Read Western Dani Yetaya 59 Bible Online

Yetaya 59 - Western Dani bible

Yetaya 59

¹Kit nen at Ala eenggi omaawi lek me, ninagap ndaka'lek wonage, Aruk logu me ninoone aruk konengga'lek wonage, Eeke mbako ogotik ya? Lek o!

²Kinogoba Ala kinom ogoorogo pinagaga ti, kinomaluk aret. Ndi, kit nen Ala yogwi nogo at aruk konenggeelik ena nomonak menggerak alom ti, kinomaluk eerit nogwe ti paga aret o.

³Aakumi inamiya kineenggi paga lenggenak wonage, Kineenggi irip paga maluk piga noorak mban eekkinake, Kinoone pilit mban kinambe paga wungge, Kinamili irip paga wone maluk mendek mban agan nugwi, Eeko monggotak o.

⁴Inowak loonggo logonet, “Eekerak ndak-ndak aret owak loonuwok o,” yinuk, yogwe, “Alom eekerak yi aret o,” yinuk, owak loonggwi, Eeka'lek ugun-ugun eeko ogotik o. Maluk eerulik kagak, “Abet aret eekerak o,” yinuk, pilit pugunogo yogwe, Kwe elege logombunuk ndake menggi kwak, kinoone paga aganggen kereembu eerogo owak loonggo logonet, irip paga maluk aret ndakwi, Eeko monggotak.

⁵Waalo aakumi inooka ako pege nagaatik, tubungge menggi kwak, Laa'nggi awi wuke menggi kwak, Kit maluk eeriyak mban kiniki koonggwi ti, togop aret me, Kiniki koonggwi ako pugu kwak ti, aakumi nunggwi iinok, aret kanggwi, Ndi, ako ambi tubungge kenok, waalo aakumi inooka aret wundi wage kogwe, Eeko menggaarak.

⁶Ndi, laa'nggi awi wurik paga yum yirikulik kwak kit kiniki koonggwi ti, aanom warogo aret koonit nugwi, Laa'nggi awi wurik kwak me, ti paga kineebe nobakkoloorak meek kagak koonggwi, Eeko ogotik. Kit eerit nugwi ti, maluk aret eerit nugwi, Kineenggi omaawi paga nen aakumi maluk eeppiinet nugwi,

⁷ Mbet-mbet aret maluk eerit nugwi, Aakumi maluk eerulik kagak mbet-mbet aret inoorogo piinet nugwi, Maluk eeriyak mban koonogo pit nugwi, Yi awi ndi awi nugu logonet, aakumi lek eerogo piinet nugwi, O yinik-minik eerogo pit nugwi, Eeko monggotak.

⁸Aakumi iniki ugun tayenak logowak nduk eeppiinet nugu logorak wone liippugwi, Eeppiinet nogo logonet, eekaatak ndak-ndak eeppiinet nogwe, Eeka'lek Maluk eerit nugwi paga kinaru nomok-komok eerogo pit nogotak me, Aakumi tu ti paga wogwe iinok, iniki ugun tayenak logogun lek aret o.

⁹Ti eekwi paga nit wone yugu liirogon eekwi, Obeelom mban eerit nugwi, Eeka'lek niinok, Mbo pinaneegerak wonogo ogoorik o. “Nit o eya ee'ninabuwak lak, ao,” yinuk, mbakwi kwe, o apit paga wonogwe, “Eya pindanogo pinanuwak,” mbakwi kwe, tu o yumaak lombok paga nogwe, Eeko ogoorik o.

¹⁰Aap enegen mbuk kwak tu liinggwi agan nogwe, Ninigen wonage kwe, aakumi inigen mbuk kwak yanduk-ndanduk agan nugwi, O liingge aret kwe, o apit paga iniyok lik ari menggi kwak niniyok liinggologwe, Aap ineenik wonogwe inenggela'me aap kambak kwak wonogwe, Eeko ogoorik o.

¹¹Wam wundikit nduk nggwek ari menggi kwak, Towe puume oone abuwa nggo-nggo ari menggi kwak, nit togop aret, “Ai-ao,” yogo logonet, “A'me nggelok eeppinani woraawak lak, ao,” yinuk, mbakwi kwe, eeppinani waga'lek aret wonage, Ninagap ndariyak niniki lunik logonet, tokkogwe kwe, waga'lek nda wonage, Eeke agaarik o.

¹²Aliku ALA enggaanom paga nit wone yugu ambik taganogo pogoorak me, Ninomaluk nen, “Kit maluk eekotak o,” yinuk, yo'nirage menggerak. Ndi, wone taganogo pit wogoorak nogo abe'nage kenok, “Nit maluk abet aret eerit wogoorak kogo o,” yinuk, mbako monggoorak.

¹³Aliku ALA oone eeriyak nineebi mbakwi, At ambokan laganggwi, Ninogoba Ala munogo punuk, alik eerit nugwi, Eeko logonet, Aakumi tebenogo piinet nugwi, Tu alik paga nawak nduk, nomoniren nogwe, Kwe elege logombunuk ndake menggi kwak ninikime koombunuk pilit wone agan nogwe, Eerit wogoorak ti paga

¹⁴Wone yugu ndak-ndak eeppinaniyak nogo eeppinani waga'lek tayo yinuk wonage, Obeelom mban eerit nawok nduk ee'ninabi woroorak nogo ee'ninabi waga'lek tayorogon wonage, Wone abet mban agan nogo logorak wone tu nggwok paga non mbannage, Ndi, iniki koonak logonet, eeppiiga unggwi woroorak meek age, Eekerak paga

¹⁵Wone abet mban agan nogo logorak wone nogo lek aret agaarak me, Nit aap maluk eeriyak nineebi mbakwi nogo maluk eerogo pinanugo agaarik o. Eekaatak a'me nggelok eeppiinet naga'lek ugun-ugun eerit nogwe at Aliku ALA nen enegen iige nagagerik, eebi mbareegerak.

¹⁶ Aliku ALA nen aap ambi a'me nggelok eeke kin kaga'lek wonage, At ambi nen it yeenggwaaroorak at kaga'lek wonage, Eekwi iige nagagerik, “Iya!” mbareegerak. “Iya,” mbake nagagerik, at lombok eenggi omaawi paga inagap ndake, A'me nggelok eeppiige logonet, yeenggwaarage, Eerikit nduk, eereegerak.

¹⁷ Ti eeppiyaakit nduk, tin yikkologo mengga kwak at a'me nggelok eeppiiga nogo yikkolage, Mbuti petagi inanobak paga yikkologo mengga kwak inagap ndariyak wone yikkolage, Aap inane'me inooruwok nduk towe eeruwak yikkologo mengga kwak, maluk onggo eeppiyaakit nduk, ayum yikkolage, Towe yuut eeruwak mendaarak inambokan tek eerogo wurako mengga kwak, at omaawi togop aret eekkolage, Eereegerak.

¹⁸Eeke nagagerik, aakumi eereegwaarak onggo ndak-ndak eeppiinet nage logonet, awim nogo anini inoba piige, Inom ogoorak nogo eereegwaarak ndak-ndak onggo wogorage, It aakumi inawi niyo oolo ku'mbanak paga nda wonogwe nogo eereegwaarak onggo ndak-ndak eeppiige, Eerigin o.

¹⁹Aliku ALA ambe aagi wumbegetak paga niyo wu'nuk wage menggi kwak wage kenok, Aakumi oonegen kilu yi nage menggim pa'nggwe wonogwe nen Aliku ALA endage tiyanak nogo wage kenok inagabiti mbakwi, It oonegen lagi wage menggim pa'nggwe wonogwe nen at obaanggi-obaangge li'luk eekko'nok wage kenok, ayuk wukwi, Eerugun o.

²⁰ Aliku ALA nen ari logonet, “Wondet Eerogo Piiga an nogo nen o Tiyon wage, It aap Yakup mendek inenggela'me, Maluk nineebi o, yinuk, inomaluk mbo pugwi iinok, inagap ndari wage, Eerigin o,” yinuk, yegerak o.

²¹At Aliku ALA nen ari logonet, “Ndi, an nen ninom wone koonogo pigin nogo yi aret. An Naberiniki kinoba pinagage logonet, noone kinambe paga pinagaminggirak nogo kobak aga'lek kinapurilogwe mamunirogwe, it kinapurilogwe nen it inapuri mamunirogwe, ndi, it inapurilogwe nen inombowologwe peebi ndaganabugun nogo mamunirogwe, eerit wundi wogwe iigak, yogondak nen nok, peebi nda'narugun abok aret yoranet wundi wogo logogun o,” yinuk, Aliku ALA nen aret yegerak o.