Read Western Dani Ala Unde 8 Bible Online

Ala Unde 8 - Western Dani bible

Ala Unde 8

¹At Aliku ALA nen Muta yoge logonet,

²“Kat nen aap an neebe unde inayum yiriko menggaarak mendek wagangge, mippiigo logonet, amburu kilippiyoorak nduk wagangge, inomaluk lek eerogo piyaawak nduk, nake warogo wo'niriyak tapi ngguunok ambi wagangge, ndomba ngguunok mbere'ndak wagangge, oroti ragi pega'lek kagak worarak muun yarak me wonage nogo wagangge, ee'nuk, aap Karun apuri inom wogoren

³it aakumi Iterali mendek abok aret ninom lambungge minggim nawooliya wurik tungga'nggi paga taati kuwak ari woraawak nduk, yoret o.”

⁴Yoge mbareegi, at Muta nen Aliku ALA yoreegerak nogo ndak-ndak aret Ala apuri Iterali mendek abok aret Ala inom lambungge menggim awooliya wurik tungga'nggi paga taati aret kuwak eeppiyareegerak.

⁵Kuwak eeppiige nagagerik, yorage logonet, “An yogondak eeke yi ti, at Aliku ALA nen, Eeru o, yo'negerak me, eeke agarik o,” yinuk,

⁶yorage nagagerik, Karun apuri inom woraawak nduk, wiiragagerak owagam wogo mbareegwa, niyo paga inabin koorinake nagagerik,

⁷yum akem mendek agi yirika nggorek nogo Karun yippege, agabee'le obate paga nggerembege, yum endekem mendek nggorek yirippege, yum agale warak akem yiriyak epod nogo yirippunuk, kayin yawenak amuni mbanak yugu abe penggaarak epod nogo obate paga agabee'le nggerembege, eereegerak.

⁸Eeke nagagerik, yum ko'no mendaarak negen amiguwak paga yirippege logonet, Ala iniki mbake ineenu ariyak mendek endage Urim Tumim imbirak inom nabenogo pereegerak.

⁹Nabenogo punuk, yum Karun anobak paga perenogo pege nagagerik, Ala ake leenak ayuk warak kogo logowak nduk, mbuti emas paga meeli negen ogobakkigirik nogo anobak paga kwippereegerak. Ti eereegerak nogo ti, Aliku ALA nen Muta yoreegerak nogo ndak-ndak aret eereegerak.

¹⁰Ti eeke nagagerik, Muta nen aap mippiigo logonet, amburu kilippiigo menggaarak toolak nogo wagangge nagagerik, Ala ake nggomoorak logowak nen awooliya wurik paga inom, awooliya wurik inikime yi mendek ndi mendek wonage nogo paga inom, abok aret amburu kilirogo pit nagagerak.

¹¹Kilirogo pit nage nagagerik, Ala ake warogo kani kunggo menggam paga inom, kani kunggo logonet yi mendek ndi mendek eeko menggaarak paga inom, ineenggi kookak togolowak eebe paga inom, alom kwippugu paga inom, abok aret ake leenak logowak nduk, ne 7 paga amburu werenogo pereegerak.

¹²Werenogo pege nagagerik, Karun nogo Ala ake leenak logowak nduk, amburu toolak nogo ando waganogo Karun anobak paga kilippereegerak.

¹³Kilippege nagagerik, Karun apuri nogo owagam piya woraanuk, at Aliku ALA nen Muta yoreegerak nogo ndak-ndak aret inayum akem mendek agi yirika nggorek nogo yirippiige, inagabee'le inobate paga nggerenogo piige, inabetagi inanobak paga perenogo piige, eereegerak.

¹⁴Ti eeppiige nagagerik, inomaluk lek eerogo piyaawak nduk, tapi ngguunok wariyak nogo wonok woraawak nduk yoragagerak wonok wogo mbareegwa, Karun apuri inom nen tapi nogo anobak ineenggi tebembunuk, wonogwe iigak,

¹⁵at Muta nen tapi nogo warogo punuk, kani kunggo menggam nogome Ala ake mondok leenak logowak nduk, amiya ando eenggi paga waganogo Ala ake warogo kani kunggo menggam eyo owak mippugu irip-irip to eerak agi paga labunogo pit nage nagagerik, amiya nogo apit aret Ala ake warogo kani kunggo menggam abu'me kilirogo pereegerak. Ti eereegerak nogo ti, Ala ake warogo kani kunggo menggam nogome Ala nen aakumi inomaluk lek eerogo piige logowak nduk, ake aret agago pereegerak.

¹⁶Ti eerogo pege nagagerik, tapi warak nogo aan paga mendek amok inom, ogogun paga nabenak ape inom, apenggen imbirak amok inom, abok aret wagangge nagagerik, kani kunggo menggam nogome kani kuneegerak kwe,

¹⁷tapi ngguunok eebe inom, agabolo inom, aanagale inom, nogo ti, wonok at Aliku ALA nen Muta yoreegerak nogo ndak-ndak owa'nagat wurik me endekem time kani kuni wundeegerak.

¹⁸Ti eeppunuk, ndomba ngguunok Ala ake warogo kani kuniyak nogo ambi wonok wage nagagerik, Karun apuri inom nen ndomba anobak ineenggi tebembunuk, wonogwe iigak,

¹⁹Muta nen wake nagagerik, amiya waganogo Ala ake warogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nagagerak.

²⁰Werenogo pit nage nagagerik, ndomba nogo mbanogo punuk, anobak inom, eebe mbanak inom, amok inom, kani kunggo menggam pege nagagerik,

²¹aanagale inom, aawi mbanak inom, niyo paga koorogo punuk, eebe mbanak nogo inom abok aret Ala ake warogo kani kunggwi nogo mendek me nduk, kani kuneegerak. Ti eereegerak ti, Ala nen Muta yoreegerak nogo ndak-ndak at Ala ake warogo kani kunemenggaarak obari obeelom kage logonet, ale'nggen mbariyak nduk, eekwi nogo ti aret eereegerak.

²²Ti eeppege nagagerik, at Muta nen aap Ala unde mippiigo logonet, ndomba ngguunok wako menggaarak me, wariyak nduk pi wagagerak ore nogo wonok Muta iri wogo mbareegwa, aap Karun apuri inom nen ndomba nogo anobak ineenggi tebembunuk, wonogwe iigak,

²³at Muta nen ndomba ngguunok nogo warogo punuk, amiya ando wagangge nagagerik, aap Karun nogo aruk irip abe'nggan labunogo pege, eenggi iyagalo abe'nggan labunogo pege, iyok iyagalo abe'nggan labunogo pege, eereegerak.

²⁴Ti eeppunuk, aap Karun apuri nogo owagam piya wage nagagerik, ndomba amiya ando waganogo inaruk irip abe'nggan paga labunogo piige, ando ineenggi iyagalo abe'nggan labunogo piige, iniyok iyagalo abe'nggan labunogo piige, eeke nagagerik, ndomba amiya nogo apit aret Ala ake warogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nagagerak.

²⁵Werenogo pit nage nagagerik, ndomba amok wagangge, ageewak amok inom wagangge, aan paga mendek amok wagangge, ogogun paga nabenak ape wagangge, apenggen imbirak amok inom wagangge, aawi abe'nggan kinik wagangge, eeppege nagagerik,

²⁶at Aliku ALA ake pugu oroti ragi inom pega'lek kuwe worarak inom, oroti longgo warogo amburu inom worarak nogo inom, oroti tabak worarak inom, muun yarak me yonggolak wonage nogo, ambitak mban waganogo ndomba amok inom, aawi kinik inom, nogo paga lumbereegerak.

²⁷Lumbege nagagerik, abok aret waganogo aap Karun apuri inom ineenggi paga piyareegerak. Piige mbareegi, Ala unde leenogo mippiigo logonet, mbanak ando, Yi kat kake o, yinuk, at Aliku ALA titik eerogo pugwi nogo ndak-ndak it nogo nen, Yi Kaliku ALA kake o, yinuk, titik eerogo Aliku ALA wogogo mbareegwa,

²⁸Muta nen ineenggime wonage nogo wagangge nagagerik, ndomba warak mbanak kani kunggo menggam wonage nogo obaga nippunuk, inom kani kuneegerak. Ti eereegerak nogo ti, aap Ala unde mippiigo logonet, Aliku ALA ake warogo wogoremenggaarak obari obeelom kage logonet, ale'nggen mbaruwak nduk, Aliku ALA ake kani kunggwi nogo aret eereegerak.

²⁹Ndi, at Aliku ALA nen, “Aap an neebe unde leenogo mippiigo logonet, mbanak ando Naliku ALA nake titik eerogo wo'nogo logowak o,” yinuk, Muta yoreegerak nogo ndak-ndak eeke logonet, ndomba ape uruwak mbanak nogo eenggime wagangge nagagerik, Yi Kaliku ALA kake o, yinuk, nggomoorogo pereegerak. Ti eereegerak nogo ti, aap Ala unde leenogo mippiigo logonet, ndomba mbanak nogo it mippiigwi unde kologo menggaarak me, at Muta ake mbanak aret wagangge nagagerik, eereegerak.

³⁰Nogo eeke nagagerik, aap mippiigo logonet, kilippiigo menggaarak amburu ambi wagangge, amiya kani kunggo menggam wonage nogo ambi wagangge, ee'nuk, wonok nage nagagerik, aap Karun apuri inom inoba werenogo piige, inayum yirik paga werenogo piige, eereegerak. Ti eereegerak nogo ti, aap Karun apuri ineebe inom, inayum inom, Ala ake leenak aret logowak nduk eereegerak.

³¹Eeke nagagerik, at Muta nen aap Karun apuri inom yorage logonet, “Ala nen, Aap Karun apuri inom mban nonggo logowak o, yinuk, yo'negerak me, Ala ake mbanak yi, wonok Ala inom lambungge menggim awooliya wurik tungga'nggi paga taati aret lako logomonggotik, aap Ala unde leenogo mippiigo logonet, nenggak yuwak nduk, oroti muun yarak me yonggolak wonage nogo inom aret nonggo logonip o.

³²Nonggo logomonggotik, ndomba mbanak inom, oroti inom, ando ndiinnage kenok, kani aret kumbumunggup o.

³³Ndi, Ala unde logomunggup nduk, mippinagagwi niigak, ne 7 aret ariyak me, ti aga'lek kagak, Ala inom lambuni wage menggim awooliya wurik tungga'nggi paga time nen wundi naga'lek kiigak, ne 7 aret aruwak o.

³⁴Nit yogondak eeppinagagwi yi, kinomaluk lek eerogo punuk, Ala kinom lambunik logonet, ake eeko logomunggup nduk, at Aliku ALA nen, Togop eeppiyet o, yegerak kenok eeppinagage agarik o.

³⁵At Aliku ALA nen ari logonet, Karun apuri inom kambukwak, an ninom lambungge minggim nawooliya wurik tungga'nggi paga liingge inom, oonikiya inom, time mban logonet, Yogop ee'nip o, ndogop ee'nip o, yorage nogo liirogon eekwi iigak, ne 7 aruwak o, yinuk, yo'negerak kenok, yokkiragi o.”

³⁶Yorage mbareegi, aap Karun apuri inom nen Aliku ALA nen Muta yoreegerak nogo ndak-ndak abok aret eereegwaarak.