Read Western Dani Yetaya 57 Bible Online

Yetaya 57 - Western Dani bible

Yetaya 57

¹It aap iniki abe koonak kanggwi iinok, aap ando nen, “Aap ti kanggi o,” yinuk, iniki liippakwi, It aap obeelom mban eerit nugwi nogo iniki nggigik togon wungge kenok, it ando nen yelok kogwe, Eekulik aret menggaarak o. Ko'lu maluk mendek ambi inoba age kero, it aap iniki abe koonak nogo iniki nggigingge ineenu aruwak nduk, Eeke menggerak kagak liippega'lek aret menggaarak o.

²It aap iniki koonak logonet eerit nugwi nogo iniki ugun tayenak menggam unggwogwe, Kanggo nagaatik, yonggonggologo menggam yonggonggola unggwogwe, Eeko menggaarak o.

³“Togop kwe, it kumi tili mbangga inaagalogwe ti, Kumi ugun-ugun eeginabit nega mendek wiganak inom, kumi mbabilu paga ndarak inom, nogo aret me, it yime woraawak o.

⁴It nen ta agi'ndok kanggwi, Inamili penak paga ta meek eerogo pugwi, Eeko agaarik? Obeelom wone eeriyak nineebi mbaka awi inom, pilit pugungga ndarak inom, it aret nogo lek a?

⁵Eyo ndiindi alome inagugi eeko logonet, iniki aganggen eeginabuwak nduk eekwi, Eyo win wiganak alome inagugi ayuk wuko logonet, iniki nengge kenok, kumi ugun-ugun eeginabit nogwe, Eegwa'me inom, yugum ambe nggaganak me inom, inagugi inake inapuri inoorogo wogorogwe, Eeko agaarik.

⁶Inagugiwak ti, yugum eraabin ambik niyoome mendek waganggaarak ti, Yate kwak kolagaarak ti aret o. Ti aret koloorak mbakaarak me aret kolagaarak o. Inagugiwak yugum ti, oba amburu kilirogo pugwi, Gandum anggen yigirik nogo oba yumbunogo pugwi, Eekwi iigirak o. Ti eekwi iigak, an niniki yanggoppunuk nonggop togon puk logorak? Lek aret o!

⁷It nen puut nggorek ayuk warak paga lagi nanuk kumi ugun-ugun eeginabit nugwi, Time aret kugi aanggo warogo wogorogwe,

⁸Iname unggunuk, tu unggwogo menggam taati kumi ugun eeginaka inogut eerak mippugu nogo alut eekwi, An mbo paninuk, inagabolo kin eerak kagak nogo yogo menggam lagi nanuk, iniki liippega'lek ugun-ugun eekwi, It paga iniki nengge kenok, Togop eeko logowok o, yinuk, inom wone koonogo punuk, Inagabolo kin eerogo piinok, pegiinet nanuk, eeginakwi, Eeko menggaarak.

⁹It nen amburu obari abe mendek wonok kugi Molok alut eerit nogwe, Obari abe eeka mendek inagabolo paga eekwi, It aap o nda time inagugi ninom eeruwok o, yinuk, yonggo nappugwi, Aakumi kambunuk nogo menggam lombok kwaarit wambi nogwe, Eeko menggaarak o.

¹⁰It inagugi kwaarit o nda nugu logonet, ta'liila eeginake kenok, Yi we aanom warogo eerit nogo ogoorik o, yinuk, yuurak kwe, togop yaga'lek Iniki aganggen eeginake ti'nen wogoren nage me, inomaawi lek aga'lek kagak kwaarit nogo agaarik o.

¹¹It ta paga inagabiti mbakwi, inaganak wake, eeko logonet, an mbo paninuk alik mugurok nogwe, Noba abe'nakwi lek kobak eerogo panugwi, An ndogop eeke yi, iya! yinuk, iniki liippega'lek wonogwe, Eeko agaarik? An wone yoraga'lek puk wonage neenok, nayuk wuka'lek agaarik ya?

¹²Maluk kagak, Nit obeelom eekwi, mbakwi inom, eerit nogo menggaarak abok aret inom, kin paga yoroorak kwe, Wone ti, liippugun lek me, we aanom warogo aret yoroorak o.

¹³Yeenggwa niret o, yinuk, inoone nggwok paga yogwe iinok, inagugiwak kuwak eerogo piigaarak nen aret inagap ndaruwak o! Inagugiwak ti, o wiya nen wonok nage, ambe aagi paga wogoren nggarek ari, eerigin kwe, It aap ineebe op logowok nduk, nabu'me ari wogwe iinok perak, Yate kwak o nggween yi kologwe, Nabuut alik leenak yi, it unde eekkologwe, Eeko logogun o,” yinuk, yegerak me, yokkiragi o.

¹⁴Aap ambi nen ari logonet, “Tu koonogo piige, tu koonogo piige, eeke logot o. An napuri woraawam inaru non mbanak wonage nogo worenogo mbo pege logot o,” yinuk, yigin o.

¹⁵At endage Kikak Nakeelik, Alik Leenak, Abu Tiyanak, Ayuk Warak, Mondok Itok Menggerak nen ari logonet, “An o abe alik leenak abu tiyanak minggim wonage minggirak kwe, It aap, An maluk eekirak, ao, mbakwi nogo iniki ale'nggen eerogo piige, Iniki tebenak wonogwe iinok, iniki eyak wappiige, Eerikit nduk, It aap, An maluk eekirak, ao, mbakwi inom, iniki tebenak inom, ninom wonage minggirak o.

¹⁶An neegak it aap iniki lek-lek arit unggwogwe, An ogobakkigirogo piyareegirak inambe aagi lek ogwe, Eerukwak, Maluk eekotak o, yinuk, mondok-mondok lok togon yorage, Mondok-mondok nanini inoba piige, Eeke logogin lek o.

¹⁷Yi mendek ndi mendek koloorak mban uugwe mbarit nogwe paga nanini lombok inombake, Aaninggin inoba pege logonet, nanini nen nambot wogorage, Eeke neegak, Inanobak yugum kwak eeppatinuk, tu alik paga nomoninuk nogo nogogwaarak o.

¹⁸Eerit nogwe nogo an iige nagagirak kwe, Obeelom eerogo piige, tu obeelom paga wogoren nage, Iniki tayenak logowak nduk, aa'nduk wonogogwa kwak eerogo piige, Eerigin o.

¹⁹ Ndi, it Iterali iinok iniki puru yogwe nogo iniki kwippiige neenok, nalut eeko logogun o. Naliku ALA nen it aap koorok wonogwe inom, nda wonogwe inom, iniki ugun tayenak logowak o. An nen obeelom eerogo piyaagin me, iniki ugun tayenak logowak o,” yinuk, yegerak o.

²⁰Togop eeppiyaagin yegerak kwe, it aap maluk mendek nogo perak, Niyo laut abolok lek wonageelik tiyak-tebek eeke logonet inambebuk koo'nuk nage, Purok mbanogo nippit wage, Eeke menggi kwak Togop aret wonogo menggaarak o.

²¹ “It aap maluk mendek nogo iniki ugun tayenak logogun lek o,” yinuk, Nogoba Ala nen aret yegerak o.