Read Western Dani Ala Unde 26 Bible Online

Ala Unde 26 - Western Dani bible

Ala Unde 26

¹ Yoge nagagerik, “Naliku inogoba Ala an aret me, nobaane'me kugi ogut ogobakkigirogo pugwi, yi mendek ndi mendek ogut agago pugwi, inagugiwak ogobakkigirogo pugwi, yugum ayo waganogo iname pugwi, eeppunuk, inendobanggun yindumbunuk, alut eeko logorak mage o.

²Naliku ALA an aret me, nogo 6 yinuk, ko'lu paga yonggonggologwe puk logowak nduk, leenogo pateegirak nogo abekwi, ndi, nawooliya wurik magame nogome ayuk wukwi, eeko logowak o.

³ It nen an wone lengganogo yorage nogo mugurok nogwe, ndi, wone, Yogop ee'nu ndogop ee'nu, yorage nogo liirogon eerit nogwe, eekwi iinok,

⁴mayu wage menggerak eyom paga mayu nappi wage neenok, inanggween paga yi mendek ndi mendek yaremenggaarak put age, ineyabume yi eyo ndi eyo anggen ambik yi'nage, eeremenggerak me,

⁵yaremenggaarak eebe nenet nogwe iigak, anggur anggen kole age, ndi, anggen kole aremenggerak me mbanogo nenet nugwi iigak, peebi yi mendek ndi mendek alik yariyak eyom aret ari nage, eeke logogin me, inambi ndonggok togon nunggwi, iname logonet iniki ugun tayenak aret wonogwe, eeko logowak o.

⁶Inale'nggen paga iname ugun obeelom logowak nduk, eeppiyaagin me, inagabiti mbaka'lek iniki ugun nogo yugun o. Ndi, ta'ngge anini warak mendek iname nen mugogo nappege, inom wim mbanak nogo wogwe iyo non mbanogo piige, eeke neegak,

⁷inom wim mbanak muguren inoorogo piinet nugu logonet,

⁸it Iterali ineebe 5 nen it aap inom wim mbanak ineebe 100 aret tebenogo piigwi, ndi, it Iterali ineebe 10 nen it aap inawim ineebe sepuluh ribu aret inoorogo piigwi, eerit nogo logogun o.

⁹An nen nale'nggen inoba piige logonet, wone ninom nggaruk togon mbaneegirak nogo a'me aret aruwak nduk, inombowologwe ndaganako logonet ambik lombok aruwak nen wogoraagin o.

¹⁰Yaremenggaarak nogo ambik arigin me, aa'nduk mbanak pi unggwemenggaarak awo nengga'lek wonage nogo mbo wumbi woraanuk, awo mbanogo obaane'me aret pi unggwogwe, eeko logogun o.

¹¹Aap yi, abu neebi o, yinuk, nawoori piiga'lek inenggela'me aret wonage logonet,

¹² an inogoba aret age, ndi, it an napuri aret ogwe, eeruwak nduk, an it ninom mondok aret logogin o.

¹³Inayeloman wonogo logonet, aaninggin inoba wonage paga inena yuwo eerak wonogwe nogo it Iterali inengga pirak togon nugu logowak nduk, It aakumi o Metit mendek nen inayeloman eeppiirogo logorak lek o, yinuk, Iterali mendek wondet eerogo piinok, o Metit nen wogoren wagagirak Naliku inogoba Ala nogo ti, an aret o, yinuk, yegerak, yoret o,” yoreegerak.

¹⁴Yoge nagagerik, “Togop eerogo piyareegirak kwe, it nen an noone liirogon konengga'lek mbo pugwi, wone, Yogop ee'nu ndogop ee'nu, yorage nogo liirogon eeka'lek wonogwe,

¹⁵wone lengganogo yorage nogo meek eerogo pugwi, eeko logorak wone yorage nogo, Nineebi o, yinuk, peyak wurogo negen mbo pugwi, wone, yogop ee'nu ndogop ee'nu, yorage yi abok aret liirogon eeka'lek logonet, wone ninom nggaruk togon mbaneegurak nogo taganogo pugwi, eekwi iinok,

¹⁶an nen eeppiyoorak nogo yi aret. Abera'lek me aaninggin inoba nappi woraminggirak paga andi inagabolo paga kani pege logonet, inigen mbuk eerogo piige, wono eerogo pit unggwage logonet, ineebe aret lek eerogo piige, eerigin o. Yabu ambik lombok waganogo yaremenggaarak nogo inawim nen mbanggola wogo logogun me, we aanom warogo aret yako logogun o.

¹⁷An nambokan piyaminggirak me, inom wim mbanak nen tebenogo piya wogwe, it aakumi Iterali ineebi inombakwi nogo nen inabu'me tebenogo piigwi, ndi, it nen muguren wogwe lek iigak kwe, it Iterali nen mban mbaganit nogwe, eeko logogun o.

¹⁸Togop eeppiyamenggaarak kwe, it Iterali an noone liirogon konengga'lek mban wonogwe iinok ti, inomaluk onggo aaninggin ne 7 kuli aret inoba kwippiige logogin o.

¹⁹It Iterali nen inogogumbuk wogoppakwi me, mayu wambi worookwak mbogut yugum negen kunogo pege, inanggween paga yugum tembaga negen kunogo pege, eerigin o.

²⁰Eerogo piminggirak me, yabu nggwok aret waganogo yi mendek ndi mendek yaremenggaarak kwe, eebe kole age, inanggween paga yi eyo ndi eyo anggen abe yege, eerigin lek me, we aanom warogo aret yako logogun o.

²¹It inogogumbuk a'nuk yorage nogo koneniyak ineebi nombakwi mban wonogwe iinok, inomaluk eekwi nogo onggo ndak-ndak aret andi-pandi ne 7 kuli aret inoba wuppi wage logogin o.

²²Ndi, an nen yi mendek ndi mendek inanini wulo penaame mendek nappiya woraminggirak paga it Iterali inapurilogwe ndiniren penaame nibinogo nunggwi, inaanggumi lek eerogo tigippiigwi, ineebe ambitak mban me, iname time aakumi nobek lek logowak nduk, inoorit unggwogwe, eeko logogun o.

²³Inomaluk onggo togop eeppiige neegak kwe, Yi Ala nen aret eeppinanege o, yinuk, iniki liippega'lek inogogumbuk mban wonogwe iinok,

²⁴an kunduk nogogumbuk a'nuk inomaluk onggo ne 7 kuli aret aaninggin inoba kwippiige logogin o.

²⁵Inomaluk onggo inoba kwippiige logonet, wone ninom abuk nggaruk togon mbaneegurak nogo taganogo pemenggaarak paga inom wim mbanak nogo nen inoorit woraawak nduk yonggo piige, Ninoorukwak o kota pak wurik me unggwi nawok o, yinuk, unggwi namenggaarak kwe, kugi lengga ineebe paga iyak wurogo punuk inom wim mbanak nen inoori woraawak nduk, wogorage, eeke logogin o.

²⁶Ndi, inambi an nen wogorage nogo lek eerogo pege neenok, kumi 10 nen inambi togolowak ambit paga lappunuk, aaninggin wakkagak wogorogwe iinok, namenggaarak kwe, abu nen wo'no lu yogwe mban aret logogun o.

²⁷Aaninggin togop aret eeppiyaminggirak kwe, an noone konengga'lek inogogumbuk mban wonogwe iinok,

²⁸an kunduk, nogogumbuk a'nuk nanini nen inomaluk onggo ne 7 kuli aret aaninggin inoba kwippiige logogin o.

²⁹Kwippiyaminggirak paga inambi abu nen inapurilogwe wologwe inom, komologwe inom, inoorogo nonggo logogun o.

³⁰Ndi, puut paga inagugi aanggo warogo kani kunggo menggam lek eerogo pege, obari abe kaga nogo kani kunggo menggam eerak kalenak-pugunik eerogo pege, it ineebe kanggwi iinok, inagugiwak ogobakkigirik nogo imbirak lambunogo piige, ineebe peyak wurogo negen nambo'me piige, eeke logogin o.

³¹Inawi kota abe ti, yinik-minik eerogo pege, inagugi alut eeko logowam yigirik-noonom eerogo pege, obari abe kenok niniki ale'nggen kaakit nduk nake warogo pugwi nogo kunduk wagangga'lek mbo pege, eeke neenok,

³²inom wim mbanak nogo nen inanggween ti paga ye mbanggola unggwogo logonet, inanggween ale-pale eerogo piminggirak nogo inigen kogo logomenggaarik, Wi, yinuk, pi wako logogun o.

³³Inom wim mbanak nen aakumi Iterali iname nen mugogo wumbiinok, muguren inoorit nogwe iinok, yi aakumi ndi aakumi inanebunu alitak lombok inenggela'me ma'narit nawak nduk, inom wim mbanak yonggo piyaminggirak eeppiya wogwe iinok, Iterali inawi kota abe wurik ti lek age, ndi, inanggween nogo ti, we o wogo wonage, eeke logogin o.

³⁴Togop eeppiya wogwe iinok, it Iterali mendek nen inanggween lombok paga wonage logonet, tahun 6 eeppunuk, tahun ambi paga inanggween lubungge logowak nduk mbo puurak nogo eeka'lek me, ti eyom paga it ineebe inanggween paga lek it inom wim mbanak inanggween paga wonogwe iigak, inanggween we o wogo logonet, tahun 7 ti paga inanggween lubungge logowak nduk yabu wagangga'lek mbo punuk, wonogo logorak kokwak aret arigin o.

³⁵

³⁶Ndi, it Iterali ando inooka'lek inom wim mbanak inenggela'me wonogwe nogo ti, inaganak nugiranet nugu logowak nduk, eeppiyaminggirak me, o wiya nen eyoongga ambit menenak nen oone nobo ari kenok, Yi aakumi nen ninoorit wogwe o, yinuk, muguren nogwe lek iigak, aakumi inoorit nogwe iinok, mbaganit nogo mengga kwak mbaganit nogo logonet, yigeebu wanggwi,

³⁷ndi, inoorit wogwe lek kwe, Ninoorit wogwe yi o, yinuk, at ambi nen at ambi aganak waganogo pegak eekwi, eerit kole mbaganit nogo logogun me, inagap ndakkoloorak meek aret kogo logogun o.

³⁸Inagap ndakkoloorak meek me, yi aakumi ndi aakumi inanebunu alik mendek inenggela'me inenggaawak lek age, it inom wim mbanak inanggween nen ineebe laganogo nengge negen lek eerogo piige, eeke logogin o.

³⁹Ndi, it ando inooka'lek teppiigwi iinok, it inom, inombomini inom, maluk eeko nogogwaarak onggo it inom wim mbanak inanggween paga time nen ineebenowak ko eerogo piinet unggwage logonet, ineebe lek ogo logogun o.

⁴⁰Togop eeppiige logogin kwe, it inombomini inom nen an noone yugu taganogo nambokan laganggo logonet, At oone eeriyak nineebi o, yinuk, inogogumbuk wonogwe iinok, an togon nogogumbuk a'nuk, inom wim mbanak inenggela'me logowak nduk nappiyaminggirak nogo inomaluk ti, aap inagabolo mbanogo mbo nappogo mengga kwak, iniki wogoppakwi nogo mbo punuk, iniki tebeppakwi, ndi, Nit maluk eekoorak paga aret eeppinanege o, yinuk, inomaluk paganggwi, eekwi iinok,

⁴¹

⁴² an nen Yakup nimbirak wone abuk nggaruk togon mbangge, Itak nimbirak wone abuk nggaruk togon mbangge, Abarakam nimbirak wone abuk nggaruk togon mbangge, eeke logonet, Kit kinanggween wokkiraagin o, yereegirak nogo abeke logominggirik, inanggween paga piya woroorak koonigin o.

⁴³Togop eerigin aret kwe, an nen eeko logorak wone yorage nogo meek mbakwi, ndi, wone lengganogo yoragagirak nogo eeriyak, Nineebi o, yinuk, noone taganggwi, eeremenggaarak nogo ti, maluk aret me, piya woroorak torinake logonet, inanggween nogo lubungge kagak, yi tahun ndi tahun yi mendek ndi mendek yaka'lek ineebe lek o wogo aret teppuwak nduk, eeppiyaagin o.

⁴⁴Togop aret eeppiyaminggirak kwe, it aap inom wim mbanak inanggween paga wonogwe iigak, an ninom wone abuk nggaruk togon mbaneegirak nogo lek eerogo pukwak me, an nen mbo piige, Aakumi yi, abu neebi o, yinuk, ineebe apit aret lek eerogo piige, eerigin lek o. An Naliku inogoba Ala nen aret yagi o.

⁴⁵Naliku ALA an aret me, yi aakumi ndi aakumi inanebunu alik mendek inigen iigak, it inombomini inogoba Ala logokit nduk, o Metit nen wogoren wagagirak nogo ninom wone abuk nggaruk togon mbaneegirak abeke logonet, inagap ndarigin, yegerak, yoret o,” yinuk, yoreegerak.

⁴⁶Wone yi ti, wone lengganak inom, eeko logorak wone yugu inom, “Yogop ee'nu ndogop ee'nu,” wone yugu inom, aakumi Iterali eeko logowak nduk, at Aliku ALA nen puut Tinayi paga logonet, Muta yoreegerak nogo ti aret.