Read Western Dani Ala Unde 9 Bible Online

Ala Unde 9 - Western Dani bible

Ala Unde 9

¹Karun apuri inom mippiigwi iigak, nogo 7 yippunuk, ko'lu ti paga Muta nen Karun apuri inom, aakumi Iterali inoweewi inom, wiiragagerak wogo mbareegwa,

²Muta nen Karun yoge logonet, “Kat kalik komaluk lek eerogo pagawak nduk, kaanggumi inawinde-inobaande eerak lek amuni mbanak kero tapi ngguunok awooluk ambi wagangge, ndomba ngguunok warogo kani kuniyak ake ambi wagangge, eeke logomenggendik, at Aliku ALA enggaanom paga ake pi mok o.

³Pi wage logomenggendik, it aakumi Iterali mendek yoroorak nogo yi aret. O yogondak at Aliku ALA nigiya wambi woraagin me, inomaluk lek eerogo piyaawak nduk, Aliku ALA ake warogo puurak kambin ngguunok ambi waganggwi, Aliku ALA ake warogo kani kuniyak tapi aagaluk ambi inom, ndomba ambi inom, tahun ambit eerak inawinde-inobaande eerak lek amuni mbanak kero waganggwi, ndi, Ala inom lambunik logowak nduk, ake warogo puurak tapi ambi inom, ndomba ngguunok ambi inom, waganggwi, ee'nuk, Ala enggaanom paga ake warogo wogogo logonet, gandum anggen yigirik amburu paga amok mbanogo worarak nogo inom aret ake pi woraawak o,” yinuk, yoreegerak.

⁵Yoreegerak nogo yorage mbareegi, it aakumi Iterali nogo Muta nen, “Yogop eeruwak o,” yoragagerak nogo ndak-ndak aret wonok Ala inom lambungge menggim awooliya wurik me taa'nogo pi wogo nogogwaarik, Ala apuri wonogwe nogo abok aret Aliku ALA enggaanom paga taati mi'ndak wonogwe iigak,

⁶Muta nen yorage logonet, “Yi eekwi yi, Aliku ALA nen, An mondok tiyanak lombok minggirak inigen neyaawak nduk, aakumi Iterali, Yogop eeruwak o, yegerak kenok, eeko ogoorik o.”

⁷ Yorage nagagerik, Karun yoge logonet, “Komaluk mbo puwak nduk, wariyak wonok wagandak inom, Aliku ALA ake warogo kani kuniyak nduk wonok wagandak inom, Ala nen yegerak nogo ndak-ndak kat inom, kapuri inom, kinomaluk lek eerogo punuk, Ala kinom lambunik logomunggup nduk, aa'nduk nggami aanggo wakwi kwak warogo Ala wogoge, ndi, ti'nuk, it aakumi inomaluk mbo puwak nduk, wariyak wonok wagaarak nogo inomaluk lek eerogo punuk, Ala inom lambunik logowak nduk, nggami aanggo wakwi kwak warogo Ala wogoge, eerenok nduk, Ala ake warogo kani kunggo menggam time nak o.”

⁸Yoge mbareegi, Karun nogo kani kunggo menggam time nage nagagerik, at alik omaluk lek eerogo puwak nduk, tapi aagaluk nogo warogo pege mbareegi,

⁹at apuri nen tapi amiya nogo Karun wogogo mbareegwa, amiya nogo eenggi paga waganogo kani kunggo menggam owak mippugu irip-irip to ari wonage nogo paga labunogo punuk, amiya apit nogo kani kunggo menggam abu'me kilirogo pereegerak.

¹⁰Pege nagagerik, at Aliku ALA nen Muta yoreegerak nogo ndak-ndak aret omaluk lek eerogo puwak nduk, tapi warak amok inom, apenggen inom, ogogun paga nabenak ape inom, waganogo kani kunggo menggam kani kungge nagagerik,

¹¹eebe mbanak inom, agabolo inom, ooliya owa'nagat wurik endekem nggwe time kani kuni wundeegerak.

¹²Ti eeke nagagerik, Ala ake warogo kani kuniyak wonok wogogwaarak nogo, Karun nen wake mbareegi, at apuri nen amiya nogo at Karun wogogo mbareegwa, Karun nen amiya nogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nagagerak.

¹³Pit nage mbareegi, at apuri nen ake warak kani kuniyak eebe inom, anobak inom, ndegen-ndegen eerogo wogogo mbareegwa, kani kunggo menggam nogome kani kuneegerak.

¹⁴Kuneegerak kani awo nengge me, aanagale inom, aawi-obaak kinik inom, niyo paga koorogo punuk, inom aret kani kumbereegerak.

¹⁵Kani kumbege nagagerik, aakumi Iterali inake wariyak kambin wonok wogogwaarak nogo Karun iri wogo mbareegwa, wagangge nagagerik, kambin aa'nduk eereegerak togop ndak-ndak aret aakumi Iterali inomaluk lek eerogo puwak nduk warogo Ala ake pereegerak.

¹⁶Pege nagagerik, warogo kani kuniyak ake wonok wogogwaarak nogo, warogo punuk eeriyak wone yugu nogo ndak-ndak aret eerogo punuk,

¹⁷gandum anggen yigirik ake pugwi nogo eenggime kabulogo wagangge nagagerik, kuubondendok kani kunggo menggam kambin pereegwam taa'nogo inom aret pege mbareegi, kani nenggegerak.

¹⁸ Kani nengge mbareegi, it aakumi Ala inom lambunik logowak nduk ake warogo wogoriyak tapi inom, ndomba inom, at Karun nen warogo pege mbareegi, at apuri nen amiya nogo at Karun wogogo mbareegwa, Karun nen amiya nogo kani kunggo menggam irip aru-ogwe, ambe agi-ogu, eyo nabenak paga abok aret werenogo pereegerak kwe,

¹⁹tapi-ndomba ngguunok ageewak amok inom, aan paga mendek amok inom, apenggen imbirak inom, ogogun paga nabenak ape inom, amok abok aret nogo perak,

²⁰waganogo tapi-ndomba ape uruwak nogo paga lumbege nagagerik, amok mban waganogo kani kunggo menggam kani kumbereegerak kwe,

²¹ape uruwak inom, aawi abe'nggan kinik inom, Muta yoreegerak nogo ndak-ndak aap Karun wagangge nagagerik, “Yi Kaliku ALA kake o,” yinuk, titik eerogo Aliku ALA wogoreegerak.

²² Wogoge nagagerik, aakumi inomaluk mbo puwak nduk, Ala ake warogo wogogwi, Ala ake warogo kani kunggwi, Ala inom lambunik logowak nduk, ake warogo wogogwi, eekwi nogo abok aret eeke nagagerik, eenggi imbirak aakumi Iterali inanobak paga tebenogo piinok, ale'nggen inoba piige nagagerik, puk agagerak.

²³Puk age mbareegi, Ala inom lambungge menggim awooliya wurik me nogome Muta Karun imbirak unggwi nogo nogogwaarik, wundi woraanuk, aakumi Iterali nogo inale'nggen inoba piigo mbareegwa, at Aliku ALA nen abu tiyanak lombok eya kwindagala eerak wage

²⁴enggela'me nen kani omoonuk wunuk agan wundi wage logonet, ake warak kani nawak nduk kani kunggo menggam pugu nogo inom, amok leenak pugu nogo inom, abok aret ne ambit wunuk togon nengge it aakumi nogo inigen kogo nogogwaarik, inale'nggen nen keekok yogo nogogwaarik, inendobanggun yindumbunuk, alut eereegwaarak.