Read Western Dani Yeremiya 16 Bible Online

Yeremiya 16 - Western Dani bible

Yeremiya 16

¹Aliku ALA nen an yo'nege,

²“Kat o yime logonet, kwe woppunuk, kapurilogwe wologwe inom, komologwe inom, ndaganaburak mage,” yo'negerak o.

³O yime wologwe-komologwe ndarak inom, inagalomini-inogobamini inom, eeppiyoorak Aliku ALA nen yegerak nogo yi aret.

⁴“It ti, andi kambuurak iya nogo mendek inoba aremenggaarak kanggwi iinok, inale yogwe, nggween taambiigwi, eeka'lek we nggween mili ake yabume time mbo piyaagun o. Wooluwak paga inoorak inom, mbi noogelo paga inom, kambemenggaarak me, ineebe kambak nogo yi towe ndi towe wiga agan nugu menggaarak inambi age, ndiimbu-nggwiya nggween paga nugu menggaarak inambi age, eerigin,” yegerak o.

⁵Aliku ALA nen yegerak nogo yi aret. “An napuri yi, nale'nggen inoba piige nogo ndinogo wagangge, ninom kunik logonet, obeelom eeppiige nogo kuli aret pege, ndi, inabuwa mbake nogo inabuwa mbaka'lek mbo piige, eekirak me, it aakumi kambemenggaarak tabun ndoombunuk wonogwe me, iniya unggwage, inale yi nage, inabuwa mbake, eeriyak mage o,” yinuk, Aliku ALA nen aret yegerak o.

⁶“O yime aap inendage warak inom, inendage lek inom, ambugwi aret kambugun me, ineebe nggween taambiigwi, inale yogwe, ineenggi mbanggwi, ineeruwak mbanogo pugwi, eerugun lek aret o.

⁷Ndi, kambemenggaarak tabun ndoombunuk inale yogwe me, iniki eyak wappiyaawak nduk, mbi worarogo wogora nogwe, yi toologo ira nogwe, eeko logogun lek mban aret o. Inagalo a, inogoba a, kambemenggaarak kunduk inale yogwe iigak kwe, iniki eyak wappiyoorak lek mbo aret piyaagun o,” yinuk, yegerak.

⁸ At Omaawi Lombok Menggerak Iterali inogoba Aliku Ala nen yegerak nogo yi aret. “Kat awo wonage keegak kenggaanom paga it aakumi inale'nggen nen agan nugwi, inale'nggen inikime nggelok ari logonet, i'ndok wone mban agan nugwi, eekwi nogo lek eerogo pege, o yime kumi-aap lambumbiigwi me, inale'nggen nen ndawi lubuk warit nugwi nogo lek eerogo pege, eerigin me, it aakumi iniki ale'nggen nen laago lappunuk nunggwi me, kat unggwi nage logomenggendik, kinom kwi'na'nuk mbi nengge, niyo nengge, eeriyak mage o.

¹⁰Wone ti abok aret it aakumi yi, yorage keenok, it nen yokkogo logonet, At Aliku ALA nen aaninggin mondok iya lombok ninoba kwippinaniyak koonogo pereegerak ti nonggop nduk? Nit nano eekoorak paga eeppinaniyak mbake, at ninogoba Aliku Ala maluk ngge eeppogoorak paga eeppinaniyak mbake, eeke agaarik o? yinuk, yokkugwi iinok,

¹¹kat nen it yorage logonet, At Aliku ALA nen, It inombomini an mbo paninuk, an wonage neegak kugi mugurok nogo logonet inake eekwi, inayuk wukwi, eeko nogogwaarak paga aaninggin inoba kwippiyaagin, yegerak, yoraamunggun o. Ndi, it an mbo panugwi, eeko logorak yorage nagagirak nogo eeka'lek teppugwi, eeko nogogwaarak ti abet aret kwe,

¹²it inombowologwe yi perak, abunuk inobaabut maluk lombok eerit nogo agaarik o. An yorage nogo it mondok eeka'lek inogogumbuk logonet, maluk eeriyak iniki mbako menggaarak ti mban mugurok nogwe me,

¹³an nen inabuwa mbarigin lek, o yime nen wumbiinok, o ambi it inom, inombomini inom, ineenggo'lek me time mbo piyaminggirak wonogo logonet, an neegak kwe, liingge-kii'me inagugi mban mugurok nogo logogun, yegerak, yoraamunggun o,” yinuk, yo'negerak.

¹⁴Aliku ALA nen ari logonet, “Inombomini nggween wogoragagim nogome aa'nduk unde eekkologogwa kwak unde eekkolaawak nduk, iniyokan piya woraagin me, aakumi nen, It Iterali mendek o Metit nen wumbiya wa'nuk wogoren wagagerak eenik menggerak Aliku ALA endage kumbunuk, kumbuk mbanggo o, yinuk, ambinom yugun lek o. Ata, It Iterali mendek o omarip paga pa'nggwe nen wogoren wage, yi o ndi o mappiyareegerak wonogwe me nen wogoren wage, eereegerak mondok eenik menggerak Aliku ALA endage kumbunuk, kumbuk mbanggo o, yinuk, yogo logorak eyom panggoni woraagin,” yegerak o.

¹⁶At Aliku Ala nen ari logonet, “It aap yikwe wagangga ambik woraawak nduk yonggo piyaminggirak wogo logomenggaarik, it aap ti, piginabit nogo logogun o. Ti'nuk, towe warit nega ambik woraawak nduk, yonggo piyaminggirak wogo logomenggaarik, it aap ti, puut-puut tiyarogon wonogwe, puut-puut teberogon wonogwe, yugum ambe nggaganak me wonogwe, eerak wonogwe iinok, inooko logogun o.

¹⁷Ineebe nenegen iige neyo kumaarak wonogwe, maluk eerit nugwi nenegen kage neyo nobarak wonogwe, eerak wonogwe lek it eerit nugwi nogo abok aret nenegen wogoren nege minggirak o.

¹⁸Inagugi ogut inoone yogolik ogole warak mendek an nanggween paga time pi unggwogogwaarak paga nanggween enete maluk eerogo pugwi, an neyate negen nanggween time eekulik mendek kagak eerit nugu logonet, o time inagugiwak mban yagabit eerogo pit nogwe, eekaarak paga inobaabut maluk lombok logonet, maluk eerit nugwi onggo aaninggin ne ambi inoba piinok, ne ambi inom aret nduguk togon inoba kwippiyaagin,” yegerak o.

¹⁹Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

²⁰It aakumi nen, Inalut eeko logorak ninogobamini yi aret o, yinuk, ogobakkigirogo pako menggaarak mbaken? Ogobakkigirogo pako menggaarak aret kwe, Ti abe ninogobamini lek aret,” Yokkogo logogun o.

²¹“Togop me, an nen it mamunirage, Nomaawi warak minggirak inom, nayuk warak minggirak inom, ne yogondak yi paga mamunirage, Eeke logogin me, An nendage ti, Naliku ALA aret, ineenu arugun,” yegerak o.