Read Western Dani Ala Unde 23 Bible Online

Ala Unde 23 - Western Dani bible

Ala Unde 23

²“It aakumi Iterali wone yoroorak nogo yi aret. Naliku ALA noba abeppunuk nalut eeko logonet, inale'nggen nen laago lako logorak koonogo pereegirak nogo ti, it nen kuwak eeppunuk, Ala endage tiyappogo logowok o, yinuk, yogo logowak nduk, koonogo pereegirak nogo yi aret.

³ Ne 6 paga ti, yabu eerit nogo logorak op aret kwe, ko'lu paga perak, an nake leenogo pateegirak me, it iname lombok abok aret yabu eeka'lek tat yonggonggologo logonet, kuwak eeppunuk, Naliku ALA nalut ee'nako logowak o.

⁴It Iterali nen Naliku ALA nalut eeko logowak nduk, kuwak eeppunuk, iniki ale'nggen nen laago nggwok lariyak koonogo pereegirak nogo eyom ari wage kenok, eeko logowak nduk yoroorak nogo yi aret.

⁵ Tut aa'nduk penenak tanggal 14 paga o ndonggo agan nage kagak, Naliku ALA noba abeppunuk nalut eeko logonet, Obagambo Nagagirak nogo aberogo laago lako logowak o.

⁶ Ndi, lako logomenggaarik, ko'lu tanggal 15 paga ti, Naliku ALA noba abeppunuk nalut eeko logonet, laago Oroti Piika'lek Mendek nawak nduk, ragi oroti inom pega'lek kagak worarogo nenet nogwe iigak, ne 7 aret ari nawak o.

⁷Ne iyaalok nen nugwa ne 7 kuli ari nage kagak, Naliku ALA nake kani kuniyak nduk, yi mendek ndi mendek ko'lu-kii'me pi wogo logowak o. Ne iyaalok paga inom, irip paga ne 7 ari nage paga inom, yabu eeka'lek kuwak eeppunuk, nalut eeko logowak, yegerak, yoret o,” yinuk, Muta yoreegerak.

⁸

⁹Yoge nagagerik, at Aliku ALA nen Muta yoge logonet,

¹⁰“It aakumi Iterali mendek wone yoroorak nogo yi aret. An o wogoraagin nogome it unggwi nanuk, yi mendek ndi mendek yako logomenggaarik, anggen iyaalok yugu mbanggo logonet, iyaalok mbanemenggaarak nogo, Ala nen wo'niragaarak me, yinuk, aap an neebe unde wogorogo logowak o.

¹¹Wogorogwe iinok, an Ala nen nale'nggen inombarikit nduk, tat yonggonggologo logorak nogo 6 yippunuk, ambi 7 nogo, nogo yinuk, ko'lu aap an neebe unde nogo nen anggen mbanak nogo, Yi Kaliku ALA kake o, yinuk, titik ni'nuk, teppuwak o.

¹²Ndi, it nen yi mendek ndi mendek anggen iyaalok mbanak pugwi ti eyom paga ndomba ndarak kagak tahun ambit aago awinde-obaande eerak lek amuni mbanak ambi waganogo Naliku ALA nake warogo kani kuniyak nduk, pi wogo logonet,

¹³gandum anggen abu abe yigirik amburu inom nenggelak-kenggelak aago aaninggin mbere wakkagak wonok obari abe lombok kage logonet, nale'nggen kaakit nduk, Naliku ALA nake kani kunggwi nogo mendek inom, nonggo menggaarak anggur amburu toolak 1 liter negen nenggaanom paga kilirogo paniyak nogo mendek inom, lambunogo pi wogo logowak o.

¹⁴Inogoba Ala an nake pi woroorak nogo pi waga'lek logonet, oroti inom, gandum anggen ki inom, worarak inom, nonggo logorak mage o. Eeko logorak yoragarak yi ti, it logowam time abok aret wonogo logonet, it inom, inapuri-inombowologwe nda'narit nogo logogun inom, mondok-mondok aret eeko logowak, yegerak, yoret o,” yinuk, Muta yoreegerak.

¹⁵ Yoge nagagerik, wone ambi yoraawak nduk, Muta yoge logonet, “Tat yonggonggologo logorak nogo 7 yippunuk, ko'lu anggen iyaalok mbanak wonok, Kat Ala kake o, yinuk, titik nirumenggaarak kuli nen ineenggi lingginit tamban 7 kuli aret ari nawak o.

¹⁶Tat yonggonggologo logorak tamban 7 paga lingginit namenggaarak nogo ti, ne 49 aret me, ko'lu 50 ari namenggerak ti paga anggen iyaalok ambi mbanogo Naliku ALA nake pi wogo logonet,

¹⁷it iname lombok abok aret nen gandum anggen abu abe yigirik aaninggin mbere wakkagak waganogo ragi inom punuk, oroti mbere'ndak mban worarogo punuk, Anggen iyaalok mbanak paga oroti worarak yi, Kaliku ALA kake o, yinuk, titik eerogo niri wogwe,

¹⁸ndi, ndomba ngguunok ndarak kagak tahun ambit eerak awinde-obaande eerak lek ineebe 7 inom, tapi ngguunok awooluk ambiret inom, ndomba ngguunok mbere inom, wonok pi wogwe, eeko logomenggaarik, oroti mbere nogo, Yi Ala kake o, yinuk, titik nugwi, ndi, tapi-ndomba nogo obari abe kage logonet, nale'nggen kaakit nduk, Naliku ALA nake warogo kani kunggwi, eeko logonet, gandum anggen yigirik an nake pugwi inom, anggur amburu nake kilirogo panugwi nogo inom, inom aret kani kunuwak o.

¹⁹Ti eeppunuk, it nen inomaluk lek eerogo piyaakit nduk, kambin ngguunok ambi nake warogo pugwi, ndi, an ninom lambunik logowok nduk, nggami aanggo wakwi kwak ndomba ndarak kagak tahun ambit eerak mbere nake warogo pugwi, eekwi iinok,

²⁰anggen iyaalok yugu yigirogo punuk, oroti worarak nogo inom, ndomba aagalogwe mbere nogo inom, aap an neebe unde nawak nen, Naliku ALA nake leenak aret me, Yi Kaliku ALA kake o, yinuk, titik nugu logomenggaarik, it an neebe unde nawak nduk wogorogo logowak o.

²¹Ne ti eyom paga aret yabu eeka'lek, Ala alut eeruwok nduk, kuwak eeruwok o, yinuk, kuwak eeppunuk nalut eeko logowak o. Ti eeko logorak ti, it logowam time abok aret wonogo logonet, it inom, inapuri-inombowologwe nda'narit nogo logogun inom, mondok-mondok eeko logowak o.

²² It nen yaremenggaarak anggen kole aremenggerak mbanggo logonet, ineyabu ambet paga wundit namenggerak abok aret mbanggwi, anggen mbanggo logonet, nggigi-nggigi wagangge kenok anabenggwi, eeriyak mage o. It aakumi ineenggi lek mendek inom, aakumi nggiru inom, kolaawak nduk, teppiigo logowak o. Naliku inogoba Ala an nen aret yagi o, yinuk, yegerak, yoret o,” yoreegerak.

²³Yoge nagagerik, at Aliku ALA nen Muta yoge logonet,

²⁴“It aakumi Iterali wone yoroorak nogo yi aret. Tut 7 Penenak tanggal 1 paga ari wage kenok, tat yonggonggologo logonet, kuwak eeppunuk, nalut eeriyak ake leenak nogo aberuwak nduk, oone nggwok eeka trompet nogo oone pu kunik-kunik eeke kenok,

²⁵it yabu eeka'lek yi mendek ndi mendek Naliku ALA nake kani kuniyak nduk, wo'niri wogo logowak, yegerak, yoret o,” yinuk, yoreegerak.

²⁶ Yoge nagagerik, at Aliku ALA nen Muta yoge logonet,

²⁷“Tut 7 penenak tanggal 10 paga ti, it aakumi inomaluk lek eerogo piinok, an ninom lambunggo logorak nogo abeko logorak aret me, tanggal ti ari wage kenok, an nalut eerumunggup nduk, kuwak eeppunuk, kinambe mage negen logonet, kinamendek ambi Naliku ALA nake kani kuniyak nduk, wo'niri wogo logomunggup o.

²⁸Ti eyom paga aakumi an Ala ninom lambunggo logorak koonak me, kit kinomaluk mbo punuk, Naliku kinogoba Ala an ninom lambunuwok nduk, eekwi me, kit nen ne ti paga yabu eeriyak mage o.

²⁹Aap ambi nen ne ti eyom paga ambe mage logorak yugu nogo taganogo punuk mbi ugun nengge kenok, at owe-awot inenggela'me nen enggaawak lek eerogo puwak o.

³⁰Ne ti eyom paga aap ambi nen yi eekak ndi eekak eeke kenok, aap ti owe-awot inenggela'me nen lek eerogo pigin aret o.

³¹Ne ti eyom paga ti, kit yi eekak ndi eekak eeriyak mondok mage o. Wone yi ti, kit logowam time abok aret wonogo logonet, kit inom, kinapuri-kinombowologwe nda'narit nogo logogun inom, mondok-mondok aret eeko logomunggup o.

³²Ne ti eyom ti, nogo 6 yippunuk, ko'lu paga yonggonggologo logorak nogo aret me, kit kinambe mage negen logonet, yabu eeka'lek tat yonggonggologo logomunggup o. Tut ti nogo penenak tanggal 9 oonegen kilu yi nage kuli nen nok, ko'lu oonegen kilu yi nage kuli ti, kit kinake aret me, yonggonggologo logonet, nalut eeko logomunggup o,” yinuk, yoreegerak.

³³ At Aliku ALA nen Muta yoge logonet, “It aakumi Iterali wone yoroorak nogo yi aret. Eyo engga kalenogo inawooliya wukko'net wogogwaarak nogo aberogo Naliku ALA nalut eeko logonet, laago lako logorak nogo ti, tut 7 penenak tanggal 15 paga laago larit ne 7 kuli aret ari noorak me,

³⁴

³⁵laago ne iyaalok lakwi nen nugwa 7 kuli yi mendek ndi mendek Naliku ALA nake kani kuniyak nduk, pi wogo logowak o. Ne iyaalok paga inom, ti'nuk, nogo 7 yinuk, ko'lu irip paga inom, nogo ti, yabu eeka'lek yi mendek ndi mendek kani kuniyak nduk, Naliku ALA nake pi wogo logomenggaarik, kuwak eeppunuk, nalut eeko logowak o.

³⁶

³⁷An Ala nake warogo kani kunggwi, gandum anggen yigirogo an Ala nake pugwi, ko'lu-kii'me pi woroorak yugu nogo yi mendek ndi mendek warogo nake wo'nugwi, anggur amburu nake kilirogo pugwi, Naliku ALA nen laago lariyak punogo pereegirak ti abok aret, Yi Ala alut eeruwok nduk, pi wogo, yinuk, Naliku ALA nake kani kuniyak nduk, pi wogo logomenggaarik, kuwak eeppunuk, nalut eeko logowak o.

³⁸Inale'nggen paga laago lako logonet, yi mendek ndi mendek an nake puurak yagarak nogo ti, nogo 6 yippunuk, ko'lu paga yonggonggologo logonet, Naliku ALA nalut eeko logonet pi woroorak yugu inom, ndi, Wa, yo'nogo logonet, nake pugwi inom, ambi onggo lek we aret an wo'nugwi inom, An ndogop Ala ake pikit o, yinuk, kumbuk mbambunuk, wo'niri wogwe inom, nogo mendek ti lek o. Ata, yi puurak yagarak ti, ti inom nabenogo pi wogo logorak nduk, yagi o.

³⁹Togop me, tut 7 penenak tanggal 15 paga yi mendek ndi mendek anggen kole aremenggerak mbanogo iname mambunuk, laago eyo engga kalenogo inawooliya wukko'net wogogwaarak aberogo Naliku ALA nalut eeko logonet, inale'nggen paga lakwi iigak, ne 7 aret ari nawak o. Ti eeko logonet, ne iyaalok inom, ti'nuk, nogo 7 yinuk, ko'lu inom, yabu eeka'lek tat yonggonggologo logorak eyom aret me, yabu eeka'lek tat yonggonggologo logowak o.

⁴⁰Yonggonggologo logonet, ne iyaalok lombok ti, eyoonggen-kalenggen yaremenggaarak anggen obeelom yugu kero mbanogo waganggwi, eyo wonoongga negen mbanogo waganggwi, eyo engga mili kenok kalenogo waganggwi, yi aa'nggi paga eyo engga mili kenok mbanogo waganggwi, ee'nuk, iniki ale'nggen paga Naliku inogoba Ala nalut eekwi iigak, ne 7 aret aruwak o.

⁴¹Naliku inogoba Ala an nen aret aakumi Iterali o Metit nen wogoren wage logonet, ooliya-ooliya wuppunuk, nogo yit woraawak nduk yoragagirak nogo, inombowologwe nda'narit nogo logogun nogo nen ineenu aruwak nduk, it Iterali mendek nen ndarak kenok ooliya-ooliya wuppunuk time logonet, nalut eeko logonet inale'nggen paga lakwi iigak, ne 7 aret ari nawak o. Laago lariyak nogo ti, tahun ambi eekak paga tut 7 penengge kenok, Naliku ALA nalut eeko logonet, inale'nggen paga lakwi iigak, ne 7 aret ari nawak o. Ti eeko logorak ti, inapuri-inombowologwe nda'narit nogo logogun nogo mondok-mondok eeko logowak, yegerak, yoret o,” yinuk, yoreegerak.

⁴²

⁴³

⁴⁴Yoge mbareegi, aakumi Iterali netik-netak laago lako logowak nduk, at Aliku ALA nen yoreegerak nogo Muta nen aakumi Iterali yoragagerak.