Read Western Dani Yetaya 4 Bible Online

Yetaya 4 - Western Dani bible

Yetaya 4

¹Ne ti eyom paga kumi ineebe 7 nen aap ambit-ambi ineenggi pippunuk, yogo logonet, “Nit ninogonggelomini lek me, ninenggali mbakak nugwi nogo lek aruwak nduk, kat nen, An nakuwi kit aret, yo'niret o. Yo'nirage keenok, ninambi noorak inom, ninayum yikkoloorak inom, ti, ninalik ninobaalombok nen aret kwaakkologo logogun o,” yinuk, yogo logogun o.

²Ne ti eyom paga Aliku ALA Agarip Ndarak nogo mondok abe kwit agan lagangge kagak, yi mendek ndi mendek awi yarak anggen abe yit nage kenok, it Iterali yumbunogo piyamenggaarak nogo nen, “Ninanggween yi, iya o,” yinuk, tiyappugwi,

³It aakumi o Tiyon piinok mbaganemenggaarak o kota Yerutalem wonogwe iinok, “Inili aago o Yerutalem logowak o,” yinuk, liiru mbanak wonage nogo, “Abu abe alik leenak wonogwe o,” yogwe, eeko logogun o.

⁴At Aliku ALA nen komologwe o Tiyon mendek mili lenggenak wonogwe nogo koorogo piige, ndi, o Yerutalem aap inamiya wambemenggerak aberak logokwak, anini kani negen wunuk ari logonet, eeremenggaarak onggo ndak-ndak eeppiige, eerigin o.

⁵ Ti eeppiige logomenggerik, Aliku ALA nen o puut Tiyon inom, aakumi abok o puut Tiyon paga kuwak eeremenggaarak nogo inom, liingge ndugwi eya paga nobarinake, ndi, oonikiya ndi wunanogo piige, eerigin me, it inirimbaga eya aago kagak ineebe obeelom aret logogun o.

⁶Ooliya wuppunuk, o liingge mo andi inooke kero, kwi'nari unggwogwe, ndi, o mayu wage, o wiya warit wage, eeke logonet, inooke kero, kumaa'nari unggwogwe, eeko mengga kwak, Aliku ALA nen nobappiirogo logogin o.