Read Western Dani Ala Unde 27 Bible Online

Ala Unde 27 - Western Dani bible

Ala Unde 27

¹At Aliku ALA nen Muta yoge logonet,

²“It aakumi Iterali wone yoroorak nogo yi aret. Aap ambi nen aap alik ambi wonok wage logomenggerik, Aap yi Aliku ALA wogorikit o, yinuk, kumbuk mbanogo nake leenogo panemenggerak kwe, lek age kenok, kumbuk mbanemenggerak nogo, Onggo ndogop pogo logowak o, yinuk,

³onggo koonak an nawooliya wurik me wonage nogo mugurok mban pogo logowak o. Aap ndarak kagaktahun 20 nen nok tahun 60 eerak kenok, onggo mbuti wu perak 50 pugwi,

⁴Ndi, kumi kenok, mbuti wu perak 30 pugwi,

⁵Kumi-aap ndarak iigak tahun 5 kuli nen tahun 20 eerak aap kenok, mbuti wu perak 20 pugwi, ndi, kumi kenok, 10 pugwi,

⁶Wologwe-komologwe ndarak iigak tut ambit penenak nen nok tahun 5 eerak, wologwe kenok, mbuti wu perak 5 pugwi, ndi, komologwe kenok, 3 pugwi,

⁷Kumi-aap inanggok ndarak iigak tahun 60 ilik, tahun ambik eerak a, aap kenok, mbuti wu perak 15 pugwi, kumi kenok 10 pugwi, eeko logowak o.

⁸Ndi, aap kumbuk mbanemenggerak nogo, Ndogop puurak, koonak nogo, awu wonage lek kenok, aap an Ala wo'niriyak nduk, kumbuk mbanemenggerak nogo wonok aap an neebe unde inowagam nogwe iinok, aap an neebe unde nen aap nogo maloppunuk, at kumbuk mbanemenggerak amendek wonage nogo mugurok mban onggo puwak nduk, yogo logowak o.

⁹Aakumi nen inaanggo ambi Naliku ALA nake op wo'niriyak mendek, Yi Kaliku ALA kake o, yinuk, kumbuk mbanogo wo'niri wage kenok ti, Naliku ALA nake nggomoorogo panemenggerak me, ti paga ambi eeriyak lek mondok nake leenak aret logowak o.

¹⁰Nake pugu nogo alik ambi onggo mbanggwi, abe kenok obaane'me maluk mendek pugwi, maluk negen kenok obaane'me abe mendek pugwi, eeriyak mage o. Nobaane'me-kobaane'me togop eeriyak kenok, inaanggo nogo imbirak nake pugu leenak aret logowak o.

¹¹Ndi, inaanggo Naliku ALA nake wo'niriyak mage nogo mendek kagak wo'niri woroorak mbake kenok, nugwa wo'niri woroorak mage o. Ata, aap an neebe unde nen maloppuwak nduk, pi nogwe iinok, aap an neebe unde nogo nen inaanggo ti obeelom a, maluk a, maloppunuk, Obaane'me wu ndogop puurak o, yinuk, koonogo pogo logowak o.

¹³Onggo ndogop puurak, koonogo punuk, yoremenggerak aap aanggo unde nen, Kumbuk mbanggirak nogo lek agaarak me, obaane'me wu aret pikit o, ari kenok, awu pege logonet, oba lunogo inom aret pege logowak o.

¹⁴Aap ambi nen awi wurik paga Naliku ALA nake leenogo puurak mbake kenok, aap an neebe unde nen o wurik nogo maluk a, abe a, maloppege logomenggerik, o wurik ndak-ndak aret onggo koonogo punuk, aap ambi kuniyak mbake kenok, onggo koonak ti aret pege logowak o.

¹⁵Ndi, aap awi unde nogo nen, Nawi Ala ake pigirak yi, obaane'me nawu aret pikit o, ari kenok, onggo koonak nogo ndak-ndak pege logonet, oba lunogo inom aret pege logomenggerik, o nogo at aret kolaawak o.

¹⁶Ndi, aap ambi nen anggween ogoba eyate wogoreegerak ando, Aliku ALA wogorikit o, mbake kenok, anggen awi kunggo logonet, dua ratus dua puluh liter ti, mbuti wu perak 50 pogo menggaarak me, Anggween ti paga anggen awi mande liter paga yariyak o, yinuk, lingginogo punuk, lingginik nogo ndak-ndak aret onggo koonogo pogo logowak o.

¹⁷Aap nogo nen tahun 50 age paga inanggween kunik inanggween unde kologwe nogo eyom paga, Nanggween yi Ala wogorikit o, ari kenok, onggo koonak nogo ndak-ndak kunggologo logowak o.

¹⁸Ndi, tahun 50 nogo abu eeppunuk, Ala wogorikit o, ari kenok perak, aap an neebe unde nen tahun mande eeppunuk inanggween kunik inanggween unde nogo kolaagun o, yinuk, lingginogo punuk, tahun eerak ndak-ndak aret onggo teberogon aret koonogo pogo logowak o.

¹⁹Ndi, aap anggween unde nen, Nanggween Ala wogogirak nogo obaane'me nawu aret pikit o, mbake kenok, onggo koonak nogo ndak-ndak pege logonet, oba lunogo inom aret pege logomenggerik, anggween nogo at aret kolaawak o.

²⁰Anggween paga wu kunik nogo an Ala wo'nega'lek kagak aap alik ambi nen kunggola wage kenok, at anggween unde nogo nen peebi wu obaane'me punuk, koloorak mondok lek aret o.

²¹Ndi, tahun 50 age paga inanggween kunik inanggween unde kologwe nogo eyom paga at wogoriyak lek Naliku ALA nanggween nake leenak aremenggerak me, it aap an neebe unde inanggween aret aruwak o.

²²Aap ambi ogoba nen anggween wogorulik at alik nen kunggolamenggerak nogo, Ando Aliku ALA wogorikit o, mba'nuk wogoge logomenggerik,

²³ti'nuk, Nanggween at Aliku ALA wogogirak nogo obaane'me nawu aret pikit o, ari kenok, aap an neebe unde nen tahun mande eeppunuk inanggween kunik inanggween unde kologwe nogo linggimbunuk, onggo ndak-ndak koonogo yoge kenok, aap anggween unde nen anggween nogo obaane'me awu waganogo Naliku ALA an aret wo'niruwak o.

²⁴Tahun 50 ari nage kenok perak, at anggween unde lek awu paga kunogo an Ala wo'niremenggerak me, nggween nogo aa'nduk unde wonagagerak nogo aret kolaagin o.

²⁵Yi mendek ndi mendek an Ala wo'niriyak nogo ti, nawooliya wurik me onggo koonogo pugu ti, wu syikal ambiret ti, gera 20 aret me, nogo ndak-ndak aret onggo koonogo pogo logowak o.

²⁶Inaanggumi tapi-ndomba ndaka'lek me iyaalok nda'nage nogo ti, Naliku ALA namendek aret o. Ti mendek ti, Naliku ALA namendek aret me, an, Wa, yo'nogo logonet, ti mendek nggomoorogo puurak mage o.

²⁷Ndi, iyaalok ndarak an wo'niri woroorak mage nogo mendek wo'niri wogo logomenggaarik, ti'nuk, Nawu obaane'me Ala wogorikit, mbakwi iinok, onggo koonogo pugu nogo pogo logonet, oba lunogo inom aret pogo logowak o. Ndi, awu obaane'me an Ala wo'niriyak mbaka'lek kenok, aap alik nen kunggoloorak mbakwi iinok, onggo koonak nogo ndak-ndak aret pogo logowak o.

²⁸ Aakumi inom, inaanggumi inom, inanggween inom, inamindik-inamendek abok aret iniki abuk nggaruk togon Naliku ALA nake nggomoorogo panugwi iinok ti, Naliku ALA nake mondok-mondok leenak mage aret me, onggo kunggologwe, nake pugu nogo kologo logonet, obaane'me wu pi wogwe, eeko logorak mage o.

²⁹Aap ambi wariyak leenak kagak, it nen, Wariyak lek o, yinuk, agap ndarogo wu obaane'me pi woroorak lek o. Eebe aret warogo puwak o.

³⁰ Yi mendek ndi mendek nggween paga yarak inom, eyo anggen nonggo menggaarak logwe inom, anggen 10 yemenggerak kenok ambi yendenogo puurak yugu ti, Naliku ALA namendek aret me, Naliku ALA nake mondok leenak aret logowak o.

³¹Togop aret me, pogo logomenggaarik, inamendek yendenogo pemenggaarak nogo ando it koloorak mbakwi kenok, onggo koonak nogo pogo logonet, oba lunogo inom aret pogo logowak o.

³²Inaanggumi tapi-lembu inom, kambin-ndomba inom, 10 wonage kenok, ambi ti, an namendek aret me, aap ndegeninaka nogo aanggumi inanggenogona nen wumbiige logonet, 9 linggimbunuk, 10 linggini noorak ambi ti, Naliku ALA namendek me, nake mondok leenogo panogo logowak o.

³³Lingginit nage logonet, maluk-abe leenggwi, nobaane'me-kobaane'me eekwi, eeko logorak mage o. Ndi, nobaane'me-kobaane'me eekwi kenok, inaanggo ti, imbirak nake leenak mage aret me, obaane'me wu wo'nugo logorak mage, yegerak, yoret o,” yinuk, yoreegerak.

³⁴Yogop eeriyak ndogop eeriyak, wone yi apit aret aakumi Iterali eeko logowak nduk, at Aliku ALA puut Tinayi paga logonet, Muta yoreegerak nogo ti aret.