Read Western Dani Yetaya 9 Bible Online

Yetaya 9 - Western Dani bible

Yetaya 9

¹ Togop aret mbo piyamenggerak kwe, aa'nduk nen it o Tebulon wonogwe inom, o Natali wonogwe inom, tebenogo piyareegerak kwe, it aaninggin-paaninggin inoba a'nuk o yumaak paga nugwi nogo, mondok-mondok togop aago nugu logogun lek o. Peebi, Aliku ALA nen niyo Yoraran enebagan tu niyo yenggenak paga nogo menggam it endekem konenggulik mendek iname o Nggalileya time menggaarak nogo, tiyappiyaagin o.

² It aakumi o apit paga logonet, eerit nugwi nogo, Eya nggwok lombok inigen kogogwaarak o. It kanggwi inoba wigak yereegerak kanggo menggam wonogwe nogo, Eya lombok inoba pindanogo piyareegerak.

³It mendek ambik wiganogo piyareegerak me, Iniki ale'nggen ambik kogwe, Yarak anggen mbanggo logonet, iniki ale'nggen mbakwi, Kugun wogo tumbukkologo logonet, inale'nggen mbakwi, Eeko mengga kwak, At enggaanom paga inale'nggen mondok nggwok lombok mbakwi, Eereegwaarak.

⁴It aap Miriyan tebenogo piyareegerak kokwak, Eyo aaninggin tapi uut paga kwippugu kwak inoba wonage nogo, telenogo mbo nappege, Eyo aaninggin inuum paga wonok nugu mengga kwak wonok nugwi nogo, waganogo mbo pege, It tebenogo piiga nen mbut mbanak ineenggime wonok nugwi nogo kalenogo pege, Eereegerak o.

⁵It aap ineegin warak iniyok ogut yirik oone ndu-ndu agan nogwe inom, Inayum amiya labunik wonage inom, Kani noorak ake aret me, kani nen nengge logogin o.

⁶Elege ambi nit ninake muk nda'nage, Wulaga ambi muk aret wo'nirage, Eereegerak me, At wone lengganogo yo'nirage logorak ti, at obaalombok aret logogin o. At endage ti, Wone Kooninaka Mondok Iya, Omaawi Lombok Menggerak Ala, Ninogoba Kanggeelik Mondok Eenik Menggerak, Aakumi Lambuninaka Endagembogut o, yinuk, yogo logogun.

⁷ At wone lengganogo yorage logowam nggwok wiganinuk nage, Aakumi inom lambunik iniki ugun tayenak wonogwe nogo lek aga'lek kundugu wonage, Eeke logogin o. At Ndawut paga wiganak aret me, At wone lengganogo yorage menggim mi'na'nuk, At abu'me piige menggim wone lengganogo yorage logogin o. At obeelom mban eeppiinet nage, a'me nggelok mban inawone mbangge, Eeke logomenggerak paga At abu'me piige menggim akom kwippiige, Omaawi nu'lek eerogo pege, Eerogo pege kenok, Mondok-mondok aret logogin o. At Omaawi Lombok Menggerak Aliku ALA nen, “Mondok eerikit aret,” mbarit unggwage me, aret eeke logogin o.

⁸Ninogoba Ala nen it Yakup mendek aaninggin inoba kwippiyoorak yorage, It Iterali inoba aret kwi'nage, Eerigin o.

⁹It aakumi Eparayim mendek inom, it o Tamariya menggaarak inom, it aakumi abok ti, “Nit iya,” mbakwi, iniki wogoppakwi, Eeko menggaarak abok aret nogo nen inoba ariyak wone yugu nogo ineenu arugun o.

¹⁰It aakumi ti nen yogo logonet, “Yugum o wurik langgunik nogo peebi obaane'me yugum abe ogobakkigirik paga wukwi, Eyo wuli muurogo pugu nogo obaane'me eyo nggabina yakwi, eerugun o,” Yinuk, yogwe kwe,

¹¹Aap Eretin awuri inom pilak yogo logonet it Eparayim inom, Tamariya inom, tebenogo piyaawak nduk, At Aliku ALA nen inikime eeppiige, Ndi, it inom wim mbanak nogo inikime mambiige, Eereegerak me,

¹²It oonegen lagi wage menggim pa'nggwe wonogwe aap Tiriya inom, It oonegen kilu yi nage menggim pa'nggwe wonogwe aap Pilitin mendek inom, nen It Iterali mendek inambeme yonggorinabeegwaarak kwe, At anini inombake nogo lek aga'lek ambinom inoba pikit nduk, “Ndime eeri nanip o,” yinuk, eenggi titik irage agaarik o.

¹³Togop eeginabeegerak kwe, It aakumi ti nen iniki wakko'nok at inomaluk onggo eeppiiga nogo owagam wogwe, At Omaawi Lombok Menggerak Aliku ALA mugurok wogwe, Eeka'lek aret wonogo agaarik o.

¹⁴Ti eekwi paga Aliku ALA nen Iterali inanobak inom, inakom inom, mbanogo piige, Eyo eebe inom, eno'mbak inom, imbirak ne ambit liingge mbanogo pege, Eerigin o.

¹⁵Inanobak kwak ti, aap inoweewi inom, aap inengga warak inom, ti aret. Ndi, inakom kwak ti, Ala yorage kagak yoraga kwe, pilit pugunogo mamuninaka ti aret.

¹⁶It aap, “Yogop-ndogop,” mamuninaka ti nen aakumi yi, tu kobak eerogo piigwi, It mamuninakwi ti kunduk, tu kobak aret ogwe, Eeko agaarik o.

¹⁷It aakumi abok aret ti, maluk mban eeriyak mbako logonet, Ala ineebi mbakwi, It abok aret wone yuurak lek kagak aap wi yogo mengga kwak agan nugwi, Eekwi me, Ninogoba Ala ti, wologwe tawe nogo inikilom mbake, Ndi, elege moono inom, kumi nanu inom, inabuwa mbake, Eerigin lek aret o. Ti abok eeginabigin kwe, At anini inombake nogo lek aga'lek ambinom inoba pikit nduk, “Ndime eeri nanip o,” yinuk, eenggi titik irage agaarik o.

¹⁸Iri'ngga-kale'ngga inom, alok-palok inom, kani pegaatak ne ambit pup eerogo nengge, Eyoongga ku'mbanak wunuk agan nenet nage, Eeke logonet, Ka'luk yarugu-parugu lagangge menggi kwak, It aakumi ti, maluk togop aret eerit nogo menggaarak o.

¹⁹At Omaawi Lombok Menggerak Aliku ALA anini ti, wukkani-ndakkani pup eerogo nenet nage menggi kwak O nggween yi togop aret eerit nage logogin o. Kani ambi-mbiingga ti, it aakumi aret me, Nenet nage kenok, at ambi nen at ore ambi abuwa mbakak eerugun mondok lek aret o.

²⁰Inoreewi ineeben abeenok wonogwe nogo inambi waganogo namenggaarak kwe, abu aret wonogwe, Ineeben abeenok wonogwe nogo inambi namenggaarak kwe, ndonggoppiiga'lek wonogwe, Eekwi kenok, It paga wiganak aret kwe, inamiya nenet nogo logogun o.

²¹Neyak-keyak yogo logonet, it aap Manate mendek nen Eparayim mendek inoorogo piigwi, Ndi, it Eparayim mendek nen it Manate mendek inoorogo piigwi, Eeko logonet, It imbirak lambunna'nuk, Yekura inom wim eerugun o. Togop eerugun kwe, at Ala anini inombake nogo lek aga'lek ambinom inoba pikit nduk, “Ndime eeri nanip o,” yinuk, eenggi titik irage agaarik o.