Read Western Dani Ala Unde 21 Bible Online

Ala Unde 21 - Western Dani bible

Ala Unde 21

¹At Aliku ALA nen Muta yoge logonet, “It an neebe unde Karun apuri nogo wone yoroorak nogo yi aret. Aap an neebe unde nogo aap oba maluk eekkolookwak owe-awot tayorogon mendek kanggwi iinok, mbaaniyoorak mage o.

²Togop aret kwe, at mendek liirogon agalo a, ogoba a, apurilogwe komologwe-wologwe a, oreeluk aap a,

³iriluk ogonggelo awo kolaga'lek imbirak wonage a, kanggwi iinok perak, piginaburak op aret o.

⁴Ndi, at akwe agalo-ogoba iriwologwe inom kanggwi iinok perak, at oba maluk eekkolookwak mbaaniyoorak mage mban.

⁵ It aap an neebe unde nogo ti, maluk eeka'lek abu obeelom inogoba Ala an nake leenak menggaarak me, nendage maluk eerogo panukwak, ineeruwak inanobak puluk ko eerogo mbanggwi, inamboro to eerogo mbanggwi, inagabolo nggawi penek eerogo pugwi, eeriyak mage o. It nen Naliku inogoba Ala an nake warogo kani kunggwi, yi mendek ndi mendek, Yi Ala kake o, yinuk, nggomoorogo wo'nugwi, eeko menggaarak me, maluk eeka'lek abu obeelom nake leenak aret logowak o.

⁷It aap an neebe unde ti, maluk eeka'lek abu obeelom inogoba Ala an nake leenak aret me, kumi ya wurinakak kenok, kwe agap ale aago kenok, kwe mbo pugu kenok, it aap an neebe unde nen wogonako logorak mondok mage o.

⁸Aap an neebe unde nogo ti, yi mendek ndi mendek, Yi ninogoba Ala kake o, yinuk, wo'nugwi, ndi, Naliku ALA nen it kikak naka'lek abu obeelom logowak nduk leenogo piige minggirak an nogo, niniki kikak nakeelik obeelom mban wonage, eeko monggoorak me, it aap an neebe unde ti, Abu obeelom Ala ake leenak menggaarak, inombako logowak o.

⁹Aap an neebe unde apuluk kolaga ambi nen, Nendage abe wonage ti, ia lek o, yinuk, kolaga ya wukak eerogo patit nage kenok, at ogoba endage maluk eerogo pege me, eenik ngge-ngge kani kumbogo logowak o.

¹⁰Aap an neebe unde inowe nogo ti, oreewi iigak, aap an neebe unde inowe logowak nduk, amburu kilirogo pugwi nogo mendek at anobak paga kilirogo pege, ndi, it aap an neebe unde inayum yiko menggaarak nogo at yirikkolaawak nduk, leenogo mippege, eeke kenok, abetagi nibik-nobak eerogo yikkolage, ndi, eeruwak mbininggolaga'lek yinip-pinik aago wonage, eeriyak mage o.

¹¹Aap an neebe unde inowe ti, ogoba Ala an nake leenak logowak nduk, amburu anobak paga kilirogo pugume, aap kambemenggerak paga nen nake eeko menggam magame time logorak yugu nogo taganogo pege, ndi, eebe oba maluk eekkolage, eerukwak, agalo-ogoba kambemenggaarak iigak kwe, pegiya wundi noorak mage o. Naliku ALA an nen aret yagi o.

¹³Aap an neebe unde inowe akwe koloorak ti, kwe aap kigin waka'lek awo tawe wonage kenok mban akwe kolage logowak o.

¹⁴Kwe nanu pugu kenok, kwe mbo pugu kenok, kwe agap ale aago kenok, kwe ya wukak kenok, at koloorak mage o, yugu nogo kagak kumi ti mendek kolage kenok, owe-awot nogo nen at apurilogwe paga inombako logonet, Mage yugu kagak waganggerak apurilogwe nogo yi o, yinuk, ineebi inombako logukwak, kumi ti mendek koloorak mage o. Ata, at anebunu mendek inapuluk kolaga aap kigin waka'lek kenok mban kolage logowak o. Maluk eeka'lek obeelom mban logowak nduk, leenogo pege minggirak Naliku ALA nen aret yagi o, yinuk, yegerak, yoret o,” yoreegerak.

¹⁶Yoge nagagerik, at Aliku ALA nen Muta yoge logonet,

¹⁷“Kat nen Karun yoriyak nogo yi aret. At apuri-ombowologwe wiganak inalitak lombok abok aret inagabolo paga inawinde-inobaande eerak wonogwe iinok, yi mendek ndi mendek inogoba Ala an nake pugwi me time wogo logorak mage o.

¹⁸At apuri inalitak lombok inigen mbuk kenok, inarowat langgonak kenok, inetenggen paga inoobolok eerak kenok, inamborowak kalenak kenok,

¹⁹ineenggi ilik, iniyok a, nomonak kenok,

²⁰inamborowak kalenak kenok, wono iranet unggwage menggerak kenok, inigen lot kenok, yigani pugu kenok, inawin anggore'na tilu aago kenok, inooli nibinik kenok,

²¹aap an neebe unde Karun apuri inom, ombowologwe inom, wigannarit nogo logogun mendek nogo nen inawinde-inobaande togoti eerak kenok, an Naliku ALA nake warogo kani kunuwak nduk, nowagam wogo logorak mage o. Awinde-obaande eerak kagak yi mendek ndi mendek ogoba Ala an nake nogo wo'niri woroorak mage o.

²²Awinde-obaande eerak kagak, yi mendek ndi mendek ogoba Ala an nake pugu mage lombok nggomoorak inom, nake pugu abu leenak inom, nogo perak, at noorak op aret kwe,

²³awinde-obaande eerak aret me, yum tugunik wonage me wage, nake kani kunggo menggam wage, eeke kenok, nake eeko menggam magame time eeko logorak yugu nogo taganogo puurak me, woroorak mage o. Nake eekak yuurak leenak logowak nduk, nggomoorogo pereegirak Naliku ALA an nen aret yagi o, yinuk, yegerak, yoru o,” yoreegerak.

²⁴At Aliku ALA nen Muta togop aret yoge mbareegi, Muta nen wone Ala nen yoreegerak nogo Karun inom, apuri inom, aakumi Iterali inom, abok aret yoragagerak.