Read Western Dani Yetaya 50 Bible Online

Yetaya 50 - Western Dani bible

Yetaya 50

¹At Aliku ALA yegerak nogo yi aret. “Kwe yi neebi o, yinuk, wumbege logonet ninarum wonogwe inenggaanom paga liiru mbanogo kagalo wogoreegirak ngge o? Ndi, an nanomat mbanak porogo wonogwe me lek aruwak nduk, keebe waganogo ayeloman logonok nduk wogoreegirak aap ta o? Lek aret o! Kat maluk eeke keenok, aakumi inayeloman logonok nduk, keebe waganogo aakumi wogorage, Kat maluk eeke keenok, Kagalo neebi o, yinuk, mbo pege, Eereegirak o.

²An wagarak kwe, aap ineebe lek aret iige, An i'mbanggirak kwe, aap ambi oone yo'nega'lek wonage, Eekaarak ti nonggop nduk? Wondet eerogo pagarak neenggi kuwagaluk mbake, Ndi, kagap ndariyak nomaawi lek mbake, Eeke agandik ya? Niyo laut yenggenak, Porok yu o, yoge neenok porok ari, Niyo wage menggim niyo lek karume aruwak o, yoge neenok, age, Eeke kenok, Niyo lek me, niyo abu nen ikan niyoome wonogwe nogo abok kanggwi, inobari alik negen aret ndi wukwi, Eeko menggaarak.

³An nen mbogut nogo yumaak aruwak nduk, yum kwak lenggenogo pege, Yum nibinik maluk mendek yiko mengga kwak yirippege, Eeke minggirak kagak, Eekeelik nombake keegi o,” yinuk, yoge kagarak.

⁴Aakumi inomaawi lek agaarak wonogwe nogo iniki eyak wappiyoorak wone neenu arikit nduk, Aliku Itok Menggerak ALA nen, “Ndogop yu o,” yinuk, mamunnake menggerak o. Ko'lu-kii'me kubondendok paga neenik eerogo panege, Aap ambi mamunirage kenok, apuri inaruk liirogon konenggo mengga kwak, naruk liirogon konengge logokit nduk, eeppanege, Eeke menggerak.

⁵At Aliku Itok Menggerak ALA nen naruk liirogon konengge logokit nduk, eeppanegerak me, “An koneniyak neebi,” mbake, nena nomok ari, Eerulik o.

⁶ It an nooriyak eekwi iinok, nambot wogorage, Namboro wiiriyak eekwi iinok, nena koonogo nagiige, It meek eerogo panugwi, inawoori lengge eerogo panugwi, eekwi iinok, nenete kumaakkolaga'lek aret wonage, Eekirak o.

⁷At Aliku Itok Menggerak ALA nen yeenggwa nege me, nendage maluk aga'lek aret agarik o. Yugum nu'lek menggi kwak an mondok nogogumbuk nu'lek logokit nduk eekkolagarak me, Nenggali arigin lek neenu aret agarik o.

⁸ An naana'le mbangge menggerak nimbirak aret wonage me, Aap ta oone omaawi paga, “Kat ndogop eekendak o,” yinuk, yo'nirigin mbakop? Wonage kenok, nimbirak wakkaawok nduk, neya wage, “Ndogop eekendak o,” yinuk, yo'niruwak nduk, nenggali wappani wage, Eeruwak o.

⁹Aliku Itok Menggerak ALA nen aret naana'le mbangge me, Ta nen, “Kat maluk aret o,” yo'nirigin mbakop? Lek aret o! Yum ti mban ko'lu-kii'me yirike paga nibik ari menggi kwak, Yum kutaabak nibingge menggi kwak, It aap ti, togop aret arugun o.

¹⁰Kit kinenggela'me nen at Aliku ALA agabiti mbake, At ayeloman wone ari kenok liirogon eeke, Eeke menggerak ta wonage agaarik o? At o eya paga nageelik apit paga wonage logonet eerit nage nogo nen Aliku ALA abet mbake, At ogoba Ala iniki oba panggombege, Eeruwak o.

¹¹Eya lek kenok, kani wunanggwi, Ndi wunanogo pakwi, eekwi kit perak, Kani wunanggwi, ndi wunanogo pakwi, eerumonggotak eya nogo paga eerit nogo logonip o. Ala nen eeppinagarak koonogo pereegerak nogo ti, Kit yagan wako logonet kambuurak ti aret o.