Read Western Dani Yetaya 58 Bible Online

Yetaya 58 - Western Dani bible

Yetaya 58

¹At Aliku ALA nen ari logonet, “Eeppiyoorak wone yokkege yi, koone mbuuluk paga ari mage o. Ata, koone mondok nggwok paga ari, Oone nggwok eeka trompet oone eeke menggi kwak koone ari, Aliku ALA nen yokkirage nogo, Eeriyak nineebi, yogwe ti, nonggop nduk yogwe o? yinuk, an napuri yorage, Kit maluk ndogop aret eeko ogotik o, yinuk, it Yakup paga wiganak nogo yorage, Eeke logot o.

²It aakumi ambi mendek nen obeelom mban eerit nugwi, Inogoba Ala kwak nen, Yogop ee'nu ndogop ee'nu, yorage nogo mbo pega'lek aret eerit nugwi, Eeko mengga kwak, Eerit nugwi negen eeppunuk logonet, Ko'lu-kii'me an eeke minggirak ineenu aruwak nduk an kwaa'nabit nugwi, Ninawone amburu liirogon mbambunuk eekoorak onggo ndak-ndak eeppinaniyak o, yinuk, yo'nugwi, Ndi, inikilom negen eeppunuk logonet, nalut eeri unggwogwe, Eeko logonet,

³Nit ninambe mage negen wonogwe niigak, kat pe'niige, Niniki tebeppakoorak kwe, liippinanege, Eeka'lek Nonggop nduk wonage agandik o? yinuk, yo'nogo menggaarak. It togop aret yo'nogo menggaarak kwe, Inambe mage negen logonet eekwi nogo paga eeriyak mbakwi mban eerit nugwi, It wu kolaawok nduk inake eekwi nogo onggo ndak-ndak wogoraga'lek wi-wi aganakwi, Eeko menggaarak.

⁴Inambe mage negen eeppunuk wonogwe ti eyom paga neebi-keebi yit nogo logomenggaarik, irip paga wone wakwi, Yawi pit nogwe, ineenggi kepulilin yogwe, Eeko menggaarak me, Yogondak inambe mage negen logonet eekwi yi kwak eekwi iinok, At tiyanak lombok menggim menggerak nogo nen ninoone aruk konengge agaarik o, yinuk, yugwaarik o.

⁵Ne ambi paga iniki tebeppatinuk inambe mage negen logonet eeko logorak koonogo pereegirak nogo ti aret me, yinuk, eeko agaarik ya? Mbereewak yuwo-yuwo aago menggi kwak ina wandu aago wonogwe, Yum nibinik maluk mendek mbiganogo wun yumbunogo punuk, at paga lagak-mbagak yogwe, Eeko menggaarak nogo ti, Inambe mage negen logonet, eeko logorak nogo ti aret me eeko agaarik? Ninambe mage negen logonet eeko logorak, yogwe ti aret a? Aliku ALA inikilom mbaruwak nduk, Ne ambi ninambe mage negen logorak, yogwe nogo ti aret a?

⁶It aakumi maluk eerulik iigak mbutigeele maarogo piigaarak nogo piinogo piigwi, Tapi eyo aaninggin inuut paga piigo mengga kwak it aakumi togop eeppiinok wonogwe nogo piinogo wumbiya wogwe, It aakumi tebembiinok wonogwe nogo wondet eerogo piigwi, Aaninggin-paaninggin inoba wonage nogo teeluk eerogo piigwi, Eeriyak nogo ti, Aakumi inambe mage negen logonet eeko logorak koonogo pereegirak ti aret nogo lek a?

⁷ It aap inambi abu wonogwe iinok, inambi magarogwe, It owunik nugwi iinok, iname wogoren piya unggwogwe, It inayum yirik lek inagabolo kin nugwi iinok, inayum yippiigwi, Aap it mendek iinok, ineebe kumaa'naga'lek wogonakwi, Eeko logorak nogo ti, Inambe mage negen logonet, eeko logorak koonogo pereegirak ti aret nogo lek a?

⁸Ti aret me, ti eekwi iinok, o kilin nagake menggi kwak eya pindanogo piige, Inawinde-inobaande aago nogo mbet-mbet lek eerogo piige, Eerigin o. Iniki abe koonak logonet eerit nugwi nogo, inabok aa'nduk konenit wogwe iigak, ineebe peebi wogwe, Ndi, Naliku ALA tiyanak neenok, Wi! yogwe nogo, inambokan mulunik kagak wogwe, Eerugun o.

⁹Ti eeko logonet, Naliku ALA yo'nugwi iinok, an nen wone onggo yorage, Yeenggwa niret o, yo'nugwi iinok, an nen, An yime agarik o, yinuk, yorage, Eeke logogin o. Tapi eyo aaninggin inuut paga pogo mengga kwak it inoreewi aaninggin inoba piigwi, Inoreewi inenggali wappiigwi, Meek eerogo piigo logonet, inoone lok togon yorogwe, Eekwi ti, mbo punuk,

¹⁰It aap mbi abu wonogwe iinok, it noorak mbakwi nogo aret wogorogwe, It aap tebenak mendek nen, Ndi mendek wo'niraawak lak, mbakwi iinok, wogorogwe, Eekwi iinok, It eya eeginake nogo o apit aago wonage nogome eya ari unggwage, It kunduk o apit aago wonogwe nogo o liingge eya kwak eerogo piige, Eerigin o.

¹¹Naliku ALA nen pigiren nage, Niyo lek nggween woloonak paga wonogwe iinok, yi mendek ndi mendek obeelom wogorage, Inomaawi eerogo piige, Eerigin o. Yi mendek ndi mendek yarak nogo obeelom aruwak nduk niyo kilirogo pogo mengga kwak eerogo piige, Niyo eneeri porok arilik kila-kila wungge menggi kwak eerogo piige, Eerigin o.

¹²O aa'nduk lombok ogowa pugu langgunogo pereegwaarak nogo inapuri nen obaane'me pit nogwe, O maan togon yigirik-noonom eerogo pereegwaarak nogo obaane'me wukwi, Eerugun o. Ti eeremenggaarak paga it aakumi nen, Yugum Pak Wurik Langgunik Obaane'me Wuka, yorogwe, Aakumi Logorak Tu Koonogo Piinet Naga, yorogwe, eeko logogun o,” yinuk, yegerak me, yokkiragi o.

¹³“Nogo 6 yippunuk, ko'lu paga yonggonggologo logorak wone taganogo pugwi lek liirogon eekwi, Ne an Ala nake leenogo pateegirak nogo paga it eeriyak mbakwi nogo lek an eeriyak mbake nogo mban eekwi, Nogo 7 paga yonggonggologo logorak ninikilom aret, yogwe, Naliku ALA nen ne leenogo pateegirak nogo ayuk wukwi, Ayuk wuko logonet, it eeriyak mbakwi nogo eeka'lek mbo pugwi, Eeriyak inikilom mbakwi nogo eeka'lek teppugwi, Inoone ugun-ugun yaga'lek liirogon mban agan nogwe, Eekwi iinok,

¹⁴Naliku ALA nen eerogo piige paga inale'nggen mbakwi iigak, Yi aakumi ndi aakumi it inanggween mbanogo wogoraagim paga wonogwe nogo abok aret inayuk wuko logowak nduk eerogo piige, Ndi, it inombo Yakup anggween yate pereegim unde wonogo logonet, anggen yugu mbanogo nenet nogo logowak nduk eerogo pege, Eerigin o,” yinuk, Aliku ALA nen yo'negerak me, yokkiragi o.