Read Western Dani Yetaya 56 Bible Online

Yetaya 56 - Western Dani bible

Yetaya 56

¹Aliku ALA nen yegerak nogo yi aret. “An nen inagap ndariyak nogo abu panggoni wage, Yoragagirak ndak-ndak obeelom eerogo piyoorak mbet-mbet kin ari wage, Eeke me, A'me nggelok eeppiinet nogwe, obeelom mban eerit nogwe, Eeko logowak o.

²It aap wone ti ndak-ndak eerit nogwe, It aakumi ndarak nen wone ti, nggirik-nggerok porogo wonogwe, Eeko logonet, Nogo 6 yippunuk, ko'lu yonggonggologo logorak wone taganogo pega'lek ndak-ndak eekwi, Maluk eeka'lek abe mban eerit nugwi, Eekwi iinok, Inale'nggen logogun o,” yinuk, yegerak o.

³It aap inambik ambi Aliku ALA apuri inom agagerak nogo nen ari logonet, “Aliku ALA apuri ninom kuwak eeke neenok, Mage, yo'nirigin mbaki o,” yinuk, ari, Ndi, it aap inooli wogo ambi nen, “An eyo mbuk kwak aret agarik o,” yinuk, ari, Eerugwaarik o.

⁴Aliku ALA nen yegerak nogo ti, alom yi nduk, yegerak o. “It aap inooli wogo nen nogo 6 yippunuk. ambi 7 paga yonggonggologo logorak wone yugu liirogon eekwi, An eeriyak mbake nogo, Eeruwok o, yinuk, eekwi, Wone abuk nggaruk togon koonogo pereegirak nogo nggirik-nggerok porogo wonogwe, Eekwi iinok,

⁵Inapuri wologwe inom, komologwe inom, ndaganaburak ti iya aret kwe, ndaganaburak meek me, Inendage inom, inoba aberak logorak mendek inom, ineenu agak nawi wurik kobat yendok-wandok nabenak inikime mippiminggirak nogo ti, mondok iya o. Ti eeriyak nogo ti, inendage lek aga'lek mondok ki logowak nduk eeppiyaagin o.

⁶It aap inambik nen Naliku ALA nake eerit nogwe, Naliku ALA nendage iniki kundugu eekkologwe, An nayeloman mini ogwe, Nogo 6 yippunuk, ko'lu yonggonggologo logorak wone taganogo pega'lek liirogon eekwi, Wone ninom abuk nggaruk togon koonogo pereegirak nogo nggirik-nggerok porogo wonogwe, Eekwi nogo, Mondok aret eeko logogun o, yinuk, yogwe iinok,

⁷ An nen it aap ti wogoren nabuut alik leenak nogome piya nage, Tamban eeko menggam nawi wurik me iigak, inale'nggen kaawak nduk, eeppiige, An nake kani kunggo menggam warogo wo'nugwi, nake we wo'nugwi, eekwi nogo aret wagangge, Eerigin o. Ti eerigin nogo ti, Nawi wurik ti, yi aakumi ndi aakumi inanebunu lombok tamban eeko menggam aret, yogo logowak nduk, eerigin o,” yinuk, yegerak me, yagi o.

⁸Aakumi Iterali mbo piya nogogwaarak wonogwe me nen wogoren wagagerak Aliku Itok Menggerak ALA nen ari logonet, “An kuwak eerogo piyareegirak wonogwe iigak, It aakumi ando inom lambunna'nuk logowak nduk wogoren piya woraagin o,” yinuk, yegerak o.

⁹Kit ndiimbu-nggwiya karume monggotak abok aret yi wae. Wa'nip o! Kit ndiimbu-nggwiya eyonggaame wonogwe yi wae. Na woraanip o!

¹⁰Iterali inarum waka nogo ti, inigen mbuk kwak wonogwe, Yi wone ndi wone ineenggo'lek wonogwe, Nggeewo nggwak yogolik iniki apit mengga kwak wonogwe, Nogo yuurak inikilom nen nogo yit nugwi, inabi mban kanet nogwe, Eeko menggaarak.

¹¹Nggeewo nen, “Abu nenggi o,” yinuk, mbaka'lek inaanogum andi lek lagap mban agan nugu mengga kwak, it aap ti togop aret wonogwe, It aap ndomba ndegeninaka nen inaanggumi ndegeninaburak kobak mengga kwak wonogwe, It abok aret eeriyak mbakwi nogo mban mugurok nogwe, Inalitik-inalitak ineenggi warak eekkoloorak mban kwaarit nugwi, Eeko menggaarak.

¹²“Anggur amburu noorak wa nagin me, mok o! Yogondak nunggwi kwak lek, ko'lu abu alik negen ndonggok togon nunggo logogun me, Amburu omaawi mendek yi, yogondak kunduk ndonggorogon nunggo logowok o,” yinuk, yogo menggaarak.