga nen wogwe, ndi, nano wone yokkugwi, eekaarak o?” Yoge mbareegi, at Kitikiya nen, “It inawi o nda Mbaben nen aret wagaarak o.”

⁴Yoge mbareegi, at Yetaya nen ambinom yoge logonet, “Ndi, kat kawi o nggwok abe wurik yime nano mendek inigen kagaarak?” Yoge mbareegi, at Kitikiya nen, “An namendek onggo nggwok wonage nogo ambi titik irage, ambi teppege, eerulik yi mendek ndi mendek an nawi o nggwok abe wurik yime wonage nogo abok aret titik iragarak.”

⁵Yoge mbareegi, at Yetaya nen Kitikiya yoge, “At Omaawi Lombok Menggerak Aliku ALA ari nogo karuk logot o.

⁶Kat kamindik-kamendek kawi o nggwok abe wurik me wonage inom, kombomini nen kuwak eerogo pereegwaarak pogo menggam o yogondak enaani wonage nogo inom, abok aret it aap Mbaben mendek nen wonok noorak eyom abet aret woraagin me, wogo logomenggaarik, yi mendek ndi mendek nogo, ambi teppugun lek abok aret waganggwi,

⁷ ndi, kat kapuri-kombowologwe ndaganabemenggaarak ando wogonakwi, ee'nuk, o Mbaben piya nanuk, aap kenok inooli waganogo aap Mbaben inowe endagembogut awi o nggwok abe wurik me ake eeko logowak nduk, piyaagin o, yinuk, Aliku ALA nen ari kenok yokkigi o.”

⁸Yoge mbareegi, at Kitikiya nen Yetaya nogo yoge, “At Aliku ALA nen yokkege kagak, yagandak nogo ti, op aret yagandak o,” yinuk, yoreegerak ti, iniki nen, “An kangga'lek neenik awo wonage neegak, o an unde minggim mondok abolok lek obeelom aret logogin kagi,” mbake logonet, yoreegerak.