Read Western Dani Ala Unde 11 Bible Online

Ala Unde 11 - Western Dani bible

Ala Unde 11

¹Ti'nuk, at Aliku ALA nen Muta Karun imbirak yorage logonet,

²“It aakumi Iterali mendek wone yoroorak nogo yi aret. Yi mendek ndi mendek inigen mbolok kwi inigen mbolok lek nggween paga nugu menggaarak it nonggo logorak nogo ti,

³iniyok abe nggaganak iri'ngga lunggunogo wurako nagaatik, kilirogo lagangga kenok op nonggo logorak kwe,

⁴iniyok nggaganak kwe, iri'ngga lunggunogo wurako nagaatik, kilirogo laganggulik kenok a, iri'ngga lunggunogo wurako nagaatik kilirogo laganggwi kwe, iniyok nggaganak lek kenok a, ti nonggo logorak mage o. Unta ti, iri'ngga lunggunogo wurako nagaatik, kilirogo laganggwi kwe, iniyok abe nggaganak lek kenok, noorak mage yugu me, nonggo logorak mage o.

⁵Ndi, pagi pelanduk ti, iri'ngga lunggunogo wurako nagaatik, kilirogo laganggwi kwe, iniyok abe nggaganak lek kenok, noorak mage yugu me, nonggo logorak mage o.

⁶Ndi, pagi kelinci ti, iri'ngga lunggunogo wurako nagaatik, kilirogo laganggwi kwe, iniyok abe nggaganak lek kenok, noorak mage yugu me, noorak mage o.

⁷Ndi, wam ti, iniyok abe nggaganak kwe, iri'ngga lunggunogo wurako nagaatik, kilirogo laganggwi lek kenok, noorak mage yugu me, nonggo logorak mage mban.

⁸Yi mendek ndi mendek noorak mage aago ti enggaanggum nunggwi, warak kenok mbaanggogwe, eeriyak mage o.

⁹Niyoome mendek it ugun nonggo logorak nogo ti, yi yikwe ndi yikwe agabolo omaawi obaga nabenak mondonogo nappugwi nogo mendek inom, amborowak anggege paga niyo kilaarit nege nogo mendek inom, nonggo logorak op aret kwe,

¹⁰yi yikwe ndi yikwe inom, yi mendek ndi mendek niyo inikime nugut-tiyak agan nugu menggaarak mendek inom, agabolo omaawi obaga nabenak lek agabolo eraabin kwi kenok a, amborowak anggege paga niyo kilaarit nege lek kenok a, Ogole o, yinuk, nonggo logorak mage o.

¹¹Ogole o, yinuk, nonggo logorak mage me, enggaanggum nengga'lek mbo pugwi, ineebe kambak kenok, Ogole o, yinuk, mbo pugwi, eeko logowak o.

¹²Yi mendek ndi mendek niyoome menggaarak inagabolo omaawi obaga nabenak mondonogo nappugwi lek eraabin kwi nogo mendek inom, inamborowak anggege paga niyo kilaarit nugwi lek nogo mendek inom, abok aret, Ogole o, yinuk, nengga'lek mbo pogo logowak o.

¹³Yirowe-ndirowe ogole warak me it nen, Ogole o, yinuk, nonggo logorak mage nogo yi o. Towe wu inom, pen ware inom, muruwe inom,

¹⁴pen ware mili tari anebunu ti mendek inom,

¹⁵towe nggindooni anebunu inom,

¹⁶towe ndindim inom, nggogugi inom, pibit ndagayo inom, towe pili nengga anebunu ti mendek abok aret inom,

¹⁷tiyu inom, nggin inom, kani ka'luk mbangga inom,

¹⁸ndindim eeruwak tari inom, muumayo inom, mbiliya inom,

¹⁹lu mendek inom, ti wagangga anebunu ti mendek inom, ngguundi nogo mendek inom, ti mendek abok, Ogole warak o, yinuk, nonggo logogwaarik o.

²⁰Yi mendek ndi mendek ina'naabit warak kwe, iniyok paga nugu menggaarak abok aret it nen, Ogole, yogo logowak o.

²¹Ndi, yi mendek ndi mendek ina'naabit warak kwe, iniyok paga nega it op nonggo logorak nogo yi o. Iniyok yunggunggak warak me worak mbo wanggak nugu menggaarak

²²wurin inom, taabiya inom, yibila inom, nogo ti, it nonggo logorak op aret kwe,

²³yi mendek ndi mendek ina'naabit warak kwe, iniyok warak nogo ti, Ogole, yogo logowak o.

²⁴Ndi, yi mendek ndi mendek noorak mage ti mendek kambak it ambi nen mbaanggogo logomenggaarik kenok, inoba obari lenggenemenggerak ineebe maluk wonage kagak, oonegen aret kilu yi nawak o.

²⁵It ambi nen yi mendek ndi mendek noorak mage ti mendek kambak wonok wogo logomenggaarik kenok, inayum niyo paga koorogo patinuk, obari inayum paga lenggenemenggerak nogo lek age tokkogwe iigak, oonegen aret kilu yi nawak o.

²⁶Yi mendek ndi mendek inigen mbolok kwi inigen mbolok lek nggween paga nugu menggaarak iniyok abe nggaganak lek kenok, iri'ngga lunggunogo wurako nagaatik, kilirogo laganggulik kenok, abok aret ti, ogole warak noorak mage yugu me, ti mendek kambak mbaanggogwe iinok, obari inoba lenggenak aret logowak o.

²⁷Yi mendek ndi mendek iniyok 4 warak kwe, iniyok ndoonogo pit nugu menggaarak mendek abok aret ti, ogole warak noorak mage yugu me, ti mendek kambak ambi mbaanggogwe iinok, obari inoba lenggenemenggerak wonage kagak, oonegen aret kilu yi nawak o.

²⁸At ambi nen kambak ti mendek wonok wage kenok, ayum niyo paga koorogo pake logomenggerik, obari oba lenggenemenggerak wonage kagak, oonegen aret kilu yi nawak o. Ti mendek ti, ogole warak me, it nonggo logogwaarik o.

²⁹Yi mendek ndi mendek inaanogum paga nugu menggaarak, Ogole warak o, yinuk, nonggo logorak mage nogo yi aret. Natikereyi inom, ambeya nogo mendek inom, waalo nogo mendek inom,

³⁰yibulu mendek inom, yiimu inom, yilak maaka inom, weret mendek inom, waalo agabolo ambi agak eeke menggerak inom,

³¹yi mendek ndi mendek inaanogum nggween paga mbaanggagak nugu menggaarak ti apit aret noorak mage yugu me, ti mendek kambak it ambi nen mbaanggogwe kenok, obari inoba lenggenemenggerak wonage kagak oonegen aret kilu yi nawak o.

³²Ti mendek ambi kangge logomenggerik, yum paga a, ndomba agabolo paga a, karun paga a, eyo paga a, oba a'nuk, obari lenggek ari kenok, lek age kagak oonegen kilu yi nawak nduk, yi mendek ndi mendek eeko menggaarak abe a, maluk a, kagak aret waganogo niyoome taambi nogo logowak o.

³³Togolowak nggween mendek ogobakkigirik me, yi mendek ndi mendek yonggolak kagak, noorak mage ti mendek kambak togolowa'na wangge kenok, yonggolak nogo abok aret obari lenggek ari, ndi, mbi op noorak paga togolowak ti paga niyo toologo oba kilirogo pugwi, amburu op noorak mendek togolowak ti paga tookwi, eekwi iinok ti, obari abok aret lenggek yigin me, togolowak ti, telenogo mbo pogo logowak o.

³⁴

³⁵Yi mendek ndi mendek noorak mage kambak mendek mbi worako menggam a, lako menggaarak togolowak paga a, yi mendek ndi mendek eeko menggaarak ti paga abok aret wangge kenok, abok aret obari lenggek yigin me, Yi abok aret maluk agaarak o, yinuk, mbi worako menggam wun awi yanggunogo wumbugwi, togolowak telenogo pugwi, eeko logowak o.

³⁶Niyo eneeri wungge me ilik, niyo nenggak nggween kabunik me a, wangge kenok ti, obeelom aret logogin kwe, it ambi nen noorak mage yugu ti mendek kambak wambemenggerak nogo mbaanggogwe iinok perak, obari inoba lenggenak aret logowak o.

³⁷Ndi, yi mendek ndi mendek awi paga wambemenggerak kagak, awi yakwi kenok, anggen nogo obeelom aret me, mbanggologo logorak kwe,

³⁸awi nogo niyoome yawenogo pemenggaarak me, kambak nogo oba wangge kenok perak, anggen nogo maluk aret arigin me, yako logorak mage o.

³⁹It inaanggo ambi warogo noorak ake punik nogo kambemenggerak at ambi nen mbaanggage kenok, obari at oba lenggenak wonage kagak oonegen kilu yi nawak o.

⁴⁰Ndi, inaanggo kambemenggerak nogo at ambi nen nengge kenok ti, obari oba aremenggerak nogo lek aruwak nen ayum niyo paga koorogo patinuk, tokkage kagak, oonegen kilu yi nawak o. Ndi, inaanggo kambemenggerak nogo at ambi nen wonok nage kenok ti, obari oba aremenggerak nogo lek aruwak nduk, ayum niyo paga koorogo patinuk tokkage kagak, oonegen kilu yi nawak o.

⁴¹Yi mendek ndi mendek inaanogum nggween mbaanggagak nugu menggaarak nogo ti, ogole warak me, it nonggo logorak mage o.

⁴²Yi mendek ndi mendek inaanogum paga nega a, iniyok 4 warak a, iniyok ambik wonage a, inaanogum nggween mbaanggagak nugwi ti mendek abok aret ti, ogole warak mban me,

⁴³obari inoba arukwak, mbaanggoorak mage o. Inagap mbugunggologwe, obari inoba age, eerukwak, liippogo logowak o.

⁴⁴ Naliku inogoba Ala an aret me, it nen yi mendek ndi mendek inaanogum nggween mbaanggagak nugu menggaarak nogo obari inoba lenggek yukwak, an niniki kikak nakeelik abu obeelom minggi kwak, it togop aret iniki kikak naka'lek abu obeelom an nake leenogo patinuk logowak o.

⁴⁵An inogoba Ala aret logokit nduk, it o Metit nen wogoren wundi wagagirak Naliku ALA an aret me, an niniki kikak nakeelik abu obeelom lombok minggi kwak, it togop aret logowak o.

⁴⁶Yi mendek ndi mendek inigen mbolok kwi inigen mbolok lek inom, yirowe-ndirowe inom, yi mendek ndi mendek niyo inikime nugut-tiyak agan nugu menggaarak inom, yi mendek ndi mendek inaanogum nggween mbaanggagak nugu menggaarak inom, inetenggen liippunuk, Yi obeelom me ugun noorak o. Yi maluk mendek me, noorak mage o, yinuk, eeko logorak wone lengganogo yorage nogo ti aret, yegerak, yoret o,” yinuk, yoragagerak.