Read Western Dani Yetaya 43 Bible Online

Yetaya 43 - Western Dani bible

Yetaya 43

¹Togop aret wonogogurak kwe, Kat Yakup wae. Kat mendek nggwok aruwak nduk leenogo pagage, Kat Iterali wae. Kat mendek wiganuwak nduk eerogo pagage, Eereegerak Aliku ALA nen ari logonet, “An wondet eerogo piyareegirak me, inagabiti mbarugwaarik o. Inendage kunogombo wiiragagirak me, it an napuri aret agaarik o.

²An Kikak Nakeelik Nalik Leenak Inagap Ndaka Iterali inogoba Naliku Ala aret me, Niyo nggaruppegak wundogwe iigak, ninom wunda nagin o. Ndi, niyo mbaninuk wunda nogwe iigak, niyo nen wogoren nage, Kani kunik me iniyok pit nogwe iigak, iniyok kani nengge, Kani wunuk ari me wonogwe iigak, kani nen ineebe nengge, Eerigin lek o. It wondet aago logowak nduk, inonggo pugu ti, it Metit mendek aret. It eeginabukwak inobaane'me nggelok ari ti, it Kuti mendek inom, Tiyeba mendek inom, aret o.

⁴It an niniki kundugu abu tiyanak lombok wonogwe iige, Ndi, an niniki kunik lombok eeginake, Eeke me, It eeppiyookwak inobaane'me aakumi ambi eeppiige, Inili ari logonet, yi aakumi ndi aakumi inobaane'me eeppiige, Eerigin o.

⁵An ninom wonage me, inagabiti mbarugwaarik o. Oonegen lagi wage menggim pa'nggwe nen it inombowologwe wogoren piya wage, Oonegen kilu yi nage menggim pa'nggwe nen it kuwak eerogo piya wage, Eerigin o.

⁶Napuri wo'niru o, yinuk, o omarip paga pa'nggwe yoge, Napuri inili ari mage o, yinuk, o ame pa'nggwe yoge, Eeke logonet, Napuri wologwe o nda nen, Napuri komologwe o nggween irip-irip nen,

⁷It an nendage tiyappogo logowak nduk ogobakkigirogo piige, Ineebe longgo warogo piige, ina koonogo piige, Eereegirak nendage kunogo agan nogo menggaarak abok aret wogoren piya wogo logowak o,” yinuk, yegerak me, yokkiragi o.

⁸It aap inigen wonage kwe, inigen mbuk pogom wonogwe, Inaruk wonage kwe, inaruk logu negen wonogwe, Eekwi nogo Kin paga piya wa'nip o.

⁹Yi aakumi ndi aakumi abok aret kuwak ari wogwe, Aakumi inanebunu lombok kuwak eekwi, Eekaarak wonogwe inenggela'me aap ta nen wone ti eenu negen yoranet nage, Aa'nduk eereegerak nogo eeka'lek kagak, “Peebi ndogop eerigin o,” yinuk, yorage, Eereegerak mbakop? “Abet aret eekaarak,” mbaruwak nduk, it mendek nen inigen kagaarak kenok yi wogwe, Inoone yogwe konembunuk, Wone ti, abet aret yaga, mbaruwak nduk, mbinini wogwe, Eeruwak o.

¹⁰Aliku ALA nen ari logonet, “It an napuri ti, an eeke inigen neenok yoraga it aret o. It an liippanugwi, abet nombakwi, ndi, an Ala nalik aret ineenu ogwe, Eeruwak nduk, An nen leenogo piyareegirak nayeloman mini aret agaarik o. An aa'nduk nalik nitok neegak, Ala alik ambi logolik o. Ndi, an peebi logogin lek kenok, Ala alik ambi wonage logogin lek mban.

¹¹An o! An ti, Naliku ALA aret o! An lek neenok, inagap ndaka ambi mondok lek aret o.

¹²Kugi inenggela'me wonage nogo nen lek o. Ata, an lombok nen, Ndogop aret yeenggwaaraagin o, yinuk, yorage, inagap ndake, Eeke nagagirik, Ti'nuk, Togop eekirak o, yinuk, agan nege nagagirak. An nalik Ala aret, inigen neenok yoraga it aret o.

¹³Aa'nduk togon wonagagirak nok-nok yogondak wonage nogo an Ala aret o. An neenggime wonage nogo aap ambi nen ndiniyak meek o. Ndi, an eeriyak koonogo pege nogo aap ta nen tu non mbanogo pigin mbakop? Mondok lek aret o,” yinuk, yegerak me yokkiragi o.

¹⁴At Kikak Nakeelik Alik Leenak Wondet Eerogo Pinagaga kit Iterali kinogoba Aliku ALA nen yegerak nogo yi o. “It wondet agago piyaawak nduk, aap ineegin warak o Mbaben nappiige neenok, It aakumi Mbaben mendek nogo inayumoogi mban nggerok inayiiro abe ogobakkigirik kenok iniki tiyappatit nugwi nogo paga unggwi nanuk kole mbaganugun o.

¹⁵An inogoba Kikak Nakeelik Alik Leenak inendage Iterali toonogo piyareegirak inowe endagembogut Naliku ALA an aret yoragi o,” yinuk, yegerak me, yokkiragi o.

¹⁶Kit niyo laut nggaruppegak woraabagip nduk, tu koonogo pinagage, Niyo mondok omaawi nage kagak wunda woroorak tu koonogo pinagage,

¹⁷Wim eeka nggweendo inom, kuda inom, aap ineegin warak inom, wim eeka wakaa'ngget inom, wundi woraawak nduk yorage, Yoragagerak wundi wogo mbareegwa, ndi keele wunuk ari nogo nogonogo pogo mengga kwak ogwe, Kanggo nagaatik, mi'naga'lek inabut nigagik wonogwe, eeruwak nduk eeppiige, Eereegerak Aliku ALA nen ari logonet,

¹⁸“Aa'nduk eerit wogo nogogwaarak nogo iniki aberak wonogwe, Maan togon arit wagagerak nogo iniki koonit nugwi, Eerugwaarik o.

¹⁹Ata, an ngget mendek eeke yi, liippogo logowak o. An ngget mendek eeke o yogondak kin age yi, yelok kaga'lek agaarik ya? An nen tu o karume yarogo pit wage, Aakumi lek me karume niyo nage logowak nduk, koonogo pege, Eeke agarik o.

²⁰Ninogoba Ala iya o, yinuk, agan nugu logowak nduk, it aakumi leenogo piige nagagirik, Inendage toonogo piyareegirak napuri nogo nen inagi nonggo logowak nduk, o karume niyo warak eerogo pege, Aakumi lek me karume niyo nage logowak nduk koonogo pege, Eeke paga it eyonggaame mendek ndiimbu-nggwiya nen inale'nggen nombako agaarik kwe,

²²It Yakup mendek ti perak, an wiinega'lek mbo panugwi, It Iterali mendek ti, an noone koneniyak anggon eeginake me, teppanugwi, Eeko agaarik o.

²³Nake warogo kani kuniyak ndomba wonok niri wogwe, Nayuk wuko logonet, nake warogo wo'nugwi, Eeka'lek aret agaarik o. Ndi, aaninggin inoba age kero, anggen yigirik nake wo'niri wogwe, Obari abe kaga nogo kani kuni wogwe, Eeko logowak o, yinuk, Noone omaawi paga yoraga'lek aret agarik o.

²⁴It nen en weeri amburu nake inawu paga kunggwi, Niniki ndonggo yikit nduk, nake ndomba warogo kani kunggo logonet, amok ambik wo'nugwi, Eeka'lek aret kwe, It inomaluk paga niniki aaninggin lombok eerogo panugwi, Noone taganogo punuk, yi maluk ndi maluk eerit nugwi paga nomanggen tayenogo panugwi, Eeko agaarik o.

²⁵An o. An Ala aret me, an lombok nen inomaluk lek eerogo piige, Inomaluk eekaarak nogo an abeke lek nami age, Eeke minggirak o.

²⁶Aa'nduk eerit wogogwaarak nogo aberogo yo'nugwi, Nit maluk eerulik abe mban eerit wogogurak, yogwe nogo liippunuk, Ninom owak loonuwok nduk, wone kin eeppugwi, Eeruwak o.

²⁷It inombo aa'nduk mendek nen maluk eeke, Ti'nuk, noone wonok yoraga nen kunduk, Oone nineebi o, yinuk, yo'nugwi, Eereegwaarak me,

²⁸Inoweewi nawi wurik me eeko menggaarak nogo inendage maluk eerogo piige, It Yakup mendek inenggaawak lek eerogo piyaawak nduk, koonogo pege, Ndi, it Iterali mendek meek eerogo piyaawak nduk, eeppiige, Eerigin o,” yinuk, yegerak me, yokkiragi o.