Read Western Dani Yeremiya 10 Bible Online

Yeremiya 10 - Western Dani bible

Yeremiya 10

¹Kit aakumi Iterali paga wiganak yi wae. Aliku ALA nen wone yokkirage yi, kinaruk koneninip o.

²Aliku ALA nen yegerak nogo yi aret. “It yi aakumi ndi aakumi nen yogop-ndogop yogo menggaarak nogo ti, We aanom warogo yogo menggaarak kagak, it Iterali mugurok nogwe, Mbogut paga tam warak mendek eeke inigen kenok, yi aakumi ndi aakumi inamineeri ne agan nage menggerak kwe, It Iterali inigen kogwe kenok, inamineeri ne agan nage, Eerugwaarik o. It yi aakumi ndi aakumi ti nen eyo eyonggaame mendek muurogo pugwi, Aap inogut ogobakkigika nen eyo ti paga kugi ogut eerogo pugwi,

⁴Kugi ogut aago enete amuni mbannaruwak nduk, mbuti perak inom, mbuti emas inom, nabenogo pugwi, Kweyak togon nage kero paku omaawi warogo pugwi, Eeko menggaarak.

⁵Kugi ogut ogobakkigirik nogo ti, nggilu yarak me aap-aap agago pegaatak nogo pogom me, At nen wone mbangge, tu nage, eeka'lek kenok, aap nen piyaninuk nogo menggaarak o. Inagugi ogut nogo nen aakumi maluk eerogo piige, Aakumi obeelom eeppiige, Eekeelik me, At eebe paga it Iterali inagabiti mbarugwaarik o,” yinuk, yegerak me, yokkiragi o.

⁶Kaliku ALA wae. Kat ndak-ndak ambi wonage lek aret o. Kat mondok nggwok aret me, kendage kunggwi iinok, komaawi paga eerit nage menggendak.

⁷ It yi aakumi ndi aakumi inowe endagembogut yi wae. Taani nen kat kayuk wuriyak lek mbako agaarik? It aakumi inanebunu lombok inom, it inoweewi aap inendagembogut inom, apit aret inenggela'me Kat kokwak aap iniki warak ambi lek aret me, Kat mban kayuk wuko logorak ti op aret o.

⁸Kugi ogut eyo paga ogobakkigirik aanom warogo alut eekwi ti nen wone mamunirogo menggaarak me, It aakumi ti, iniki apit wi negen aret wonogo agaarik o.

⁹Mbuti perak aan libik-lebek eerak o Taritit nen wonok wogwe, Mbuti emas o Upat nen wonok wogwe, Eekwi iinok, It eyo paga ogobakkigika inom, it mbuti emas paga ogobakkigika inom, nogo nen, ogut ogobakkigirogo pugwi, Yum maa'ngga amu kunik paga, maa'ngga anggup paga, yugu nogo yirippiigwi, Eeko menggaarak nogo It aap ineenggi amburu warak nen mban eeko menggaarak kwe,

¹⁰Kaliku ALA perak, kalik Ala aret! Kat kanggeelik mondok keenik wonage, Kendagembogut kitok mondok wonage, Eeke menggendak o. Kanini mbake keenok, nggween yi nuk-nuk ari, Kanini yi aakumi ndi aakumi inoba piige keenok, ko wappunuk, wonaga'lek iniki ma'nogwe, Eeko menggaarak.

¹¹Togop me, kit Ala apuri yi wae. “It nen mbogut ogobakkigirogo pugwi, nggween nenaarogo pugwi, eerulik inagugi nogo, o nggween paga yime nen inenggaawak lek ogwe, mbogut abu'me o oolo ya'i nen ineebe lek ogwe, eerugun, yegerak o, yinuk, yi aakumi ndi aakumi yorogo logonip o,” yinuk, yegerak me, yokkiragi o.

¹²At Ala eenggi omaawi paga o yi ogobakkigike, Iniki warak nen o nggween yi, ena koonogo pege, At eenu paga mbogut mbiganogo nappege, Eereegerak o.

¹³At oone ngguurubu negen ari kenok, niyo mbogut paga narak wonage nogo kilak-tamok eeke, Ameraakot o ilin-unggut nen nippit wage, O yabok pindanogo nappege logonet, mayu wuppit wage, O wiya kuwak eerogo pege menggim nen nappit wage, Eeke menggerak o.

¹⁴It aakumi abok ti, iniki lek wi negen aret agaarik o. It aap mbuti emas paga eeka nen ogut ogobakkigirogo pugwi ti, Oone lek ogut mban ogobakkigirogo pugwi me, inenggali ogo menggaarak.

¹⁵Kugi inogut eerak nogo ti, we aanom warogo aret eerak kenok, aakumi nen meek eerogo pugwi me, Eeko menggaarak onggo inoba piyoorak eyom panggoni wage kenok, inenggaawak lek aret arugun o.

¹⁶At Yakup iniki kunik mbake nogo perak, togop lek o. At yi mendek ndi mendek apit aret wakkage nagagerik, Eyate kwak inanebunu Iterali mendek warak eerogo piyareegerak nogo ti, Endage, Omaawi Lombok Menggerak Aliku ALA aret o.

¹⁷Kit kinooriyak nduk, wakkumbinaganuk wonogwe yi wae. Kinamindik-kinamendek mondok li'luk eeppunuk, kinagaket paga logonip o.

¹⁸At Aliku ALA nen yegerak nogo yi aret. “Ne yogondak yi aret it o yime wonogwe abok aret mbo wumbiige, It o yime wonogwe nogo aaninggin-paaninggin kaawak nduk, inoba piige, Eerigin o,” yinuk, yegerak o.

¹⁹Togop me, nit andi-pandi ee'ninake me, ninabuwa o! Ninawinde-ninobaande ee'ninakerak nogo lek ariyak meek aret o. Niniki mbako logonet, “Andi kagak puk arugun,” mbakoorak kwe, meek tit ee'ninake agaarik o.

²⁰Ninawooliya wurik nogo mi-mi wangge, Keele mbarenggak mendek abok aret nggaru-nggaru nage, Eekerak o. Ninapuri wologwe nogo mbo pinaninuk nagaarak ineebe lek aret agaarak me, ninawi wurogo pinanugwi, Ninawooliya kambonogo pinanugwi, Eeriyak ineebe lek aret o.

²¹It aap ndomba ndegeninakwi kwak ndegenninaka ti, iniki lek wi negen aret o. “Nonggop eeruwi o?” yinuk, Aliku ALA nggino yogwi lek me, eeriyak mbakaatak nogo lek age, It inaanggumi nit nogo tak-mak aago nugwi, Eeko ogoorik o.

²²Kinaruk o! Wone ambi agan wage yi, kinaruk koneninip o. O omarip paga pa'nggwe nen keekok agan wogo agaarik o. Wone ti agan wogwe paga nen o Yekura kota-kota yi oone ndi oone lek age, Nggeewo owo iname aret age, Eerigin o.

²³Kaliku ALA wae. Ko'lu ee'ninaburak nit aakumi nineenggo'lek ti, neenu aret o. Ndi, ko'lu eerit noorak kunduk, nineenggo'lek mban aret.

²⁴Togop me, Kaliku nogoba Ala o. Niniki koonogo paniyak ti, op aret kwe, Kanini nen niniki koonogo panege keenok neebe lek eerogo panukwak, Kanini nombake logonet, niniki koonogo paniyak ti mage o. Ata, eekirak ndak-ndak eeppanege logonet, niniki koonogo panege logot o.

²⁵It yi aakumi ndi aakumi nen Yakup paga wiganak nogo inambeme yonggorinakwi, Ineebe mondok lek eerogo inambeme yonggorinabit nogwe, Inawi alom lek eerogo pugwi, Eereegwaarak me, It yi aakumi ndi aakumi, Ninogoba Ala aret o, yinuk, yogolik nogo inom, It aakumi inanebunu lombok kendage kunogo yogolik nogo inom, kanini inoba piige logot o.