Read Western Dani Yetaya 52 Bible Online

Yetaya 52 - Western Dani bible

Yetaya 52

¹ O Tiyon yi wae. Pilak yu o. Pilak yu o! Yum yiko mengga kwak komaawi eekkolage, O kota abe alik leenak Yerutalem yi wae. Kayum abe yirik keenok, “Wi,” kugwi nogo aret yikkolage, Eeke logot o. It aap inagabolo mbanak lek maluk inoba lenggenak wonogwe nogo nen kinikime ambinom unggwi woraagun lek aret o.

²Kat Yerutalem yi wae. Liirubu keebe paga lenggenak wonage nogo yumbunogo nappake, Mi'na'nuk aa'nduk tiyanak wonagagindak kwak age, O Tiyon Aagalukwe keele maarak wonage kat yi wae. Mbutigeele kenggaanok paga yilinik wonage nogo piinogo nappake, Eeru o.

³Aliku ALA nen yegerak nogo yi aret. “At Yerutalem ti, at onggo mbanak lek we aret aakumi ineenggime piyareegirak me, Onggo wogoraga'lek we aret waagin o,” yinuk, yegerak me, yokkigi o.

⁴Aliku Itok Menggerak ALA nen yegerak yi aret. “Aa'nduk an napuri o Metit time aap nggiru negen logonuk woraawak nduk, nogogwaarak. Ti'nuk, it aap Atiyut mendek nen alom lek kagak ugun tebembiinok wonogogwaarak o,” yinuk, yegerak.

⁵ Aliku ALA nen ambi ari logonet, “Alom lek kagak napuri ugun wogoren nogwe, It aakumi inarum wonogwe nen meek eerogo piigwi, Eekwi me, An yogondak nonggop eeppiyoorak mbake agarik o?” yinuk, Aliku ALA nen yegerak o. “Kubondendok nen nok oonikiya ari nage kagak nendage miyuk-meya eerogo panegak eeko agaarik o.

⁶Togop aret me, napuri nendage ineenu ogwe, Togop me, Ti eyom paga eerigin, yoragaarak nogo ti, an nen aret yagarak ineenu ogwe, Eerugun o. Ndi, yagarak ti, an nen aret yagaarak o,” yinuk, yegerak me, yokkigi o.

⁷ It aap wone obeelom wone wonok wogwe, Lambumbagarak wone agan wogwe, Obeelom eeppagarak wone yokkiri wogwe, Kagap ndariyak wone yokkiri wogwe, Kogoba Ala ti, endagembogut aret o, yinuk, kat o Tiyon yokkugwi, Eekwi nogo Puut paga kin ari wogwe iinok, kiniki ale'nggen alik negen nggelok yigin me, iya o!

⁸It aap keebe karum menggaarak nogo nen Aliku ALA iyokan o Tiyon wage inigen abet nen kogo logonet, inoone tiyarogon yogwe, Ambugwi aret inale'nggen paga keekok yogwe, Eekwi ti, karuk konenu o.

⁹Aliku ALA nen at apuri iniki eyak wappiige, Kat Yerutalem wondet eerogo pagage, Eekerak me, Yigirik-noonom eerogo pagagaarak kat Yerutalem yi wae. It kinom abok aret kiniki ale'nggen nen keekok yogo logonip o.

¹⁰Aliku ALA nen yi aakumi ndi aakumi inenggaanom paga at eenggi abu omaawi alik leenak tiyappunuk wonage kenok, Aakumi o nggween irip-irip wonogwe abok aret ninogoba Ala ninagap ndari wage inigen kaagun o.

¹¹ Wundi woraanip o. Wundi woraanip o. O time nen wundi woraanip o. Maluk mendek ambi kineenggime lek wundi wogwe, Aliku ALA awi wurik me yi mendek ndi mendek eekak wonok wogwe nogo Kinoba mbeenogo patinuk wonok wundi wogwe, Eeko logonip o.

¹²At Aliku ALA kinaame a'nuk aa'nduk wage, Iterali inogoba Ala kinage mbanit peebi aret age, Eerigin me, Kit mbet-mbet wundi wogwe, Kole mondok mbe agan wogwe, Eerumunggup lek o.

¹³Aliku ALA nen ari logonet, “An nayeloman nogo iniki warak lombok logonet eerit nagin me, Endage tiyappugwi, wogoppugwi, eerit nogo logogun o.

¹⁴At enete ti, aap inete aret kwe, wakwi paga nano inete negen eerogo pege, Ndi, eebe aap aret kwe, wakwi paga nano negen age, Eereegerak me, It aakumi abok aret nen, Iya! yinuk, ineenggi ineyak mbanggologogwaarak.

¹⁵ Ti ndak-ndak at eerit namenggerak paga yi aakumi ndi aakumi abok aret, Iya, yinuk, pi wakwi, Ndi, yi aap ndi aap inendagembogut kunduk, at eeke inigen kenok, inoone-inambe ambi yaga'lek puk aret ogwe, Eerugun o. Yoraga'lek nogo eeke inigen kogwe, Ndi, inaruk konengga'lek nogo, konembunuk ineenu ogwe, Eerugun me, Inoone ambi yaga'lek puk aret logogun o,” yinuk, yegerak o.