Read Western Dani Yeremiya 1 Bible Online

Yeremiya 1 - Western Dani bible

Yeremiya 1

¹YEREMIYA WONE It Mbeniyamin mendek wonogo menggam kota Anatot Ala unde eeke nagagerak ambi endage Kilikiya aput Yeremiya nen wone yereegerak nogo yi aret.

² At Amon aput Yotiya nogo it Yekura inowe endagembogut logonet wone lengganogo yorage kagak tahun 12 eeppunuk, ambi age paga Aliku ALA nen Yeremiya wone yogak mban eeke,

³ ti'nuk, at Yotiya aput Yoyakim kunduk, it Yekura inowe endagembogut logonet, wone lengganogo yorage kagak yogak mban eeke, ti'nuk, Yotiya aput Terekiya aakumi Yekura inowe endagembogut logonet, wone lengganogo yorage kagak tahun 10 eeppunuk, ambi eeke tut 4 penembunuk, ambi penenak paga it aakumi Yerutalem mendek kugun wogoren mbo piya nogogwaarak kuli ti paga yogak mban eeke, eeke nagagerak.

⁴Aliku ALA nen wone an yo'nege logonet,

⁵“Kagalo inikime awo keenggi-kiyok warak eerogo pagaga'lek logonet, keebe neenu wonage, Kagalo nen awo ndakkaka'lek kagak, keebe leenogo pagage, An nen yokkege neegak, it aakumi inanebunu lombok yoranet nege logonok nduk eerogo pagage, Eereegirak o.”

⁶Yo'nege mbareegi, an nen at yoge logonet, “Ai! Kaliku Kitok Menggendak ALA o. An awo wulaga mbuuluk aret o. Ndi, wone yuurak kunduk kobak aret o.”

⁷Yoge mbareegi, Aliku ALA nen an yo'nege logonet, “An awo wulaga mbuuluk ari ti mage o. Kat yi aakumi ndi aakumi o ndime wonogwe me nak o, yinuk, nappagage neenok, time aret nage, ndi, Ndogop yoret o, yokkege neegak aret yorage, eeke logomunggun o.

⁸Kat nimbirak aret wonage, ndi, maluk eeppagagwi iyo, an karum aret wonage, eeke logogin me, aakumi ineebe paga kagabiti mbariyak ti mage o,” yinuk, at Aliku ALA nen yo'nereegerak o.

⁹Yo'nege nagagerik, Aliku ALA nen eenggi nappi wa'nuk nambe mbaanggage logonet, “An noone yoranet nage logonok nduk, kinikime pigi o.

¹⁰Aakumi inanebunu lombok wonogwe me inom, aap inendagembogut inabu'me piinok menggam inom, eyo alom kinggwi kwak eerogo piige, o minggwi kwak minogo piige, lek eerogo piige, pak langgunogo pugwi kwak eerogo piige, o wurogo pugwi kwak eeppiige, awi yakwi kwak eerogo piige, eeke logonok nduk, ne yogondak yi paga mippagage yi, keenu aru o,” yinuk, yo'nereegerak.

¹¹Ti abu aret yo'nege nagagerik, Aliku ALA nen wone ambi an yo'nege logonet, “Yeremiya wae. Kat nano mendek kenegen kage agandik o?” Yo'nege mbareegi, an nen onggo at yoge logonet, “Eyo teno eno'mbak mbanak nenegen kage agarik o.”

¹²Yoge mbareegi, Aliku ALA nen, “Eeppiyoorak wone yagarak nogo, a'me lik yi nawak nduk, nenegen wogoren nege me, kenegen kagandak ti, abu op lombok kagandak o,” yinuk, yo'nereegerak.

¹³Ti yo'nege nagagerik, Aliku ALA nen ambi yo'nege logonet, “Nano mendek kenegen kage agandik?” Yo'nege mbareegi, “Togolowa'na niyo larak kila-kila eeke logonet, togolowak o omarip paga pa'nggwe nen kweyanogo nappi wage nenegen kagarak o,” yinuk, yoreegirak.

¹⁴Yoge mbareegi, Aliku ALA nen an yo'nege logonet, “O omarip paga pa'nggwe nen aaninggin mondok iya lombok aakumi o yime wonogwe abok aret inoba kwi'narigin,” yo'nereegerak o.

¹⁵At Aliku ALA nen ari logonet, “An nen it yi aakumi ndi aakumi o omarip paga pa'nggwe wonogwe inabu'me piinok menggaarak abok aret inayonggo piyaakit nduk, eeke agarik o. Inayonggo piige neenok, wogo logomenggaarik, It wone lengganogo yorogo menggam inalitak lombok o Yerutalem tu unggwogo menggam ogobakkigirogo pit wogwe, O Yerutalem pak wurik eraanu endekem yendok-wandok ogobakkigirogo pugwi, O kota-kota Yekura wonogo menggam abok aret unde eekkolaawok nduk, eekwi, Eerugun o.

¹⁶It an napuri nen an mbo paninuk maluk mban eerit nogo logonet, an wonage neegak kugi ogut eerak inake obari abe kaga nogo mendek kani kunggwi, Ineenggi paga eerogo pereegwaarak nogo alut eekwi, Eekwi iigirak me, Aaninggin mondok nggwok lombok inoba kwippiya woraagin o.

¹⁷Togop aret eerigin me, pipuk eeppunuk logot o. Ndogop yoret o, yinuk, yokkege neegak yorage logomunggun me, ineebe paga kagabiti mbaka'lek kogogumbuk logot o. Kagabiti mbake keenok, it inenggaanom kagabiti mbariyak nduk, eeppagage neyo, kagabiti mbariyak mage o.

¹⁸It Yekura inoweewi inendagembogut inom, inoweewi inendage warak inom, it inake eeka neebe unde inom, it aakumi o Yekura menggaarak inom, it o yime wonogwe abok aret tebenogo pagawok nduk eeremenggaarak kwe, an nen kat komaawi ti, o kota yugum pak wurik kwak, mbutiwak yinik nu'lek menggi kwak, mbuti omaawi tembaga mendek paga kobat yinik kwak, o yogondak togop aret eerogo pagagirak o.

¹⁹It nen tebenogo pagawok nduk eeremenggaarak kwe, kat nimbirak wonage, ndi, an nen kagap ndake, eerigin me, tebenogo pagarak meek aret kaagun o,” yinuk, Aliku ALA nen yo'nereegerak o.