Read Western Dani Yeremiya 12 Bible Online

Yeremiya 12 - Western Dani bible

Yeremiya 12

¹Kaliku ALA wae. An wone noba agaatak yokkiri wage neenok, nawone abu abe amburu mbanogo mban yo'nege menggendak kwe, Kat a'me nggelok eeppiige menggendak wone mbuura'luk ambi yokkiriyak mbakirak nogo yi aret. It maluk eeka ineebe obeelom logonet, inale'nggen mban wonogwe, Ndi, it kat koone liirogon eeka'lek nogo nen inambi abe mban nunggwi, Eekwi nogo ti, nonggop nduk?

²Eyo awi yako mengga kwak yarogo piige mbaken, It togop aret inomanggen yakwi, kwit agan laganggwi, anggen yugwi, Eeko menggaarak. Inambe paga nen kendage yogwe kwe, iniki perak, abu nda lombok wonogo agaarik o.

³Togop aret kwe, Kaliku ALA wae. Kat an liippanege menggendak o! An eeke minggirak nogo kenegen neege, An kat paga nonggop kombake neyaamun? yinuk, nabut mbangge, Eeke menggendak o. Ndomba inooruwok nduk, wogoren wundi wogo mengga kwak, it aap ti, togop aret nigiren nage, Inooriyak eyom ari wage kenok, inooruwak nduk, leenogo piige, Eeke logot o.

⁴It aakumi o yime wonogo menggaarak nogo nen inobaabut maluk aret wonogwe, Ndiimbu-nggwiya inom, yi towe ndi towe inom, abok lek aret ogwe, Ndi, it aakumi nen kunduk, “Nit eerit nugwi nogo at enegen niiga'lek,” mba'nuk eerit nugwi, Eekwi paga O nggween yi mbuk age logonet, ka'let-ndi'nduk eeke, Yi yabu ndi yabu yarak me iri'ngga-kale'ngga teebat neyo-neyo nage, Eeke kagak ne mande ari nagin o.

⁵Yoge mbaki, at Aliku ALA nen, “Yeremiya wae. Ta nduk mbe agan ari namenggi? yinuk, koreewi kinom tu mbe agan nogo logonet, Kat wuppaganuk nogo menggaarak me, kuda kimbirak nonggoti wakkage, Ndi, kobappaga we negen noorak kwe, kiyogobit lik togon wangge kenok, niyo Yoreran aa'nggi paga iri'ngga ku'mbanak me nonggoti nage, Eeriyak mbaken?

⁶Koreewi inom, kowe-kawot lombok inom, nen maluk eeppagarak koonggo logonet kwe, inoone yanggok-yanggok yokkugwi, Pikkabuwok nduk yonggo piinok, inoone yina-yina yokkugwi, Eekwi me, Inoone amburu ndik-ndik yokkugwi iinok, Yi abet aret yo'nogo agaarik o, yinuk, koneniyak mage,” yegerak o.

⁷Aliku ALA nen ari logonet, “An napuri aret kwe, mbo piige, Neyate kwak unde wonage nogo teppiige, An napuri niniki kunik aret kwe, it inawim ineenggime piige, Eereegirak o.

⁸Singa eyonggaame mendek nen aakumi inanini agaket eeginakwi, ineyak ndi wukwi, Eeko mengga kwak Neyate negen unde wonage nogo nen an togop aret ee'nakwi me, Neebi, lombok inombake agarik o.

⁹Yi towe ndi towe enggaanggum nengga nen Towe it mendek eeruwak yabenggek-ndabenggek aago nogo paga ninggippunuk, warogo mbelek togon nunggo mengga kwak, Neyate kwak napuri nogo togop aganakwi lek mbakop? Togop aganakwi aret me, ndiimbu-nggwiya abok aret nen nawak nduk, kuwak eerogo piya mok o.

¹⁰Ndomba ndegeninaka kwak it aakumi ndegeninakwi nen neyabu anggur yarak nogo maluk eerogo pugwi, Neyabu yarak iniyok paga aambiranogo pugwi, Eeko logonet, Neyabu yarak abu obeelom niniki ale'nggen mbake nogo o kugume aakumi wonogolik pogom eerogo pegaarak o.

¹¹It aakumi ti nen neyabu yarak me yi oone ndi oone lek kugume eerogo pegaarak me, Aakumi le yogo mengga kwak, nggween ti, iniki puru ari logonet, le ari kage agarik o. Nanggween ti abok aret karume aakumi wonogolik me negen eerogo pegaarak kwe, Aap ambi nen, Nggween yi agaarak, ao, mbaka'lek wonogo agaarik o.

¹²It aakumi o yi, irip ambime wonogwe nen irip ambime wonogwe nogo abok aret Ineenik ambi teppiyaagun lek Naliku ALA nawooluwak nen nenet nage me, It maluk eerogo piiga nen o karume puut-puut puluk ko aago paga ari wa'nuk, inoba kwi'nari wambi wogo agaarik o.

¹³Naliku ALA nanini kani kunik negen inoba piige me, It an napuri nen gandum awi yumbunogo pegaarak kwe, anggen abe yege lek iri'ngga alok-palok mban lagangge, It yabu ta'liila eekaarak kwe, anggen maluk mban yege, Eeke paga Inenggali mbakak nugu agaarik o,” yinuk, yegerak o.

¹⁴Aliku ALA nen ari logonet, “It aakumi Iterali inom koorok menggaarak inobaabut maluk nogo nen an napuri Iterali yate kwak inanggween wogoragagim tebenggologwe nogo, eyo kinogo wunako mengga kwak it wonogo menggam inanggween paga nen nggiginogo wumbiige, it Yekura paga wiganak inenggela'me wonogwe nogo kunduk, togop aret yabonogo wumbiige, eerigin o.

¹⁵Eeke logominggirik, ti'nuk, inabuwa mba'nuk, yate kwak unde eeppatinuk wonogogwam lombok piya wage, inanggween paga lombok iniyokan wogoren piya wage, eerigin o.

¹⁶It an napuri inobaabut eekwi liirogon mamunggologwe, ndi, it aa'nduk nen inagugi Mba'an endage kumbunuk, kumbuk mbanuwak nduk, napuri mamunirogogwaarak nogo pogom, yogondak, At Eenik Menggerak Aliku ALA endage paga yogo o, yinuk, nendage kumbunuk, kumbuk mbanggwi, eekwi iinok, an napuri inenggela'me logonet, wiganggo logogun kwe,

¹⁷aakumi inanebunu ambi mendek nen noone inaruk liirogon konenggwi lek iinok perak, an nen nggiginogo wumbiinok, ineebe lek eerogo piyaagin o,” yinuk, at Aliku ALA nen aret yegerak me, yokkiragi o.