Read Western Dani Yetaya 8 Bible Online

Yetaya 8 - Western Dani bible

Yetaya 8

¹At Aliku ALA nen an yo'nege logonet, “Yugum tabak liiru mbangga nggwok ti wamen o. Wagangge logomenggendik, liiru mbanggo menggaarak ndak-ndak mbangge logonet, Mondok Alilaakwi Aakumi Inagugun Wagangga, mbanu o.

²Mbangge keegak, Yi abet aret mbangge kogo o, yuwak nduk, aap ineebe mbere Ala unde Uriya inom, Yeberekiya aput Takariya inom, woraawak nen wiiraagin o.”

³Yo'nege mbareegi, an nakwe nimbirak lambungge nagagirik, abila a'nuk, naput aap aret ndareegerak. Ndake mbareegi, Aliku ALA nen an yo'nege logonet, “Kaput endage ti, Mondok Alilaakwi Aakumi Inagugun Wagangga, toonumunggun o.

⁴Kat kaput ti, kwiya-koba yuurak awo eenu aga'lek kagak, aap Atiyut inowe endagembogut nen o Ndamitik yi mendek ndi mendek ambik wonage nogo wagangge, o Tamariya kwi'nari unggwage logonet, inamindik-inamendek kugun wagangge, ee'nuk nagin o,” yinuk, yo'nereegerak.

⁵Yo'nege nagagerik, Aliku ALA nen ambinom an yo'nege logonet,

⁶“It aakumi yi, niyo Tiyilowa elaganggen abolok lek wage nogo mbo punuk, Aap inendagembogut Eretin inom, aap Eremaliya aput inom, inikilom mbakwi me,

⁷Niyo Eparat wu'nuk wage logonet, ambet paga kilu-kilu wundit nage, Elaganggen paga linogo pit nage, Niyo mban uwe ndenit yi mendek ndi mendek taanogo pit nage, Yenggenit aakumi inenggaanok kuli ari lagangge logonet o irip-irip ndak wa'narit nage, Eeke menggi kwak, It Atiyut inowe endagembogut, Wi, ugwi iigak, eerit wage menggerak nogo nen Inogoba Imanuwen an nanggween o Yekura togop aret aan mbelenggabi unggwi woraawak nduk, nappi woraagin o,” yinuk, yo'nereegerak.

⁹Togop aret me, kit yi aakumi ndi aakumi ninom wim mbanak yi wae. “Ninawim o,” yinuk, kuum-keek namonggotak kwe, kinaganak wako logomunggup o. Kit aakumi o nggween ilin-unggut wonogwe yi wae. Kinaruk liirogon koneninip o. Wim namburiyak nduk li'luk eerumonggotak kwe, kinaganak wakwi, Wim eeriyak nduk pipuk eerumonggotak kwe, kiniki ma'nage, Eerumunggup o.

¹⁰Nit ti, Ala ninom aret wonage menggerak me, Kit nen, “Nit yogop eeppiyaawok,” koonumonggotak kwe, lek aret age, “Yogop eeruwok o,” yinuk, wone mbanumonggotak kwe, ee'naga'lek aret wonage, Eeke kaamunggup o.

¹¹At Aliku ALA nen eenggi omaawi paga pippaninuk, wone yo'nege logonet, “It aakumi inobaabut maluk lombok logonet eerit nogwe yi, kinom mugurok nookwak, wone ambi yokkiri o.

¹² It aakumi nen, Niniki ambit eeppunuk wone koonogo pogoorak o, yogwe ti, Kat nen, Abet aret iniki ambit eeppunuk wone koonogo pegaarak o, yinuk, ari, ndi, it inagabiti mbakwi nogo kat kunduk kagabiti nen kiniki ma'nage, Eeriyak ti mondok mage o.

¹³Nomaawi Lombok Minggirak Naliku an ALA nalik aret kikak nakeelik alik leenak wonage nombake, An paga kagabiti mbake logonet, kaganak wake, Eeke logot o.

¹⁴ An neebe ti, aakumi ineebe op logowam alik leenak wonage logogin kwe, It aakumi Yekura mendek inom, Iterali mendek inom, it imbirak perak, Yugum iniyogobit linggolaga kwak, lik togon yigeebu wangga kwak, an neebe age, Ndi, it aakumi o Yerutalem kunduk, wam talok pugu kwak, pagi keele pugu kwak, an neebe age, Eerigin o.

¹⁵It aakumi ambik aret an paga iniyogobit li-li ngginnogwe, Yigeebu wanggo logonet, ineenggi-iniyok kalenak-pugunik nage menggi kwak ogwe, Keele pugu kwak an paga yilunggolamenggaarak me, piginakwi, Eerugun o,” yinuk, an yo'negerak.

¹⁶Wone at Ala nen yo'negerak abok aret yokkirage yi, liirogon waganggwi, Kit an noone wagangga nen eeko logorak wone yugu yi, nggirik-nggerok porogo wonogwe, Eeko logonip o.

¹⁷ At apuri Yakup paga wiganak nen enete kogwe iyo, kumaappatinuk wonage Aliku ALA nogo an tokkage, Niniki at paga panggonak wonage, Eeke agarik o.

¹⁸ An Aliku ALA nen wo'nereegerak napuri ninom yime aret ogoorik o. It Iterali ineenu ogwe, in wakkagak wonogwe, eeko logowok nduk, At Omaawi Lombok Menggerak Aliku ALA o puut Tiyon menggerak nogo nen nappinani wagaarak wonogo ogoorik o.

¹⁹Aakumi nen kit yokkirogo logonet, “It aakumi ambi mendek nen ambi age kenok, inagugi yoroorak lek mbakop? Eeriyak nonggop o? yinuk, it aakumi ineenik wonogwe nogo inake it kambeegwaarak yoroorak op nogo lek a? Yoroorak op aret me, it aap yagap wone yogwe, inoone mumun paga yogwe, eekwi nogo tili pagangga inom, aap inogoma nggiiraga inom, yoret o,” yinuk, yokkirogwe iinok,

²⁰wone yugu liiru mbanak inom, abeko logorak wone yugu inom, pekkaanip o. It aakumi ti, Ala wone yugu ndak-ndak yaga'lek kenok, inikime o eya aago wonage lek apit aago wonage mbarumunggup o.

²¹It aakumi ti, iniki aaninggin wonogwe, mbi abu wonogwe, eeko logonet, o time yagak-ndagak nugwi, mbi abu kenok inanini nen inowe endagembogut inom, inogoba Ala inom, mbelaappiigwi, ina mbogut paga ni'nogwe,

²²nggween paga wu'nogwe, eeremenggaarak kwe, yi mendek ndi mendek obeelom mendek ambi inigen kaga'lek aaninggin-paaninggin inoba age, iniki apit age, o yumaak kenok inagabolo kangge, eeke kagak, o apit me time mbo piyaagin o.