Read Western Dani Yetaya 47 Bible Online

Yetaya 47 - Western Dani bible

Yetaya 47

¹ At Ala nen ari logonet, “O Mbaben Aagalukwe Aap Kigin Waka'lek kat yi wae. Kat tiyarogon menggenom nen wambi nanuk, liirubu paga kwi'nage, It Mbaben mendek inaagaluk kat yi wae. Wone lengganogo yorage menggenom kwi'ndak logorak lek nggween paga aret kwi'nage, Eeke logot o. Kolaga abe kigirikwe agabolo anen pera aago yi wae, yinuk, ambinom yokkogo logogun lek me,

²Kayum kanobak paga lenggenak nogo nggoorogo punuk, yugum gandum yigika nogo woppunuk, yigike, Kayum nggorek awiirogo kambulok paga pi laganuk, kin kagak niyo mbaninuk wunda nage, Eeke logot o.

³Kerali yirik lek kagabolo kin wonage me, kenggali mbakak nege logomunggun o. Napuri eeppiigendak onggo eeppagage neenok, aap ambi nen non mbanogo panigin mondok lek aret o,” yinuk, yoge kagarak o.

⁴Wondet Eerogo Pinanega endage Omaawi Lombok Menggerak Aliku ALA ti, Kikak Nakeelik Alik Leenak Iterali inogoba aret o.

⁵Ala nen ari logonet, “It Mbaben mendek inaagaluk kat yi wae. Koone ambi yaga'lek kwi'nage, Koone lek aret o akem yumaak aago me time unggwi nage, Eeru o. Yi aap ndi aap inabu'me piigo menggam unde ninagalo kwe nggwok kat yi aret o, Yinuk, ambinom yokkogo logogun lek o.

⁶It an napuri nanini inoba piige, Yate kwak niniki kundugu kwe, maluk eerogo piige, Eeke logonet, waganogo keenggime piige mbareegi, kat nen inabuwa mbaka'lek aaninggin inoba piige, Aap inanggok kunduk, eyo mbanak tapi enggaanok me kwippogo mengga kwak, aaninggin mondok iya inoba kwippiige, Eereegindak o.

⁷Kat nen, An kwe nggwok wonage nogo lek aga'lek mondok-mondok aret logogin, yagandak kwe, Eeppagarak yagarak yi, kiniki liippege, Ti eeke neenok, ndogop eeppanigin, mbake, Eeka'lek aret keegi o.

⁸ Togop me, kale'nggen kaanok nduk eekko'net nage, Niniki ugun tayenak wonage mbake, An iya aret o. Ndi, an kwak ambi wonage lek me, an kwe nanu age, Naagalogwe lek ogwe iinok, niniki wakkolage, Eerigin lek aret o, yinuk, yikkolage, Eeke kat yi, Wone an yokkege yi, karuk konengge logot o.

⁹Wone alom mbere yagandak ti, ne ambit liingge inigen kubuk yogo mengga kwak Kaagalogwe lek ogwe, kwe nanu age, eerumunggun o. Tili pagangge, kagugi omaawi paga eeke, Eeremenggendak kwe, Alom mbere ti, ambi teppigin lek abok nggwik togon aret koba arigin o.

¹⁰An maluk eerit nage yi paga ambi eeppanega'lek op aret wonage mbake, It ambi nen inigen neega'lek aret, ari, Eeke menggendak o. Niniki warak wonage, yi wone ndi wone neenu wonage, Eeke ti paga tu maluk me pagi nage kagak kwe, an kwak ambi lek an iya aret o, yinuk, ari menggendak.

¹¹Togop kwe, aaninggin kat koba arigin nogo ti, tili paganemenggendak paga lek eerogo pake, Maluk koba kwi'nariyak nduk eeke kagak kamendek at ake wogoremenggendak paga woppake, Eerumunggun lek o. Ata, Aaninggin mendek noba arigin, mbaka'lek nogo aret yini-panip koba kwi'nage kaamunggun o.

¹²Togop me, kagugi koone yorage menggendak inom, Ndi, kat keebe awo mbuuluk paga nen tili paganit wage menggendak nogo inom, eeke logot o. Eeke ti paga yeenggwa kiri wage, Aakumi inamineeri ne agan nage, Eerigin kwa?

¹³Yi wone ndi wone ambik aret yokkegak mban eekwi ti paga anggon eekkabit unggwage kagarak me, It nen mbogut age menggerak liippunuk, yokkugwi, It laaluguragan pekkagak, Ndogop eeke kaamunggun o, yinuk, tut ngget penenggak eeke paga yokkugwi, Eeka nogo nen Peebi eeppagarak koonak nogo eeppagakwak, kagap ndari woraawak o.

¹⁴Wiiringga kani ne ambit pup eerogo nengge menggi kwak it ti, togop aret eeginabigin me, Kani wunuk ari me nen ineebe mbo nagun mondok lek o. Kani wunuk ari nogo ti, kani anggen kwak, Togwi worakkologwe kwak, Wonage lek kani eyak alik mendek aret o.

¹⁵It aap wone yokkirit unggwogwe, Keebe mbuuluk paga nen kinom eerit nugwi, Eekwi nogo ti, Ambi eeppagarak lek kagak yokkugwi, It ambi nen kagap ndariyak lek kagak, inalitik-inalitak inoone ugun-ugun agan nugwi, Eeko agaarik o,” yinuk, yoge kagarak o.