Read Western Dani Yetaya 44 Bible Online

Yetaya 44 - Western Dani bible

Yetaya 44

¹“Togop aret eerigin kwe, at nayeloman Yakup ti, An leenogo pereegirak Iterali ti, Yogondak an wone yoge yi, aruk konengge logowak o.

²Ogobakkigirogo pege, eenggi-iyok warak eerogo pege, yeenggwaage, Eereegirak an Naliku ALA nen wone ambi yori o. An nen nggween mbuk kenok, niyo kilirogo pege, Nggween woloonak wonage me, mayu lubu-lubu wuppi wage, Eerigin me, At paga wiganak an Naberiniki inoba wuppi wage, Ndi, ombowologwe paga nale'nggen inoba piige, Eerigin o. An nayeloman Yakup ti, An leenogo pereegirak Yetiyurun ti, agabiti mbarugurik o.

⁴Niyo ambet paga iri'ngga yili-mili lagit wage, Eyo kilu niyo ambet paga yoguk agan lagit wage, Eeke menggi kwak, It inombowologwe togop aret wiganugun o.

⁵It ambi nen, An Aliku ALA amendek o, yinuk, ari, Ore ambi nen, An Yakup paga wiganak aret, ari, Ndi, it alik ambi nen, An Aliku ALA aput aret o, yinuk, eenggi paga liiru mbambunuk, Nendage Iterali mendek aret agi o, yinuk, toonggolage, Eerugun o,” yinuk, yegerak me, yokkigi o.

⁶ Iterali inowe endagembogut wondet eerogo pinagareegerak Omaawi Lombok Menggerak Aliku ALA nen wone yegerak nogo yi aret. “Aa'nduk togon wonagagirak peebi irip paga mondok logogin ti, an nalik aret o. An Ala wonage neegak, at alik ambi wonage mondok lek aret o.

⁷Togop me, an kokwak ambi ta agaarik mbakop? Wonage kenok, oone yiyok nda! Ari logomenggerik, at eenu nogo nenggaanom paga ari kaakit nduk, An maan aa'nduk nen napuri leenogo piyareegirak kuli nen nok-nok arit wagagerak nogo mbininogo yo'nege, Peebi ndogop eerigin o, yinuk, yo'nege, Eeri woraawak o. Abet aret yi woraawak nduk yagi o.

⁸An o aa'nduk nen wone yi agan nage, Eeriyak nogo eeka'lek kagak yorage, Eerulik ya? Noone yorage liirogon koneneegwaarak nogo it aret me, Inaganak wake, inagabiti mbakwi, eerugwaarik o. An wonage neegak, an kwak Ala alik ambi wonage mbakop? Lek aret o! An yugum kwak nomaawi minggirak kokwak, ambi wonage an kaga'lek aret o,” yinuk, yegerak me, yokkiragi.

⁹It aap kugi ogut ogobakkigika ti, abe lek o. Ndi, it ogobakkigippunuk, iniki kunik eekwi ti, aanom warogo aret eekwi, It aap ogobakkigika ti, inigen mbuk kwak logonet eekwi, Kobak logonet eekwi, Eekwi me, Inenggali arugun o.

¹⁰Mbuti worappunuk, kugi ogut longgo warogo pege, At nen eeppuurak lek kagak, mbuti worappunuk aanom warogo kugi ogut longgo warogo pege, Eeke ti, Ta nen eeke mbakop?

¹¹At inom, inom eerit nugu menggaarak inom, inenggali arugun o. It ineenggi amburu eekwi ti, aap mban aret o. It aap ti abok kuwak a'nuk, ambugwi aret inaana'le mbanggolaawok nduk, eeremenggaarak kwe, Inaganak wako logonet inenggali arugun o.

¹²It aap mbuti worappunuk ogobakkigika nen mbutiwak ambi woppunuk, kani paga worakwi, Matelo paga aambiranogo punuk, ineenggi omaawi paga kugi ogut longgo warogo pugwi, Eekwi iigak, Mbi abu eeginake, ta'liila eeginake, Niyo nengga'lek paga ineebe lebenak eeginake, Eeke kagak eeko menggaarak o.

¹³Aap eyo paga yi mendek ndi mendek eeka nogo nen, eyo keele wakkogo nagaatik, eyo ti paga ogut eerogo punuk, pulu paga kobonogo pit nogwe, Ndak-ndak aruwak nduk, metet paga wakkogwe, Eeko logonet, Aap kwak ogobakkigirogo punuk, aakumi inetenggen abe li'luk aret age kenok, Wonok kugi awi wurik me pi unggwogo menggaarak.

¹⁴Ti eeruwok nduk, aap inogut ogobakkigika nogo nen Eyonggaame nogo nagaatik, eyo ndiindi ambi muurogo wonok wogwe a, Kilu ilik, teno a, eyonggaame time lagangge logowak nduk teppegaatak nogo wonok wogwe a? Ilik, eyo kilu-kilu yakaatak mayu nen nggwok eerogo pegetak nogo wonok wogwe a? Eeppunuk, nogo paga ogobakkigiko menggaarak.

¹⁵Eyo ti, aakumi nen kani kunggo logorak ake aret me, Ando kumbunuk, togwi worakkologo logorak ake, Ando inambi worako logorak ake, Eeko menggaarak kagak, eyo ti paga kugi ogut eerogo punuk, ayuk wukwi, Kugiwak ogobakkigirogo punuk, alut eekwi, Eeko menggaarak.

¹⁶Eyo ti paga kani kumbunuk, wam enggaanggum at paga lunogo punuk, worakwi, Worappunuk, ndonggorogon nunggwi, eeko nagaatik, Kani kunik ti paga togwi worakkologo logonet, “Kani eyak ti paga nen togwi wora'nake, neebe aganggen lombok eerogo panege, eekerak me, nale'nggen aga wa!” yinuk, yogo menggaarak.

¹⁷Ndi, eyo eegu ndinik nogo paga inagugi ogut eeppunuk, inabu'me tebe yinuk, inalut eeko logonet, “Kat nogoba aret me, yeenggwa niru o,” yinuk, nggino yorogo menggaarak kwe,

¹⁸It aap ti, ineenu ogwe, liippugwi, eekulik kobak aret wonogwe, Inigen purok lenggenak kwak me, kaga'lek wonogwe, Iniki apit kwak me, liippega'lek wonogwe, Eeko agaarik o.

¹⁹It aap ti nen, “Eyo eegu ti paga togwi worakkolaawok nduk kani kunggwi, Kani anggen paga inambi worakkologwe, Wam enggaanggum inom worappunuk nunggwi, Eeko monggoorak kwe, Eegu ti paga ogole warak kugi ogut ogobakkigirogo pakwi, Eyo mbanak kagak abu'me tebe yinuk, ayuk wukwi, Eeriyak ti op ilik?” yinuk, iniki koonggwi, Yelok kogwe, liippugwi, eeka'lek aret agaarik o.

²⁰It aap ti nen, “An neenggi amburu paga ogut eeke yi, eebe abet aret me nduk, eeke ilik, eebe lek kagak we ogut mban eeke a?” yinuk, yogwe, “Yi paga nen nagap ndarigin me, eeke ilik?” mbakwi, Eeka'lek pilit kagak neenu mbakak eekwi ti paga tu alik paga nogwe, Wun nunggulik kagak nunggwi kwak eekwi, Eeko agaarik o.

²¹Ala nen ari logonet, “It Yakup mendek ti, an wone yorage yi, abekwi, It Iterali mendek ti, an nayeloman mini aret me, liippugwi, Eeko logowak o. An nen aret ogobakkigirogo piyareegirak me, it an nayeloman mini aret agaarik o. It Iterali mendek ti, an nami eerogo piyaagin lek o.

²²Tit aagi wiya nen wonok nggarek ari menggi kwak, it maluk eerit wogo nogogwaarak nogo, lek eerogo piige, Ndugwi o wiya nen wonok nage menggi kwak noone taganogo punuk, maluk eeko nogogwaarak nogo lek eerogo piige, Eeke nagarik, Wondet eerogo piigirak me, iniyokan yungguninuk neya woraawak o,” yinuk, yegerak me, yokkiragi o.

²³At Aliku ALA nen eerogo piigerak ti paga Kat mbogut yi wae. Kiniki ale'nggen nen ndawi wake, Kat nggween kiiniki yi wae. Kale'nggen nen keekok ari, Eeko logonip o. Aliku ALA nen it Yakup mendek wondet eerogo piige nagaarik, it Iterali mendek inigen kaawak nduk, Inenggela'me eeke nogo ti, Aliku ALA nen aret eeke me, Kit puut-puut inom, yi eyoongga ndi eyoongga inom, yi eyo ndi eyo inom, kit abok aret yi wae. Kiniki ale'nggen nggelok ari logonet, keekok piyanggogo logonip o.

²⁴Kat kagalo inikime nen keenggi-kiyok warak eerogo pagage, Wondet eerogo pagage, eereegerak Aliku ALA nen wone yegerak nogo yi aret. “Yi mendek ndi mendek apit aret wakkage, Mbogut nenaarogo pege, nggween ambe wiganogo pege,

²⁵ Peebi ndogop arigin o, yinuk, Ala nen yo'nirage kagak yokkirogo o, yinuk, Yorogo logonet, ineenu agak mendek eeppiigwi nogo abut laganogo piige, Inobagari negen yorogo menggaarak nogo inagi'ndok kambuwak nduk eerogo piige, It aap iniki warak nen yorogwe nogo abut laganogo, Aap wi nen yogwe, mbaruwak nduk eeppiige,

²⁶Ayeloman mini nen wone yorogwe nogo omaawi eerogo piige, At nappiigetak yora nogwe nogo a'me nggelok yuwak nduk eeppiige, Aakumi o kota Yerutalem logogun o, yinuk, ari, It Yekura wonogo menggam kota-kota yigirogo pugu nogo obaane'me wurigin o, ari, Aa'nduk wonagagi kwak eerogo pigin o, ari,

²⁷Niyo poro agan wambu o, yinuk, niyo laut kiiniki yoge, Niyo nage kunduk, Porok yu o, yoge,

²⁸ Ndi, ndomba ndegeninaka kwak, an napuri eeppiyoorak abok aret ninikilom mbake nogo aap Koreti eeruwak nduk yoge, O kota Yerutalem obaane'me wuko logonip o, yuwak nduk, eeppege, Ala awi owak kwippit nogo logonip o, yoraawak nduk, eeppege, Eereegirak ti, Naliku ALA an aret o,” yinuk, yegerak me, yagi o.