Read Western Dani Yetaya 7 Bible Online

Yetaya 7 - Western Dani bible

Yetaya 7

¹ Aap Utiya ombooluk Yotam aput endage Akat nogo, o Yekura inowe endagembogut wonage kagak, aakumi o Aram mendek inowe endagembogut Eretin inom, Iterali inowe endagembogut aap Eremaliya aput Peka inom, nen o Yerutalem tebenggolaawok nduk wogo nogogwaarik, wakkogogwaarak mendek, meek aret agagerak.

²Meek aret age mbareegi, aakumi Aram nen it Eparayim inom lambunna'nuk time inawooliya wuppatinuk wonogo mbareegwa, aakumi nen at Ndawut paga wiganak nogo yora nogogwaarak. Yora nogo mbareegwa, aap Akat apuri inom inaruk konembunuk, o wiya wake logonet, eyo wonok na-wa eeke menggi kwak, inaganak wareegerak.

³Inaganak wake kagak, at Aliku ALA nen Yetaya yoge logonet, “Kat kaput Tiyeyat-Yatiyup wonok tu Yum Kooko Menggam nogo menggam niyo yenggenak irimbaga niyo mbininik irip me time aap Akat kinom lambuni nak o.

⁴Kinom lambumbunuk wone yoriyak nogo yi aret. Kani arowa mbere ka'luk ndi wuke kwak aap Eretin awuri aap Aram mendek inom, aap Eremaliya aput nogo inom, inanini mbakwi paga agabiti nen iniki lek-lek eeke ti mage o. Ata, iniki nu'lek eeppunuk ogogumbuk logowak o.

⁵It aap Aram mendek inom, Eparayim mendek inom, Eremaliya aput inom, nen at Akat maluk eeppuwok nduk, wone koonogo punuk, yogo logonet,

⁶Nit o Yekura mendek ninom wim eeri unggwogo logonet, iniki lek-lek eerogo piinok, o tebenggologo logomonggoorik, aap Tabeen o time endagembogut logowak nduk, mippuwok o, yinuk, yagaarak kwe,

⁷Naliku Nitok Minggirak an ALA nen ari logonet, O Aram alom ti, kota Ndamitik aret. Ndi, kota Ndamitik inowe unde ti, aap Eretin mban aret wonage, O Eparayim alom ti, kota Tamariya aret. Ndi, o Tamariya unde ti, aap Eremaliya aput mban aret wonage, Eekwi me, It koonggaarak nogo aret age, Eeriyak mbakaarak nogo a'me nggelok ari, Eerigin mondok lek aret o. Tahun 65 awo ari waga'lek kagak aakumi Eparayim mendek inanebunu lek aret arigin me, At kunduk, iniki noba panggonak lek kenok, at eya kondembunuk logogin mondok lek, yegerak, yori nanip o,” yinuk, yoreegerak.

¹⁰Aliku ALA nen yoge kagak Yetaya nen wone alik ambi Akat yoge logonet,

¹¹“At Aliku kogoba Ala nen ineenu ariyak mendek ambi aakumi kambeegwaarak nggween abu'me teberogon wonogwe me nen eerigin a, agi mbogut irimbaga wonogwe me nen eerigin a? At nen mban yuwak,” yo'negerak me, yokkigi o.

¹²Yoge mbareegi, at Akat nen onggo Yetaya yoge logonet, “At ambi mendek eeruwak nduk yoge, ndi, Aliku ALA abut mbangge, eeriyak ti, neebi o.”

¹³Yoge mbareegi, Yetaya nen at yoge logonet, “Kit Ndawut paga wiganak yi, kinaruk liirogon konenggo logonip o. Aakumi iniki yungguppunuk, wonogwe inabut mbanggwi nogo kiname'lek kundugu kenok, nogoba Ala iniki yungguppunuk menggerak kunduk, abut mbaniyak mbako ogotik ya?

¹⁴ Kinogoba Ala alik nen kineenu ariyak mendek eeke kaamunggup o. Eeke kaamunggup nogo ti, kolaga aap kigin waka'lek nogo abila age logomenggerik, aagaluk aap aret ndarigin o. Ndi, ndake kenok, at endage Imanuwen aret toonigin o.

¹⁵At nen yilak amburu longgo warak nengge, nggiin amburu nengge, eeriyak eyom awo ari waga'lek kagak, maluk kenok mbo pege, obeelom kenok miikkolage, eeriyak nogo eenu arigin kwe,

¹⁶at nen maluk kenok mbo pege, obeelom kenok miikkolage, eenu ariyak eyom awo ari waga'lek kagak, it aap inendagembogut ineebe mbere paga kinagabiti mbakwi nogo it inanggween paga aakumi lek o wogome kwak aret age kaamunggup o.

¹⁷ O Eparayim nen Yekura inom ogookkologo mbareegwa, Aliku ALA nen aaninggin inoba piyareegerak kuli nen o yogondak kuli aaninggin inoba piigulik mendek ambi kat inom, aakumi inarum menggendak inom, kogoba paga wiganak mendek inom, kinoba pinagagin o. Kinoba pinagarak nogo ti, it aap Atiyut mendek inowe endagembogut nen aaninggin kinoba kwippinagi woraawak nduk, yorigin o.

¹⁸Ne ti eyom paga Aliku ALA nen nuwet-koole ari kenok, ti'neebon niyo Nin elaganggen irip-irip time wonage nogo wogwe, nggiin o nggween Atiyut paga wonage nogo wogwe, eerugun o.

¹⁹Wiiremenggerak abok aret wogo logonet, o nggelok-nggobok me inom, puut-puut yugum ambe nggaganak me inom, eyo alokwi enggela'me inom, ndomba inagari'ngga mbanogo nenet nugu menggam inom, abok aret ninggirogo pi woraagun o.

²⁰Ne ti paga mban niyo Eparat ene pa'nggwe aap Atiyut mendek inowe endagembogut luulu yoriminggirak wage logomenggerik, at eebe inamboro mbanggak pogom a'nuk kineeruwak inom, kinambulok omoori inom, kinamboro inom, tabik-tabok eerogo pinagagin o.

²¹Ne ti paga mban aap ambit-ambi nen tapi enggelan iyagalo inom, kambin mbere inom, unde wogonake logonet,

²²inelak amburu ambik aremenggerak ti paga inelak amburu longgo warak nengge logogin o. It aap o time awo wonogwe nogo inalitak lombok nen yilak amburu longgo warak inom, nggiin amburu inom, nonggo logogun o.

²³Ne ti eyom paga eyo anggur ero seribu onggo wu mbuti perak seribu paga kuniyak yarak wonagam time iri'ngga alok-palok inom, kugeele inom, ti mban niik yigin o.

²⁴O time iri'ngga alok-palok inom, kugeele inom, ti mban niik yigin me nogome it aap nen ineegin-inomaale ko'nok time mban nogo logogun o.

²⁵Ndi, o puut elan-elan time yabu eeri unggwogo nogogwam nogome perak, iri'ngga alok-palok inom, kugeele inom, ti mban niik yemenggerak kenok, yabu eeriyak ineebi nen tapi-ndomba inagari'ngga mbanogo nenet nogo logowak nduk, time piigo logogun o,” yinuk, yoreegerak.