Read Western Dani Yetaya 5 Bible Online

Yetaya 5 - Western Dani bible

Yetaya 5

¹ Nore niniki kunik eeke nogo ake ndawi wake, At eyabu anggur yarak ndawi paga anep pege, Eerigin nogo yi o. Nore niniki kunik nogo puut elan me anggween mili paga anggur awi yarak wonagagerak.

²Yarikit nduk nggween kabungge, yugum nggiginogo nappege, Anggur awi obeelom mendek mban leenogo yake, Arum logorak oolo time eyo ndoonogo pi lagangge, Anggur anggen aambiranggo logowam yugum nenaarogo pege, Eerogo punuk, Anggen abe yuwak nduk tokkage nagagerak kwe, anggen abe mendek yuulik ale mendek mban yereegerak o.

³Togop me, at niniki kunik nen ari logonet, “It Yerutalem wonogwe inom, it o Yekura mendek inom, inaruk o! An anggur anggen abe mbanggolaakit nduk, neyabume anggur awi yake logonet, nano eeriyak me eekirak mbakop? Ndi, anggen abe mbanggolaakit nduk, tokkage neegak, nonggop nduk ale mendek mban yegerak mbakop? An nen eekirak paga agaarak ilik, anggur awi yarak alik nen agaarak a? It mban liippuwak o.

⁵Neyabu anggur yarak eeriyak nogo ti, yora o. Neyabu anggur yarak eyagat wurik nogo minogo pege neenok, lek eerogo nunggwi, Yugum yagat wurik langgunogo pege neenok, nggwiya unggunuk, iniyok aan lebenogo pit nogwe, Eerugun o.

⁶Neyabu anggur awi yarak nogo anggup mbanogo nagabit nage, mogot mbanogo pit nage, Eerigin lek nggween nggwi-nggwi mban eerogo piminggirak me, Nggonggoondu penggaarogo pege, alok-palok mban lagangge, Ndugwi nen o mayu wuppi wage kero, Mage, yoriminggirak me, nggween mbuk age, Eerigin o,” Yegerak me, yokkiragi.

⁷At Omaawi Lombok Menggerak Aliku ALA eyabu anggur yarak nogo ti, kit Iterali mendek aret. Ndi, kit aap Yekura mendek ti, anggur awi yarak at inikilom mbake kwak aret me, “Eekaatak a'me nggelok eeppiigwi iyaamun ilik?” yinuk, tokkiige nagagerak kwe, kit mban-mban kinamiya wun-wun yogwe, “Obeelom mban eerit nugwi iyaamun ilik?” yinuk, tokkiige nagagerak kwe, at ambi nen at ambi maluk eeppegak eerit nogo logonet, leenggu maakwi, Eekwi kiige nagaarak o.

⁸Kit nen aakumi inawi tek kunggun wurik abok aret kunggo'net nogwe, Ineyabu agigan-ogugan aago abok aret unde eekko'net nogwe, Eekwi nogo kinabuwa o! Ti eerit nogo logonet, aakumi ando logorak lek Kit kinalik mban o yime unde eeppatinuk logorak mba'nuk eekwi kiigi o.

⁹An naruk konengge neegak, at Omaawi Lombok Menggerak Aliku ALA nen yegerak nogo yi aret. “O yo'nggok obeelom wurik apit aret aakumi wonaga'lek o wuum lu agan nage logogin o.

¹⁰Ineyabu anggur awi yariyak ti, Aap ineebe 10 inawuri inom ne ambit yabu yagat worok togon waganggwi iinok, Yaremenggaarak anggen mbambunuk, aambiranogo togolowak ambiriluk aret tookkologwe, Gandum awi togolowak kole nderom me yonggolak yumbunit namenggaarak nogo Anggen mbanogo togolowak mbuura'luk yeeriken me yonggokkologwe, Eerugun,” yegerak o.

¹¹Togop me, it o kuubondendok ineenik a'nuk amburu kumili aganaka nawok nduk, kwaarit nogo nagaatik, Kwaappunuk, nunggwi tit iigak, oonikiya ari nage paga kumili aganake nogo inabuwa o!

¹²Laago lako logonet, nggitat nggwok inom, mbuuluk inom, lobale eeka inom, nggawiwak inom, Oone eeko logonet, anggur amburu mban nonggo menggaarak kwe, At Aliku ALA eeke menggerak nogo inigen kogwe, At Aliku ALA eerit nage nogo iniki liippugwi, Eeka'lek aret wonogo agaarik o.

¹³Togop aret me, It an napuri iniki abu liippugwi lek kobak wonogwe me, Aakumi keele maageren piya nogo menggam piya nogwe, It aap inendage warak nogo mbi abu nen kambit nogwe, Inapuri ambik aago nogo logonet, niyo abu nen yagan yobak-nggolak warit nogwe, Eerugun o.

¹⁴Ndi, kambunuk nogo menggam nen eenggi walok ari, Ambe nggwok pan aago wakkoorak meek logonet, “Yime yonggo'nari woraanip o,” ari, Eeke kenok, It aap inoweewi nagawan-nagawan wambi nogwe, Aakumi ugun it ndugwi pega inom, kumili-kumili agan nega inom, yonggo'nari wanggwi, Eerugun o.

¹⁵Inendage lek inendage warak imbirak tebenogo piige, Iniki wogoppatit inigen mbogut paga nugwi nogo inenggali aruwak nduk, eeppiige, Eerigin kwe,

¹⁶At Omaawi Lombok Menggerak Aliku ALA nen eekaatak a'me nggelok eeppiyamenggerak paga endage tiyak ari, At kikak nakeelik alik leenak menggerak Ala ti, obeelom mban eerit nage paga at kikak nakeelik alik leenak menggerak nogo ineenu eeppiige, Eerigin o.

¹⁷Ti eeke kenok, O kota yigirogo pugun nogome ndomba inagari'ngga nenet nugu menggam kwak nenet nugwi, Aap ineenggi warak inawi wurik langgunogo pugun nogome kambin inaagalogwe inom inambi kwaarogo nenet nugwi, Eeko logogun o.

¹⁸Iri'ngga keele pugumbunuk nikkenok nogo mengga kwak, it aap pilit agan nugwi paga maluk wiganogo pit wundi nogwe, Ndi, nggweendoongga keele pugumbunuk, nikkenok nogo mengga kwak, maluk nikkenok unggwi wogwe, Eekwi ti, Mondok inabuwa o!

¹⁹“At Ala nen eeriyak mbake nogo eeke ninigen kaawok nduk, elaambirik lek mbet-mbet aret eeruwak o,” yogwe, “At Kikak Nakeelik Alik Leenak Iterali inogoba woroorak kooneegerak nogo nineenu aruwok nduk, Mbet panggo yi woraayok o,” yinuk, yogwe, Eekwi ti, Mondok inabuwa o!

²⁰It aakumi nen maluk kagak, “Obeelom aret,” yogwe, Obeelom kagak, “Maluk aret,” yogwe, O apit kagak, “O eya,” yogwe, O eya kagak, “O apit,” yogwe, Ale kagak, “Ale lek,” yogwe, Ale lek kagak, “Ale warak o,” yogwe, Eekwi nogo ti, Mondok inabuwa o!

²¹It aap nen, “Nit abu niniki warak aret,” yogwe, “Nit yi wone ndi wone abu nineenu aret,” yogwe, Eekwi ti, Mondok inabuwa o!

²²It aap anggur amburu nengga iyagalo inom, Amburu kumili aganaka nenggelak-kenggelak eeka unde inom,

²³“Wu kolaawok,” mba'nuk, aap maluk eekerak kagak, teppogo logonet, Aap maluk eerulik abe kagak awone yiluk-yiluk mbangga inom, ti, mondok inabuwa o!

²⁴It aap ti, at Omaawi Lombok Menggerak Aliku ALA yereegerak liiru mbanak nogo mbo pugwi, At Kikak Nakeelik Alik Leenak Iterali inogoba Ala ari nagagerak nogo meek eerogo pugwi, Eekaarak me, Kani omoonuk wunuk ari logonet, wiiringga mbanak ne ambit pup eerogo nengge, Kani omoonuk wage logonet, iri'ngga mbuk ne ambi lek eerogo nenet nage, Eeke menggi kwak, Ineebe togop aret eeginake logonet, eyo omanggen pili arit unggwage, Liirubu kwak iri'ngga laambu o wiya nen wonok nage, Eeke menggi kwak eeginabigin o.

²⁵Togop aret me, Aliku ALA apuri eekwi paga anini nen mi'nage logonet inooke, Puut-puut ndipuk eeke logonet, inambebuk tu paga yumbunik-telenak eerogo pogo mengga kwak, Aakumi inowak nogo togop eerogo pege, Eeremenggerak kwe kagak, Ala anini mi'naremenggerak nogo lek arigin lek wonage aret logogin o.

²⁶Yi aakumi ndi aakumi o ndaanda wonogwe nogo woraawak nduk ndiimbu walok ari, O irip-irip wonage nogo kuum eerogo nappege, Eeke kenok, Mbet-mbet wogwe, nggare agan wogwe, eerugun o.

²⁷Wogo logonet, inowak lek age, iniyogobit lik yagak wogwe, Nogo yigin eeginake, nogo yit wogwe, eeka'lek kunik-kunik aret wogwe, Inagabee'le nggonok yaga'lek nggerok togon eerak wogwe, Iniyogogut keele piyok yaga'lek wogwe,

²⁸Inomaale ndiiwi ineenggime wonage, ineegin agale wulanak wonage, Inaguda iyok enegen moolingget negen wonage, Inanggweendo wim eeka iyok nogo ti, o wiya nombok-kombok eeke menggi kwak perek-parek eerit wogwe,

²⁹Singa oone kole ari menggi kwak inoone ya-mba agan wogwe, Singa awooluk inoone nggwok yu-ku yogo mengga kwak agan wogwe, It noorak ineyak nggeronggogo logonet, inogomut oone yogo mengga kwak yogwe, Waketak nogo eyak me nggereninuk nage me, ndiniyak meek menggi kwak eerak nogwe, Eerugun o.

³⁰Ne ti eyom paga niyo laut yenggenak oone wo ari menggi kwak, wim nggoguk ari kagak, It wonogo menggam yumaak eerak wonage, iniki ma'nage, Ndugwi nen o eya apit eerogo pege, Eerigin nogo Inigen kaagun o.