Read Western Dani Ala Unde 4 Bible Online

Ala Unde 4 - Western Dani bible

Ala Unde 4

¹At Aliku ALA nen Muta yoge logonet,

²“Naliku ALA nen, Yogop eeriyak mage, ndogop eeriyak mage, yoragagirak nogo it Iterali ambi nen ineenggo'lek logonet, maluk eekwi iinok, eeko logorak wone it aakumi Iterali yoroorak nogo yi aret o.

³It an neebe unde inowe amburu oba kilippemenggerak nogo nen maluk eeremenggerak paga aakumi Iterali inoba arumenggerak me, at maluk eeremenggerak nogo omaluk lek eerogo pikit nduk, Naliku ALA nake tapi ngguunok awooluk awinde-obaande eerak lek amuni mbanak kenok mban wonok,

⁴an ninom lambungge minggim nawooliya wurik me tu unggwogo menggam nenggaanom paga taati pi wage logomenggerik, nake puurak nogo anobak paga eenggi tebenogo punuk, Naliku ALA nenggaanom paga waruwak o.

⁵Wake kenok, aap an neebe unde nogo nen amiya nogo wonok an ninom lambungge minggim nawooliya wurik inikime time unggwi nanuk,

⁶amiya nogo eenggi paga labungge logomenggerik, o mage lombok minggim aken nggwe kagak, yum tugunik endekem nggwe Naliku ALA nenggaanom paga taati ne 7 kuli werenogo pit nawak o.

⁷Pit nage logomenggerik, amiya ando waganogo an ninom lambungge minggim nawooliya wurik me nenggaanom paga obari abe kani kunggo menggam eyo owak mippugu irip-irip to eerak agi paga labunogo punuk, amiya ando apit nogo waganogo an ninom lambungge minggim nawooliya wurik tu unggwogo menggam endekem nggwe nake warogo kani kunggo menggam abu'me time kilirogo puwak o.

⁸Kilirogo pege kenok, aap an neebe unde maluk eeremenggerak nogo nen tapi ngguunok nake kani kuniyak warak nogo, aanogum paga nabenak agaraarin inom, aan paga mendek amok inom,

⁹apenggen inom, ape amok inom, ogogun inom, Ala nimbirak lambunikit o, yinuk, tapi warogo amok leenogo an nake kani kunggo mengga kwak, togop aret amok abok leenogo pege kenok, aap an neebe unde nen kani kunggo menggam kani kunuwak o.

¹¹Kani kumbunuk, tapi ngguunok nogo agabolo inom, eebe mbanak inom, anobak inom, aawi-obaak inom, aanagale inom,

¹²abok aret wonok owa'nagat wurik endekem wundi nage logomenggerik, wun mbo pi nogo menggam magame nogome eebe apit aret kani nawak nduk, kumbuwak o.

¹³Ndi, Naliku ALA nen, Yogop eeriyak mage, ndogop eeriyak mage, yoragagirak nogo it aakumi Iterali wonogwe abok aret nen ineenggo'lek logonet eekwi iinok ti, maluk aret eeremenggaarak me,

¹⁴Nit maluk aret eekoorak kogo o, yinuk, ineenu ogo logomenggaarik, inomaluk lek eerogo piyaakit nduk, tapi ngguunok awooluk ambi wonok an ninom lambungge minggim nawooliya wurik me tu unggwogo menggam pi wogo logomenggaarik,

¹⁵it aakumi Iterali inoweewi nogo nen Naliku ALA nenggaanom paga tapi ngguunok nogo anobak ineenggi tebenogo punuk, nenggaanom paga waruwak o.

¹⁶Wakwi iinok, it an neebe unde inowe amburu kilippemenggerak nogo nen tapi amiya ando wonok ninom lambungge minggim nawooliya wurik inikime unggwi nanuk,

¹⁷amiya nogo eenggi paga labungge logomenggerik, yum tugunik eraaninu endekem nggwe Naliku ALA nenggaanom paga ne 7 kuli werenogo pit nawak o.

¹⁸Pit nage logomenggerik, amiya ando waganogo an ninom lambungge minggim nawooliya wurik me nenggaanom paga obari abe kaga kani kunggo menggam eyo owak mippugu irip-irip to eerak agi paga labunogo punuk, amiya ando apit nogo wonok an ninom lambungge minggim nawooliya wurik tu unggwogo menggam abu'me time kilirogo puwak o.

¹⁹Kilirogo pege kenok, aap aanggo unde nen tapi warak amok leenogo pemenggerak nogo aap an neebe unde nen kani kunggo menggam kani kunuwak o.

²⁰Kani kumbunuk, tapi ngguunok eebe nogo eeriyak ti, aap ambi nen maluk eeke kenok omaluk lek eerogo puwak nduk, tapi ngguunok eeriyak yagarak togop nogo aret eeruwak o. Ti eeko logorak nogo ti, an nen inomaluk lek eerogo piinok, ninom lambunik logokit nduk, aap an neebe unde nen nggami aanggo wakwi kwak eeko logorak nogo ti aret.

²¹Ndi, tapi eebe nogo apit aret waganogo owa'nagat wurik endekem nggwe nogome pi nage logomenggerik, inomaluk lek eerogo piyaawak nduk, aa'nduk tapi eeremenggerak nogo ndak-ndak aret kani nawak nduk, kumbuwak o. Ti eeko logorak nogo ti, aakumi Iterali wonogwe abok aret inomaluk lek eerogo piyaakit nduk, an nake warogo pogo logorak nogo ti aret.

²²Ndi, aap inowe wone koongga ambi nen Naliku ogoba Ala an nogo nen, Yogop eeriyak mage, ndogop eeriyak mage, yoragagirak nogo eenggo'lek logonet, eeke kenok ti, maluk aret me,

²³iniki nen, Ti maluk aret eekirak kagi, mba'nuk, eenu age logomenggerik, omaluk lek eerogo puwak nduk, kambin ngguunok awinde-obaande eerak lek amuni mbanak ambi wonok

²⁴an nake warogo kani kunggo menggam pi woraanuk, Naliku ALA nenggaanom paga taati kambin nogo anobak eenggi tebenogo punuk, waruwak o. Ti eeko logorak nogo ti, omaluk lek eerogo pikit nduk, nake warogo pogo logorak nogo ti aret.

²⁵Ti eeke kenok, omaluk lek eerogo pikit nduk, aap an neebe unde nogo nen kambin warak amiya nogo eenggi paga ando wonok nake kani kunggo menggam eyo owak mippugu irip-irip to eerak agi paga labunogo punuk, amiya apit nogo waganogo nake warak kani kunggo menggam abu'me time kilirogo puwak o.

²⁶Pege logomenggerik, amok nogo abok aret an ninom lambunik logowak nduk, nake warogo wo'nogo logonet, amok kenok kani kuniyak yagarak nogo ndak-ndak aret eerogo punuk, kani kunggo menggam kani kunuwak o. Ti eeko logorak ti, aap nogo omaluk an nen lek eerogo punuk, nimbirak lambunik logokit nduk, aap an neebe unde nen nggami aanggo wakwi kwak eekwi iinok, omaluk lek eerogo puwak nduk eeko logorak nogo ti aret.

²⁷ Ndi, Naliku ALA nen, Yogop eeriyak mage, ndogop eeriyak mage, yoragagirak nogo aap ambi we ugun mendek nen eenggo'lek logonet eeke kenok ti, maluk aret me,

²⁸iniki nen, Ti maluk aret eekirak kagi, eenu age logomenggerik, omaluk eeremenggerak nogo lek eerogo puwak nduk, kambin kooli awinde-obaande eerak lek amuni mbanak kenok mban wonok

²⁹an nake warogo kani kunggo menggam pi woraanuk, omaluk lek eerogo puwak nduk, kambin wariyak nogo anobak eenggi tebenogo punuk, waruwak o.

³⁰Warogo pege kenok, aap an neebe unde nen kambin amiya nogo ando eenggi paga wagangge logomenggerik, nake kani kunggo menggam eyo owak mippugu irip-irip to eerak nogo paga labunogo punuk, amiya apit nogo waganogo kani kunggo menggam abu'me kilirogo puwak o.

³¹Ndi, amok nogo abok aret an ninom lambunik logowak nduk nake warogo wo'nogo logonet, amok kenok aap aanggo unde nen leenogo puurak yagarak nogo ndak-ndak leenogo pege kenok, aap an neebe unde nen Naliku ALA nake kani kunggo menggam kani kunemenggerak obari abe kage logonet, niniki ale'nggen kaakit nduk, kani kunuwak o. Ti eeko logorak ti, aap nogo omaluk an nen lek eerogo punuk, nimbirak lambunik logokit nduk, aap an neebe unde nen nggami aanggo wakwi kwak eeke kenok, omaluk lek eerogo puwak nduk, eeko logorak nogo ti aret.

³²Ndi, aap ambi nen, Nomaluk lek eerogo panuwak o, yinuk, ndomba ambi an nake pi woroorak mbake kenok ti, ndomba kooli awinde-obaande eerak lek amuni mbanak kero wonok,

³³an nake warogo kani kunggo menggam pi wage logomenggerik, omaluk lek aruwak nduk, ndomba wariyak nogo anobak eenggi tebenogo punuk, waruwak o.

³⁴Wake kenok, at aap ti, omaluk lek aruwak nduk warak amiya nogo aap an neebe unde nen eenggi paga ando woppunuk, nake warogo kani kunggo menggam eyo owak mippugu irip-irip to eerak agi nogo paga labunogo punuk, amiya apit nogo waganogo kani kunggo menggam abu'me time kilirogo puwak o.

³⁵Kilirogo pege logomenggerik, amok nogo abok aret an ninom lambunik logowak nduk, ndomba nake warogo wo'nogo logonet, amok kenok aap aanggo unde nen leenogo puurak yagarak nogo ndak-ndak leenogo pege kenok, aap an neebe unde nen amok leenak nogo alik mendek nake kani kuniyak nduk, kani kunggo menggam pi woramenggaarak wonage nogo, inom lambunogo kani kunuwak o. Ti eeko logorak ti, aap nogo omaluk an nen lek eerogo punuk, nimbirak lambunik logokit nduk, aap an neebe unde nen nggami aanggo wakwi kwak eekwi iinok, omaluk lek eerogo puwak nduk, eeko logorak nogo ti aret, yegerak, yoret o,” yinuk, yoreegerak.