Read Western Dani Yeremiya 11 Bible Online

Yeremiya 11 - Western Dani bible

Yeremiya 11

¹At Aliku ALA nen at Yeremiya yoreegerak nogo yi aret.

²“An nen, Yogop ee'nu ndogop ee'nu, wone koonogo pigirak yokkege yi, karuk konengge logomenggendik, it aakumi Yekura mendek inom, o Yerutalem wonogwe nogo inom, yorage,

³it Iterali inogoba Naliku Ala nen ari yi, yorage, eeriyak nogo yi aret. It kombomini o Metit paga mbuti worako menggam kwak wonogwe me nen wogoren wundi wa'nuk, it yorage logonet, An nen, Yogop ee'nu ndogop ee'nu, yokkirage yi, kinaruk liirogon konembunuk, ndak-ndak eekwi kiinok, kit an napuri aret ogwe, ndi, an kit kinogoba aret age, eerugun o.

⁵Eekwi kiinok, an nen kit kinombomini inanggween abu abe yilak amburu inom, nggiin amburu inom, niyo eneeri negen kila-kila wungge menggim time wogoraagin o, yinuk, kumbuk mbanogo yoragagim nogome kit wokkiraagin o, yinuk, yoragagirak it yogondak unde eeppatinuk wonogwe nogo nen wone yugu ti, liirogon eeka'lek iinok, pulunik aret logogun, yegerak, yoret o.” Yo'nege mbaki, an nen, “Kaliku ALA wae. Abet aret yagan o.”

⁶Yoge mbaki, at Aliku ALA nen an yo'nege logonet, “Kat nen an noone ari yi, wonok it aakumi o Yekura kota-kota wonogwe inom, Yerutalem tu paga tu paga nugwi inom, yorage logorak nogo yi aret. Naliku ALA nen wone, Yogop eeruwak ndogop eeruwak, koonogo pege yi, liirogon konembunuk, eeko logowak o.

⁷It kombomini o Metit nen wogoren wundi wagagirak kuli nen nok, o yogondak kuli, Noone woppunuk, eeko logonip o, yinuk, noone omaawi paga yoragak mban eeke nagagirak kwe,

⁸it nen an noone konenggwi, liippugwi, eeka'lek inogogumbuk a'nuk, maluk eeriyak mban koombunuk eerit nogwe iinok, wone ninom koonogo pereegirak, Eeko logonip o, yinuk, lengganogo yoragagirak eeka'lek iinok, Yi paga ndi paga pulunogo pinagage neyaamunggup o, yoragagirak nogo aret inoba kwippiyareegirak o.”

⁹Yo'nege nagaarik, ti'nuk, ambinom an yo'nege logonet, “It aap Yekura mendek inom, it aap Yerutalem menggaarak inom, nogo nen, Ndogop eeruwok o, yinuk, iniki ambit eeppunuk, muk wone mbanggaarak o.

¹⁰An yorage nagagirak nogo inombomini nen, Eeriyak, nineebi o, yinuk, mbo punuk, maluk eerit nugu nogogwaarak nogo aret mugurok nogwe, an wonage neegak kwe, kugi mugurok nogo logonet, ayuk wukwi, eeko agaarik o. It Iterali paga wiganak inom, it Yekura paga wiganak inom, nen wone eeko logorak inombomini ninom koonogo pereegirak nogo piinogo mbo pereegwaarak me,

¹¹it apit aret inagap ndakko'nok mbaganiyak meek aaninggin nggwok mendek inoba kwippiyaagin o. Kwippiige neenok, Ninagap ndaru o, yinuk, inoone nggwok paga yo'nirugun kwe, an nen it yo'nugwi ti, naruk konenigin lek aret o,” yinuk, Aliku ALA nen aret yegerak o.

¹²“It o Yekura kota-kota wonogwe inom, it Yerutalem wonogwe inom, obari abe kaga inagugi inake kani kunggwi nogo nen, Yeenggwa niret o, yinuk, inoone nggwok paga nggino yoramenggaarak kwe, aaninggin inoba kwi'nari wage kenok, it inagugi ti nen yeenggwaaraagin mondok lek aret o.

¹³It aakumi Yekura mendek ti, inawi kota-kota ambik wonage pogom inagugi togop aret wonogwe, ndi, o Yerutalem tu ambik wonage nogo pogom, it inenggali ariyak kagak, kugi Mba'an ake obari abe kaga kani kungga ambik ogobakkigirogo mippit nagaarak togop aret wonogwe, eerak aret agaarik o.

¹⁴Togop me, aaninggin inoba ariyak eyom paga, Yeenggwa niret o, yinuk, yo'nugwi iinok, inoone an konenigin lek me, it aakumi yi, inake nen tamban eeke, Ndogop eeppiyet o, yinuk, an nggino yo'nege, Inagap ndaru o, yinuk, an yo'nege, eeriyak mage o.

¹⁵It an napuri niniki kunik nogo nen an nawi wurik me logonet, Inoreewi ambik inom maluk eeriyak koonogo pit nogwe ti, nonggop nduk eeko agaarik o? Ndomba nake nggomoorak titik nugwi ti paga Maluk eekwi onggo eeppinanigin lek teppinanigin, mba'nuk inale'nggen mbako agaarik ya?” yinuk, yegerak o.

¹⁶Eyo tayitun abe kwit agan lagangge logonet, anggen abu obeelom mban yege menggi kwak, At Aliku ALA nen kinendage ti aret toonogo pinagareegerak kwe, O wiya nggwok alik negen wage logonet, Eyo kani wuninogo pege, eno'mbak kani wunuk agan nenet nage, eeke menggi kwak eerogo pinagagin o.

¹⁷Kit Iterali paga wiganak inom, Yekura paga wiganak inom, maluk eerit nogo logonet, kugi Mba'an ake obari abe kaga kani kunggo monggotak paga at awi mbilanogo kwippinagareegerak Omaawi Lombok Menggerak Aliku ALA anini mbake me, aaninggin mondok kinoba kwippinagarak koonogo pereegerak o.

¹⁸It aap an nooriyak nabok mbanggo logonet, “At Yeremiya endage ki logokwak, eyo eebe muurogo pugwi, anggen yigirogo pugwi, aakumi ineenik wonogo menggam nggween paga yime nen enggaawak lek eerogo pugwi, eeruwok o,” yinuk, nabok mbanggaarak an yelok kaga'lek ugun ndomba aagaluk enegen owaanggo wariyak wonok nogo mengga kwak wonage neegak, Aliku ALA nen nooriyak nabok mbanggaarak nogo yo'nege, ti eyom paga eeppaniyak koonggaarak nogo kin eeppanege, eekerak paga neenu agarak o.

²⁰Togop eeppaniyak yagaarak kwe, eekaatak a'me nggelok eeppiige logonet, inowak loongge, Nit niniki mbakwi, Ndogop eerikit, niniki koonggwi, eekwi nogo ninabut mbangge, Eeka Komaawi Lombok Menggendak Kaliku ALA wae. Nawone amburu mbanenok nduk, neebe aret wokkigirak me, kanini nen it eeppiige keyaakit o.

²¹An togop aret yagarak me, it aakumi Anatot mendek nen an nooriyak eeko logonet, “Koorumonggoorak kambukwak, Aliku ALA nen yo'nege kagak yokkirage agarik o, mban agan nage ti mage o,” yinuk, yogwe nogo paga

²²at Omaawi Lombok Menggerak Aliku ALA nen ari logonet, “It aap ti, aaninggin inoba kwippiige logonet, inapuri aap tawe ti, wooluwak paga inoorak kanggwi, inapuri wologwe-komologwe mbi abu nen kambit nogwe, eerugun o.

²³It aap Anatot mendek aaninggin inoba piyoorak tahun punogo pereegirak ndak-ndak ari wage kenok, aaninggin inoba kwippiyaagin me, ambiriluk ambi eenik logogin abu lek aret o,” yinuk, Aliku ALA nen aret yegerak o.