Read Western Dani Ala Unde 7 Bible Online

Ala Unde 7 - Western Dani bible

Ala Unde 7

¹Yoge nagagerik, wone ambi at Karun apuri inom yoraawak nduk, at Aliku ALA nen Muta yoge logonet, “Ala ake pugu ti, abu alik leenak lombok me, lalembunuk, iniki abe'nagak mban eekwi iinok, lek aruwak nduk obaane'me punuk, eeko logorak wone nogo yi aret.

²Ala ake pugu lalenemenggaarak nogo iniki abe'nagak mban eekwi kenok, lek aruwak nduk, obaane'me kambin-ndomba wonok wo'niri wogwe iinok, an nake warogo kani kunggo menggam nogome warogo punuk, aap an neebe unde nen amiya waganogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nawak o.

³Werenogo pit nage kagak, at aanggo unde nen ake warak ageewak amok inom, aan paga mendek amok inom,

⁴apenggen imbirak amok inom, ogogun paga nabenak ape inom, leenogo pege kenok,

⁵aap an neebe unde nen amok leenak nogo kani kunggo menggam Naliku ALA nake kani kunuwak o. Ti eeko logorak nogo ti, an nake pugu lalembunuk aberak mban wonage nogo lek aruwak nduk, obaane'me punuk, nake warogo wo'nogo logorak ti aret.

⁶Ndi, obaane'me pugu warak eebe nogo it an neebe unde aap kenok mban nonggo logorak kwe, abu mage lombok me, o mage leenak ambime nogome nen mban nonggo logowak o.

⁷An nake pugu lalenemenggaarak aberak wonogwe nogo lek aruwak nduk, obaane'me punuk, wako logonet, eeko logorak inom, inomaluk lek eerogo puwak nduk, wako logonet, eeko logorak inom, ti imbirak ndak-ndak aret me, inomaluk lek eerogo punuk, Ala inom lambunuwak nduk, it aap an neebe unde nogo nen nggami aanggo wakwi negen eekwi me, eebe warak ti, it aap an neebe unde inamendek aret o.

⁸Aap ambi nen an Ala nake warogo kani kungge agabolo nogo aap an neebe unde nogo kunduk koloorak op mban o.

⁹Gandum anggen yigirik wun awi ndoonak paga worakwi inom, kuwali paga lakwi inom, togolowak ndoonak paga worakwi inom, abok aret it aap an neebe unde nen, Yi Ala ake o, yinuk, nggomoorogo pugwi me, ando ndiinnage nogo it aret kologo logowak o.

¹⁰Ndi, gandum anggen yigirik nake pemenggaarak nogo ki inom, amburu paga worarak inom, ti Karun apuri inamendek aret me, ndak-ndak aret kologo logowak, yegerak, yoret o,” yinuk, yoreegerak.

¹¹Yoge nagagerik, at Karun apuri inom yoraawak nduk, at Aliku ALA nen wone ambinom Muta yoge logonet, “It aakumi nen, Ala ninom lambunik logowok o, yinuk, Naliku ALA nake pi wogwe iinok, eeko logorak nogo yi aret.

¹²An nake pi wogwe nogo ti, Nogoba Ala wa, yo'niruwak nduk, nake pi wogwe kenok, oroti ragi pega'lek kagak amburu paga mban amok mbanogo longgo warogo worarak inom, oroti ragi inom pega'lek kagak tabak worarogo punuk, amburu obaga labunogo pugu inom, gandum anggen abu abe yigirik amburu paga amok abu liirogon mbanogo kuwe worarak inom, an, Wa, yo'niruwak nduk, warak nogo inom lambunogo punuk, nake pi wogo logowak o.

¹³Ala wa, yo'nogo logonet, an ninom lambunik logowak nduk, nake warogo wo'nogo logonet, oroti ragi inom punuk, worarak nogo mendek inom an nake pi wogo logowak o.

¹⁴Oroti an nake worarak nogo ambitak mban waganogo, Yi Aliku ALA ake o, yinuk, pogo logomenggaarik, an ninom lambunik logowak nduk, nake warak amiya nogo aap an neebe unde nen werenogo pogo menggaarak me, nonggo logowak nduk, wogorogo logowak o.

¹⁵Ndi, Ala wa, yo'nogo logonet, an ninom lambunik logowok nduk nake warak nogo kunduk, ando pugu kagak o weeriyak lek o. Ata, an nake pugwi ti eyom paga aret nonggo logowak o.

¹⁶Wone kumbuk mbanemenggaarak a'me aret aremenggerak me, Wa, yo'nogo logonet, waremenggaarak ilik, iniki nen onggo lek we wo'niriyak mbake kenok warogo nake pemenggaarak a, mbanak kenok perak, pugwi ti eyom paga nonggo logonet, ando ko'lu noorak nduk teppuurak op aret kwe,

¹⁷nake warak mbanak ti wonage kagak, nogo mbere yege kenok, noorak lek apit aret kani kumbogo logowak o.

¹⁸Mbanak nogo, nogo mbere yinuk, nunggwi iinok, maluk aret aremenggerak me, nake warak ti, an wagangge, ndi, Ndogop eeppinanuwak o, yinuk, nake pemenggaarak nogo an nen eeppiige, eerigin lek o. It inobaalombok aret eekkolamenggaarak me, aaninggin ti, it inoba aret logowak o.

¹⁹Nake warak mbanak nogo mbaanggoorak mage yugu kagak mbaanggogwe iinok, noorak mage o. Ata, apit aret kani kumbogo logowak o. Nake warak mbanak nogo ti, yi aap ndi aap mage aago kenok mban nonggo logorak op aret kwe,

²⁰ninom lambunik logowak nduk, Naliku ALA nake warak mbanak nogo mage aago lek nggumun negen a'nuk nunggwi iinok perak, inoreewi inenggela'me nen enggaawak lek eerogo endekem wumbiigo logowak o.

²¹Aap a, wam a, inaanogum paga nugu menggaarak mendek a, ogole warak me mbaanggoorak mage yugu nogo mendek oba wonage kagak aap ambi nen mbaanggage logomenggerik, ti'nuk, Ala nimbirak lambunik logokit o, yinuk, Naliku ALA nake warak mbanak nogo nengge kenok, oreewi inenggela'me nen enggaawak lek eerogo endekem wumbogo logowak, yegerak, yoret o,” yinuk, yoreegerak.

²²Yoge nagagerik, at Aliku ALA nen Muta yoge logonet,

²³“It aakumi Iterali wone yoroorak nogo yi aret. Lembu-tapi inom, kambin-ndomba inom, abok aret inamok nonggo logorak mage aret.

²⁴Inaanggumi alik nen kangge kenok ilik, nggeewo ta'ngge nen wake kenok a, amok ti paga alik ambi eeriyak mbakwi kenok ti, op aret kwe, nonggo logorak perak mage o.

²⁵Aap ambi nen aanggo warogo punuk, amok leenogo Naliku ALA nake kani kungge logorak kagak, nengge kenok, oreewi inenggela'me nen enggaawak lek eerogo endekem wumbogo logowak o.

²⁶ It yi awi ndi awi wonogo logonet, yirowe-ndirowe inom, yi mendek ndi mendek inamiya warak inom, abok aret inamiya kenok, nonggo logorak mage o.

²⁷Aap ambi nen amiya ti nengge kenok, aap ti oreewi inenggela'me nen endekem wumbogo logowak, yegerak, yoret o,” yinuk, yoreegerak.

²⁸Yoge nagagerik, at Aliku ALA nen Muta yoge logonet,

²⁹“It aakumi Iterali wone yoroorak nogo yi aret. Aap ambi nen, Ala nimbirak lambunik logokit o, yinuk, Naliku ALA nake warogo pege logonet, ando mogonogo Naliku ALA nalik nake panege logowak o.

³⁰Yi mendek ndi mendek kani kunuwak nduk, at lombok eenggi paga Naliku ALA nake pi wage logomenggerik, nake warak amok inom, ape uruwak inom, eenggime woppunuk, Yi Kaliku ALA kake aret o, yinuk, titik eerogo pugwi nogo mendek aret pege logowak o.

³¹Pege kenok, aap an neebe unde nen amok nogo kani kunggo menggam kani kungge logonet, ape uruwak nogo perak, Karun apuri inom inake piigo logowak o.

³²Ala ninom lambunik logowok o, yinuk, nake warogo wo'nugwi amiya nogo werenogo pit nage, ndi, amok nogo kani kungge, eeke nogo ti, an neebe unde Karun aput ambi nen aret eeke me, aawi abeenok abe'nggan mbanak nogo ti, aap an neebe unde inalik inake aret me, aawi mbanak nogo Karun aput nogo aret wogogo logowak o.

³⁴Ninom lambunik logowok nduk, nake warogo wo'nogo logonet, ape uruwak an Ala kaakit nduk titik nugwi inom, aawi mbanak wo'nugwi inom, nogo ti, it aakumi Iterali nen aap an neebe unde Karun apuri inom wogorogo logowak nduk koonogo pigirak me, it aret wogorogo logowak, yegerak, yoret o,” yinuk, Muta yoreegerak.

³⁵Yi mendek ndi mendek Aliku ALA ake pugu nogo kani kunggo logonet, ando mogonogo Karun apuri inom wogorogo logorak yereegerak ti, Aliku ALA unde logowak nduk, mippiigo logomenggaarik, wogorogo logowak nduk, yereegerak o.

³⁶At Aliku ALA nen, “It Iterali nen an nake puurak nogo, ando mogonogo aap an neebe unde wogorogo logowak o,” yinuk, wone lengganogo yoragagerak ti, aakumi Iterali nen aap Ala unde Karun inom, apuri-ombowologwe inom, mippiinet wundi wogo logonet, mondok-mondok wogorogo logowak nduk koonogo pereegerak ti aret.

³⁷Ala ake warogo kani kunggwi, gandum anggen yigirik Ala ake pugwi, inomaluk lek eerogo piyaawak nduk Ala ake warogo wogogwi, Ala ake pugu lalembunuk, aberak wonage nogo lek aruwak nduk obaane'me punuk wakwi, Ala unde logowak nduk mippiigo logonet Ala ake pugwi, Ala inom lambunik logowak nduk ake pugwi, eeko logonet, eekak yuwak nduk,

³⁸it aakumi Iterali puut Tinayi abu'me karume time wonogwe iigak, Ala ake pogo logowak nduk, at Aliku ALA puut Tinayi paga nen wone lengganogo Muta yoreegerak nogo ti aret.